သျှမ်းပြည်နယ်တောင်ပိုင်း၊ ကလောမြို့တွင် ရေဘေးသင့် ပြည်သူများအတွက် စားနပ်ရိက္ခာနှင့် အဝတ်အထည်များ လိုအပ်နေကြောင်းသတင်းရရှိသည်။

ပြီးခဲ့သည့် စက်တင်ဘာလ ၁၀ ရက်မှ စတင်ပြီး မိုးသည်းထန်စွာရွာသွန်းပြီး တောင်ကျချောင်းရေကြောင့် ရေကြီးရေလျှံခြင်း ၊ မြေပြိုခြင်းများဖြစ်ပေါ်ခဲ့ ကာ နေအိမ်အများပြားပျက်စီးကာ လူသေဆုံးမှုများလည်း ရှိကြောင်းသိရသည်။

ထိုသို့ ရေကြီးတာကြောင့် ကလောဒေသခံ ထောင်နှင့်ချီ ရေဘေးသင့်နေပြီး ဘုန်းကြီးကျောင်းများတွင် ရေဘေးကယ်ဆယ်ရေး စခန်းဖွင့်ကာ ပြည်သူများကိုကယ်ဆယ်ထားကြောင်း ကလော ဒေသခံအမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“ လောဆယ်တော့ ရေတော့ပြန်ကျသွားပြီ။ ရပ်ကွက် (၂) နဲ့ (၄) က ကျန်သေးတယ်။ ဘုန်းကြီးကျောင်း တွေမှာတော့ ကယ်ဆယ်ရေးစခန်းပုံစံ နဲ့ ဖွင့်ထားပေးတယ်။ တချိုတွေဆို တစ်အိမ်လုံးရေထဲမျောပါသွားတော့ အိုးခွက်တွေကမှအစ လိုတယ်။ အဝတ်တွေရောပဲ။” ဟု ကလောဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။

ထို့အပြင် ရပ်ဝေး ရပ်နီးမှ အလှူရှင်များ လာရောက်လှူဒါန်းသည့် ထမင်းဗူးများတွင် ပြည်သူများဆီရောက်လျှင် သိုးကုန်တာကြောင့် အစာခြောက်နှင့် ရေဗူးများပို၍လှူစေချင်ကြောင်း ၎င်းအမျိုးသမီးက ထပ်လောင်းပြောသည်။

မြေပြိုမှုကြောင့် နေအိမ်အများပြားဆုံးရှုံးခဲ့ရပြီး စိုက်ပျိုးမြေနှင့် အသီးနှံပင်များလည်း ပျက်စီးဆုံးရှုံးကုန်သဖြင့် ရှေ့ဆက် စားဝတ်နေရေးအတွက် စိုးရိမ်မှုရှိနေကြကြောင်း အသက် ၄၀အရွယ် အမျိုးသားတစ်ဉီးက ဆိုသည်။

“ ဘဝကို ဟိုး အစကနေပြန်စရတော့မယ်။ အိမ်တွေလည်း ရေထဲပါသွားတယ်။ရှိတဲ့ မြေကွက်ကလည်း အကုန် မြေပြို ရေတိုက်စားနဲ့ မကျန်တော့ဘူး။ ဘဝက ဘာမှကို ကုန်းကောက်စရာ မကျန်တော့ဘူး။”ဟု ၎င်းက ထပ်လောင်းပြောသည်။

ယခုလက်ရှိတွင် ပြည်သူအများစုသည် ရန်ငြိမ်းအေးဘုန်းကြီးကျောင်း၊ မြို့မ ကျောင်း၊ သိမ်နောင်ကျောင်း၊ ဓမ္မစကြံာဘုန်းကြီးကျောင်းနှင့် အလယ်တန်းကျောင်းတို့တွင် ခိုလှုံနေရကြောင်းသိရသည်။

ယခုကဲ့သို့ ရေဘေးကြုံနေရသည်မှာ သျှမ်းပြည်နယ် အရှေ့ပိုင်းနှင့် တောင်ပိုင်းတွင် ပို၍ကြုံနေရပြီး မြန်မာတစ်နိုင်ငံလုံးအတိုင်းတာဖြင့် ကြုံတွေ့နေရကြောင်း သိရသည်။

အလုပ်သင် သတင်းထောက် နန်းလရောင် ရေးသားသည်။