သျှမ်း-ကရင်နီ (ကယား) ပြည်နယ်စပ်ဒေတွင် ကရင်နီတော်လှန်ရေးအင်အားစုများက စစ်ဆင်ရေးတစ်ခု ဖော်ဆောင်ပြီး စစ်ကောင်စီတပ်စခန်းအား တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃၀ ဦးသေဆုံးခဲ့ကြောင်း Loikaw Local PDF က ယနေ့ (စက်တင်ဘာလ ၁၅) ရက်တွင် ထုတ်ပြန်ခဲ့သည်။
ပြီးခဲ့သည့် စက်တင်ဘာလ ၅ ရက်မှစ၍ လွိုင်ကော်ဒေသခံ ပြည်သူ့ကာကွယ်ရေးတပ် Loikaw Local PDF၊ Loikaw PDF၊ KNDF၊ KNPLF နှင့် ရှမ်းတောင်အခြေစိုက်တပ် အသီးသီးတို့က ပူးပေါင်း၍ သျှမ်း-ကယားနယ်စပ် စစ်ဆင်ရေးတစ်ခု ဖော်ဆောင်ခဲ့သည်ဟု ထုတ်ပြန်ချက်တွင် ဖော်ပြထားသည်။
ထို့နောက် စစ်ကောင်စီတပ်များ စိုးမိုးထားသော တပ်၊ ရဲစခန်း၊ စခန်းကုန်းများအား တိုက်ခိုက်ခဲ့ပြီး စစ်ကောင်စီဘက်မှ သေဆုံးမှု (၃၀) ဦး ရှိကြောင်း၊ စစ်ကောင်စီတပ်သား ၃ ဦးနှင့်အတူ လက်နက် အများအပြား ဖမ်းဆီး၊သိမ်းဆည်းထားနိုင်ခဲ့ကြောင်း ဆိုသည်။
ထိုစစ်ဆင်ရေးအတွင်း စစ်ကောင်စီဘက်က လေကြောင်း၊ ဒရုန်း၊ လက်နက်ကြီး အမြောက်အများစွာ ပစ်ခတ်ခဲ့၍ Loikaw Local PDF မှ ရဲဘော် ၃ ဦးထိခိုက်ဒဏ်ရာရှိခဲ့ပြီး ရဲဘော် ၁ ဦး စိုးရိမ်ရကြောင်း ထုတ်ပြန်ချက်၌ ဖော်ပြထားသည်။
အလားတူ KNDF၊ KNPDF နှင့် ရှမ်းတောင် အခြေစိုက်တပ်ဖွဲ့မှလည်း ထိခိုက်ကျဆုံးမှုရှိခဲ့သည်ဟု ဆိုသည်။
