သျှမ်းတောင် လေတပ် အခြေစိုက် စခန်းနှင့် စစ်တိုင်း တည်ရှိရာ နမ့်စန်မြို့နယ်တွင် ကြံ့ခိုင်ရေးပါတီ အနိုင်ရရေး အတွက် စစ်တိုင်းမှူး ကိုယ်တိုင် ကွင်းဆင်း ဖိအားပေးနေသည်ဟု ဒေသခံများက ယနေ့ ဒီဇင်ဘာလ ၂၇ ရက်နေ့တွင် ပြောသည်။

စစ်ကောင်စီ အရှေ့အလယ်ပိုင်းတိုင်း စစ်ဌာနချုပ် အခြေစိုက်ရာ ခိုလမ်မြို့သည် နမ့်စမ်မြို့နယ် အတွင်း ပါဝင်ပြီး ကြံ့ခိုင်ရေးပါတီ အနိုင်ရရေး စစ်တိုင်းမှူး ဗိုလ်ချုပ်စိုးမြတ်ထွဋ် ကိုယ်တိုင် မဲရုံများကို စစ်ဆေးသည်ဟု ဆိုကာ ဖိအားပေးနေသည်ဟု ဒေသခံများက ဆိုသည်။

“ဒီနေ့မနက် မြို့ပေါ်ကော ရွာဘက်တွေကော တိုင်းမှူး မဲရုံစစ်တယ် ကြားတယ်။ ဌာနဆိုင်ရာတွေ မြို့ထဲမှာ မဲပေးဖို့ လိုက်ပြောနေတာရှိတယ်။ မနေ့က ကြိုတင်မဲ ရေတာတော့ ကြံခိုင်ရေးက အကုန်နိုင်တယ် ကြားတာပဲ။ စာရင်း အတိအကျတော့ မသိဘူး” ဟု မြို့ခံ တဦးက ဆိုသည်။

ရွေးကောက်ပွဲ ဥပဒေအရ ယနေ့သည် နိုင်ငံရေးပါတီများ စည်းရုံးမဲဆွယ်ခွင့် မရှိတော့သည့်နေ့ဖြစ်သည့် နည်းတူ လက်နက်ကိုင် အဖွဲ့အစည်းများ အနေဖြင့် မဲရုံများအပေါ် ဖိအားပေးသည့် သဘော မသက်ရောက်သည့် အကွာအဝေးမှသာ လုံခြုံရေး ဆောင်ရွက်ရမည် ဖြစ်သော်လည်း စစ်တိုင်းမှူးက စစ်ဝတ်ပြည့် ဝတ်ဆင်ကာ လက်နက် အပြည့်အစုံဖြင့်ယခုကဲ့သို့ မဲရုံများကို လှည့်လည် စစ်ဆေးနေခြင်း ဖြစ်သည်။

“အရပ်သား အစိုးရလက်ထက်က ကော်မရှင် ဆိုရင်တော့ ဒီလိုတွေ ဘယ်ဖြစ်မလဲ။ ခုလိုနေ့ Silent day မှာ စစ်တိုင်းမှူး စစ်ဝတ်စုံနဲ့ လက်နက်တွေနဲ့ မဲရုံတွေ ဝင်စစ်တယ်ဆိုတာ ရွေးကော် ဥပဒေအရ ဆိုရင် ငြိတာပေါ့။ နောက်တခုက ဒီနေ့မှာ ဌာနဆိုင်ရာတွေက မဲသွားပေးဖို့ ကမ်ပိန်းလုပ်တယ် ဆိုတော့ ဒါလည်း ခြိမ်းခြောက်တာပဲပေါ့။ ခုကတော့ စစ်တပ်ကလုပ်တဲ့ ရွေးကောက်ပွဲကို စစ်တိုင်းမှူး ဝင်စစ်တယ် ဆိုတော့လည်း ဘာပြောလို့ရမလဲ” ဟု ရွေးကောက်ပွဲများအား စောင့်ကြည့်လေ့လာခဲ့သူ တဦးက မှတ်ချက်ပြုသည်။

နမ့်စန်မြို့နယ်တွင် ကြံ့ခိုင်ရေးပါတီ၊ ကျားဖြူပါတီ၊ PNO ပအိုဝ်းပြည်သူ့စစ်ပါတီ၊ တစည ပါတီနှင့် PPP ပါတီတို့ ဝင်ရောက် ယှဥ်ပြိုင်နေပြီး စစ်ကောင်စီ လေတပ်နှင့် တိုင်းစစ်ဌာနချုပ် အခြေစိုက်သည့် မြို့နယ် ဖြစ်သဖြင့် ကြံ့ခိုင်ရေး ပါတီသာ အနိုင်ရမည်ဟု ဒေသခံများက သုံးသပ်ထားသည်။

နမ့်စန်မြို့နှင့် ခိုလမ်မြို့ အပါအဝင် မြို့နယ် အတွင်း ရပ်ကွက် (၁၁) ခု၊ ကျေးရွာအုပ်စု (၂၀) ရှိပြီး မဲပေးပိုင်ခွင့်ရှိသူ စုစုပေါင်း ၈၇,၄၉၁ ဦးနှင့် မဲရုံ ၇၈ ရုံရှိကြောင်း မြို့နယ် စစ်တပ် ရွေးကောက်ပွဲ ကော်မရှင်က ထုတ်ပြန်ထားသည်။