ရေဘေးဒဏ် ဆိုးဝါးစွာ ကြုံတွေ့နေရသည့် နေပြည်တော်တွင် ပါတီ ဥက္ကဌ ဦးခင်ရီ ရေဘေးသင့် ပြည်သူများအား သွားရောက် တွေ့ဆုံ၍ ခေါက်ဆွဲခြောက်နှင့် ရေသန့်ဗူးများ ထောက်ပံ့ခဲ့ကြောင်း ကြံ့ခိုင်ရေးပါတီက ယနေ့ (စက်တင်ဘာလ ၁၂ ရက်) တွင် ထုတ်ပြန်သည်။
ပုဗ္ပသီရိမြို့နယ်၊ အောင်ပန်းကျေးရွာ၊ ကျည်ထောင်ကန်အမှတ်(၁)ရပ်ကွက်၊ စျေးကုန်း ဘုန်းတော်ကျောင်း၊ ကျည်ထောင်ကန်အမှတ် (၃)ရပ်ကွက်၊ မြို့မ ဘုန်းတော်ကြီးကျောင်း တို့တွင် ခိုလှုံနေသော ပြည်သူများထံသို့ သွားရောက်၍ ခေါက်ဆွဲခြောက်နှင့် ရေသန့်ဗူးများ လှူဒါန်းခဲ့ကြောင်း ဆိုသည်။
“ခေါက်ဆွဲခြောက်က တယောက်ကို ၂ ထုတ်။ ရေသန့်ကတယောက်တဗူး ပေးပြီးတော့ ဓာတ်ပုံရိုက်တာပေါ့ဗျာ။ သူ (ဦးခင်ရီ) သွားတဲ့နေရာတွေက ပါတီဌာနချုပ် အမာခံရွာတွေ။ နောက်ရက် ဆေးလာကုပေးမယ် ဘာညာတွေ ပြောတာပေါ့” ဟု ကြံ့ခိုင်ရေးပါတီနှင့် နီးစပ်သူ တဦးက ပြောသည်။
နေပြည်တော် ရေးဘေးကိစ္စ ကြံ့ခိုင်ရေးပါတီက ကူညီခြင်းမပြုဘဲ ရေကျချိန်မှသာ ဟန်ပြကူညီ ဓာတ်ပုံရိုက်မည်ဟု ယူဆကြောင်း ယမန်နေ့က စစ်တပ် ဝါဒဖြန့် တယ်လီဂရမ်များတွင် ဝေဖန်ရေးသားပြီးနောက် ယနေ့ နံနက် ကြံ့ခိုင်ရေးပါတီ ဥက္ကဌ ဦးဆောင်သည့် ပါတီထိပ်ပိုင်း ခေါင်းဆောင်များ၏ ခေါက်ဆွဲခြောက် ခရီးစဉ် ဓာတ်ပံုများ ထွက်ပေါ်လာခြင်း ဖြစ်သည်။
ကြံ့ခိုင်ရေးပါတီက ယနေ့ညပိုင်း ထုတ်ပြန်သည့် ရုပ်သံတွင် ပါတီဥက္ကဌ ဦးခင်ရီ စီးနင်းလာသည့် လန်ခရူဇာ ကားနက်ကြီးပါသည့် ယာဥ်တန်းကို တွေ့ရပြီး ရေဘေးသင့် ပြည်သူ ခေါင်းစဥ်တပ်ထားသည့် နေအိမ်တချို့ရှေ့တွင် ခေါက်ဆွဲခြောက် ပေးနေသည်ကို ဖော်ပြထား သကဲ့သို့ ဘုန်းကြီးကျောင်းတွင် ခိုလှုံနေသည့် ပြည်သူများနှင့် စကားပြောနေပုံများကိုလည်း ဖော်ပြထားသည်ကို တွေ့ရသည်။
စစ်တပ်၏ လက်ကိုင်တုတ် ပါတီဖြစ်သည့် ကြံ့ခိုင်ရေးပါတီသည် အစဥ်အဆက် ပြည်သူလူထုကို ထိထိရောက်ရောက် ကူညီလေ့မရှိဘဲ ဝါဒဖြန့် ဓာတ်ပုံရိုက်ရန်သာ ဟန်ပြ ကူညီလေ့ရှိသည့် ပါတီ အဖြစ် သတင်းကြီးသည်။
ရဲချုပ်ဟောင်းဖြစ်သူ ဦးခင်ရီ သည် စစ်တပ် အာဏာသိမ်းရန် စစ်ခေါင်းဆောင် မင်းအောင်လှိုင် ကို အစဥ်တစိုက် တိုက်တွန်းခဲ့သူဖြစ်ပြီး လက်ရှိ စစ်တပ် အကောင်အထည်ဖော်နေသည့် ပြည်သူ့လုံခြုံရေးစနစ် အတွက် ကူညီပေးနေသူလည်း ဖြစ်သည်။
ယခင် နအဖ စစ်အစိုးရလက်ထက် ရဲချုပ်တာဝန်ယုခဲ့စဥ်က ရန်ကုန် လူမိုက်ဂိုဏ်း အသိုင်းအဝိုင်းကြားတွင် လူမိုက်ခင်ရီ အဖြစ် နာမည်ကျော်သူ ပါတီဥက္ကဌကြီးသည် ဗစ်တိုးရီးယား အမှု အဖြစ် နာမည်ကျော်သည့် သက်ငယ်မုဒိန်းမှု ဖြစ်ပွားခဲ့ရာ ကျောင်း၏ နောက်ကွယ်က ပိုင်ရှင်လည်း ဖြစ်သည်။
