သျှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသအတွင်း ရေမြင့်တက်မှု ဆိုးဝါးနေပြီး လက်ရှိတွင် အင်းလေးကန်အတွင်းရှိကျေးရွာများတွင် ရိက္ခာများပြတ်လပ်နေပြီး အကူအညီများစွာလိုအပ်နေကြောင်း ဒေသခံများထံမှသိရသည်။
ယနေ့ (စက်တင်ဘာလ ၁၆) အင်းလေးကန်တွင်းရှိကျေးရွာများတွင် ရိက္ခာများပြတ်လပ်နေပြီး စားနှပ်ရိက္ခာ အကူအညီများစွာ လိုအပ်နေကြောင်း အင်းပေါခုံကျေးရွာတွင်နေထိုင်သည့် အသက် ၂၀ကျော် အရွယ်ရှိ လူငယ်တစ်ဉီးက သျှမ်းသံတော်ဆင့်သို့ပြောသည်။
“၃ ရက်တွင်း ရေက ၁၁ ပေလောက်တက်၊ တစ်ထပ်အိမ်ဆို လုံးဝ အမြှုပ်ပဲ၊ ခုအကုန် ရိက္ခာပြတ်နေတာ ပိုက်ဆံရှိရင်တောင် ဘာမှဝယ်ဖို့မရှိဘူး၊ ကုန်စုံဆိုင်တွေလည်း အကုန်မြှုပ်ပြီးပစ္စည်းတွေအကုန်မျောပါသွားပြီ၊ ခုတချို့ဆို ခရမ်းချဉ်သီးပဲစားနေရတာတောင်ရှိတယ်” ဟု ၎င်းက ပြောသည်။
အင်းလေးဒေသအတွင်း ရေတက်ချိန် အလွန်မြန်ဆန်ပြီး စပါး၊ ကုန်ပစ္စည်းများ၊ ရက်ကန်းစင်များ၊ ရွှေ့ပြောင်းချိန်ပင်မရလိုက်ကြောင်း ၎င်းကဆိုသည်။
“ဒီလောက်ရေတက်မြန်မယ်မှန်းမသိတော့ ဘယ်သူမှ ပြင်ဆင်ချိန်မရလိုက်ဘူး၊ ဒီမှာက နှစ်ထပ်ရှိရင် အောက်ထပ်မှာ ယက်ကန်းစင်ထားတယ်၊ တချို့က စပါးတွေရိတ်ပြီး လှောင်ထားကြတယ်၊ ခု ယက်ကန်းစင်တွေ အကုန်ပျက်၊ စပါးတွေအကုန်မျော၊ ခရမ်းချဉ်သီးခင်းတွေလည်း အကုန်မျောသွားတာ” ဟု ခရမ်းချဉ်သီးစိုက်ပျိုးသည့် အမျိုးသားတစ်ဉီးက ထပ်လောင်းပြောသည်။
လက်ရှိတွင် အင်းလေးဒေသသို့ လာရောက်ကူညီသူများရှိသော်လည်း ကမ်းစပ်ရွာများတွင်သာလှူဒါန်းကြကြောင်း အင်းအတွင်းထဲရှိကျေးရွာများသို့ လာရောက်လှူဒါန်းပေးနိုင်ရန်လည်း မျှော်လင့်ကြောင်း ၎င်းအမျိုးသားက ပြောသည်။
ထို့အပြင် အင်းလေးကန်သည် ရေတက်ပြီးလျှင် ရေပြန်ကျရန် ၂ လမှ ၃ လခန့် အထိကြာမြင့်သောကြောင့် အင်းလေး ဒေသခံများမှာ ပို၍ကြပ်တည်းလာနိုင်ကြောင်း စက်လှေမောင်းလုပ်ကိုင်သူတစ်ဉီးက ပြောသည်။
“အင်းထဲမှာက ရေတက်ပြီးရင် သီတင်းကျွတ်ပြီးမှပဲရေပြန်ကျတာ၊ နှစ်တိုင်းအဲ့လိုပဲ ကျရင်လည်း ၃ လက်မ ၄ လက်မလောက်ပဲကျတာ၊ ပြီးတော့ ခုသွားဖို့လာဖို့တောင်ခက်နေပြီ စက်လှေတွေပါ မျောတဲ့အထဲပါသွားတာ၊ ဘယ်ရောက်သွားလဲတောင်မသိတော့ဘူး တချို့က အိမ်အောက်မှာထားတော့ စက်တွေပါမြုပ်သွားတာ” ဟု စက်လှေမောင်းလုပ်ငန်းလုပ်ကိုင်သည့် ဒေသခံတစ်ဦးကပြောသည်။
အလားတူ ညောင်ရွှေမြို့ပေါ်တွင်လည်း မြို့တဝက်ခန့် ရေနှစ်မြုပ်ခဲ့ပြီး ခရမ်းချဉ်သီးပွဲရုံများတွင် ခရမ်းချဉ်သီး ပိဿာထောင်နှင့်ချီ ဆုံးရှုံးခဲ့ရကြောင်း သိရသည်။
အင်းလေးကန်တွင်းသို့ စီးဝင်နေသည့် ရေလမ်းကြောင်းများစွာရှိပြီး အင်းလေးကန်မှ ရေပြန်ထွက်ရန် ဘီလူးချောင်း မိုးဗြဲရေကာတာ တစ်ခုသာရှိသောကြောင့် မိုးဗြဲရေကာတာဖွင့်ချလိုက်လျှင် ကရင်နီဒေသတွင် ရေကြီးမှုအန္တရာယ််လည်း စိုးရိမ်နေရကြောင်းလည်းသိရသည်။
အင်းလေးဒေသတွင် ကျေးရွာအုပ်စု ၃၅ အုပ်စု၊ ကျေးရွာပေါင်း ၄၄၅ ရွာရှိပြီး ထိုအထဲမှ ကျေးရွာ ၁၇၁ ရွာ ရေနစ်မြုပ်နေခြင်းဖြစ်သည်။
လက်ရှိတွင် ဖုန်လိုင်းမရခြင်း၊ လျှပ်စစ်မီးမရခြင်းကြောင့် ဆက်သွယ်ရန်နှင့် ချက်ပြုတ်စားသောက်ရန် အခက်အခဲရှိပြီး စားစားစရာများ၊ သောက်သုံးရေ၊ အခြေခံဆေးဝါး၊ အမျိုးသမီးလစဉ်သုံးပစ္စည်းများ အရေးပေါ် လိုအပ်နေကြောင်း ကူညီပေးနေသူတွေဆီကသိရသည်။
တိုင်ဖွန်းမုန်တိုင်းယာဂီ အရှိန်ကြောင့် မြန်မာနိုင်ငံတဝန်း မိုးသည်းထန်စွာရွာသွန်းခဲ့ပြီး ရေကြီးရေလျှံမှုကြောင့် နေရာအနှံ့ရေဘေးရှောင်နေရကာ အချို့နေရာများတွင်မြေပြိုမှုများလည်းဖြစ်ပွားနေသည်။
စစ်ကောင်စီ၏ ထိုးစစ်ဆင်မှုများကြောင့် ကရင်နီပြည်မှ အင်းလေးဒေသသို့ စစ်ဘေးရှောင်နေရသည့် စစ်ဘေးရှောင်ပြည်သူများမှာလည်း စစ်ဘေးအပြင် ရေကြီးမှုကြောင့် အခက်အခဲများစွာကြုံတွေ့လာရပြီး အချို့နေရာများတွင် လူသေဆုံးမှုများပါရှိနေကြောင်းလည်း ကြားသိရသည်။
အလုပ်သင် သတင်းထောက် ယူဂျင်း ရေးသားသည်။
