သျှမ်းပြည်မြောက်ပိုင်း သီပေါမြို့တောင်ရပ်ကွက်ကို ယနေ့ (စက်တင်ဘာ ၁၆)ရက် နံနက် ၉နာရီကျော်၌ စစ်ကောင်စီက လေကြောင်းဖြင့် ဗုံးကြဲတိုက်ခိုက်ခဲ့မှုကြောင့် အရပ်သား ၁ ဦးသေဆုံးသွားကြောင်း စုံစမ်းသိရှိရသည်။
သီပေါမြို့ တောင်ရပ်ကွက် ယနေ့ (စက်တင်ဘာ ၁၆) ရက် နံနက် ၉ နာရီကျော်တွင် စစ်ကောင်စီက လေကြောင်းဖြင့် ဗုံးကြဲခဲ့သဖြင့် နေအိမ် ၂ လုံးထိခိုက်ပျက်စီးပြီး၊ အရပ်သားတစ်ဦးသေဆုံးခဲ့ကြောင်း ဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။
“ ဒီနေ့ မနက် ဗုံးကြဲတော့ တစ်ယောက် ထိခိုက်ပြီး သေဆုံးသွားတာ။ သားအမိ ၂ယောက် စက်ဘီးစီးလာရင်းနဲ့ ထိတာ။ အဲ့ထဲက တစ်ယောက်သေတယ်။ အိမ်နှစ်လုံးလည်း ထိတယ်” ဟု ဒေသခံအမျိုးသမီး က ပြောသည်။
အလားတူ ယမန်နေ့ (စက်တင်ဘာ ၁၅)ရက် ညပိုင်းတွင်လည်း သီပေါမြို့ကို စစ်ကောင်စီဘက်မှ လေကြောင်းဖြင့် ဗုံးကြဲခဲ့ရာ နေအိမ်တစ်လုံး မီးလောင်မှုဖြစ်ပွားခဲ့ကြောင်း သိရသည်။
စစ်ကောင်စီက ညီနောင်မဟာမိတ်တွေကို နိုင်ငံတော်မှ အကြမ်းဖက်အုပ်စုများဟု ကြေညာပြီးနောက်ပိုင်းတွင် လေကြောင်းဖြင့် နေ့စဉ် ပြန်လည်တိုက်ခိုက်နေသည်။
ထို့ပြင် စက်တင်ဘာ ၁၅ရက် နှင့် စက်တင်ဘာ ၁၃ရက် တွင် ည ၇နာရီတွင်လည်း လားရှိုးမြို့နယ် နမ့်ပေါင်ကို စစ်ကောင်စီက လေကြောင်းနှင့် ဗုံးကြဲခဲ့ကြောင်းသိရသည်။
“မနေ့ညကလည်း နမ့်ပေါင်ကို ထပ်လာကြဲတယ်။ လူထိခိုက်မှုတော့မရှိဘူး။ နမ့်ပေါင်ကို လေကြောင်းနဲ့ဗုံးကြဲတာ ၂ခါရှိပြီ။ အခုထိလည်း လားရှိုးမှာ သေနတ်သံကြားနေရတုန်းပဲ” ဟု လားရှိုးမြို့ ဒေသခံအမျိုးသားက ဆိုသည်။
လာမည့် စက်တင်ဘာ ၁၇ရက်သည် တရုတ်လမုန့်စားပွဲဖြစ်သည့်အလျောက် စစ်ကောင်စီဘက်မှ ကိုးကန့်တပ်ဖွဲ့ (MNDAA) ထိန်းချုပ်သည့် ဒေသကို လေကြောင်းဗုံးကြဲမှု ပြုလုပ်မည်ကို လားရှိုးမြို့ ဒေသခံများက စိုးရိမ်နေကြသည်။
“ဒီနေ့လည်း အသံတွေတော့ကြားရတယ်။ ပြီးတော့ မနက်ဖြန်က တရုတ်လမုန့်စားပွဲရှိတယ်လေ။ ဒါကြောင့် ဒီညဗုံးလာကြဲမှာလည်း ကြောက်နေရတယ်” လို့ လားရှိုးဒေသခံအမျိုးသမီးက ဆိုသည်၊
ယခု သျှမ်းပြည်မြောက်ပိုင်းမှာ စစ်ကောင်စီက လေကြောင်းနှင့် ဗုံးကြဲတိုက်ခိုက်နေသော်လည်း ဒေသခံတစ်ချို့က ငွေကြေးအခက်ခဲကြောင့် မရှောင်ပြေးနိုင်တော့ကြောင်း သိရသည်။
“ စစ်ဘေးလည်းမရှောင်နိုင်တော့ဘူး။ ရှောင်ရင်လည်း ပိုက်ဆံကုန်တယ်။ အလုပ်မရှိတော့ ဝင်ငွေလည်းမရှိဘူး။ လေယာဉ်သံကြားရင်လည်း ရေချိုးခန်းထဲဝင်ပုန်းနေလိုက်တယ်။ တချို့လည်း RC တိုက်အိမ်တွေမှာ သွားစုပြီးတော့ အိပ်ကြတာပေါ့။ တစ်ချို့လည်း ဗုံးခိုကျဉ်းတူးပြီးတော့ နေရတာပေါ့” ဟု အထက်ပါအမျိုးသမီးက ပြောသည်။
၁၀၂၇ စစ်ဆင်ရေး အတွင်း ညီနောင်မဟာမိတ်တွေ ထိန်းချုပ်နိုင်သည့်ဒေသတွေကိုလည်း စစ်ကောင်စီက လက်မလွတ်ပဲ ပြန်ထိုးစစ်ဆင်နေသည့်အတွက်ကြောင့် တိုက်ပွဲတစ်ဖန်ပြန်ပြင်းထန်လာနိုင်ကြောင်း စစ်ရေးလေ့လာသုံးသပ်သူတွေက ပြောကြသည်။
