စစ်တပ်နှင့် အရပ်ဘက် စီးပွားရေးနှင့် ပတ်သက်၍ ရာထူးများစွာ ရယူထားသည့် ဒုတိယဗိုလ်ချုပ်ကြီးညိုစော အပါအဝင် ကြံ့ခိုင်ရေးပါတီ ခေါင်းဆောင်ပိုင်း အချို့ကို စစ်ခေါင်းဆောင် မင်းအောင်လှိုင် အမိန့်ဖြင့် စစ်ဆေးနေသည်ဟု နေပြည်တော် သတင်းရင်းမြစ် ၂ ခုက ယနေ့ (ဧပြီလ ၁၂ ရက်နေ့) တွင် သျှမ်းသံတော်ဆင့်ကိုပြောသည်။

ပြီးခဲ့သည့် ဧပြီလ ၉ ရက်နေ့ နံနက်ပိုင်းက လယ်ယာစိုက်ပျိုးရေးနှင့် ဆည်မြောင်းဝန်ကြီးဟောင်း ဦးမြင့်လှိုင် အကတိလိုက်စားမှုဖြင့် ဖမ်းဆီး အမှုဖွင့်ခံရပြီးနောက် စစ်ခေါင်းဆောင်၏ အချစ်တော် ဒုတိယဗိုလ်ချုပ်ကြီးညိုစောနှင့် ကြံ့ခိုင်ရေးပါတီ ခေါင်းဆောင်ပိုင်း အချို့ ဖမ်းဆီးစစ်ဆေးခံနေရသည့် သတင်း ထွက်ပေါ်လာခြင်း ဖြစ်သည်။

“စစ်ဆေးနေတာပါ။ အမှုဖွင့် ဖမ်းဆီးတာတော့ မရှိသေးပါဘူး။ ဘာကြောင့် စစ်ဆေးနေတယ်ဆိုတာ ပြောဖို့ စောပါသေးတယ်။ ကြံ့ခိုင်ရေးကို ပြောင်းသွားတဲ့ ဒုတိယဗိုလ်ချုပ်ကြီး တစ်ဥ◌ီးလည်းပါတယ်။ တခြားလူတွေလည်းပါတယ်” ဟု နေပြည်တော် သတင်းရင်းမြစ်က အတည်ပြုပြောသည်။

၂၀၂၂ ခုနှစ် အောက်တိုဘာလ အတွင်းက ပြည်ထဲရေး ဒုဝန်ကြီးအဖြစ်မှ ထုတ်ပယ်ခံရပြီး ကြံ့ခိုင်ရေးပါတီ နိုင်ငံခြားရေးတာဝန်ခံ အဖြစ် တာဝန်ယူထားသည့် ဒုတိယဗိုလ်ချုပ်ကြီးအောင်စိုး နှင့် ပါတီထိပ်ပိုင်း သဘောထား တင်းမာသည့် အုပ်စုကို ဖမ်းဆီး စစ်ဆေးနေသည်ဟု သတင်းကြားရကြောင်း နေပြည်တော် ကြံ့ခိုင်ရေး သတင်းရင်းမြစ်က ပြောသည်။

“ဒုတိယဗိုလ်ချုပ်ကြီး အောင်စိုး လို့ ကြားပါတယ်။ တခြားလူတွေကော သတင်းကြားတယ်ဗျ။ စစ်တာပါ၊ ဖမ်းတာ မဟုတ်ပါဘူး” ဟု ၎င်းကဆိုသည်။

စစ်ခေါင်းဆောင်းက စီးပွားရေးနှင့် ပတ်သက်၍ စစ်ဘက် အရပ်ဘက် ရာထူးပေါင်းများစွာ ပေးအပ်ခံထားရပြီး အယုံကြည်ရဆုံးလူ အဖြစ် သတ်မှတ်ခံထားရသည့် ဒုတိယဗိုလ်ချုပ်ကြီးညိုစော အနေဖြင့် တိုင်ကြားခံရမှုကြောင့် စစ်ဆေးခံနေရပြီး မကြာမီ ပြန်လည် လွတ်မြောက်မည်ဟု နေပြည်တော် သတင်းရင်းမြစ်က သုံးသပ်သည်။

နေပြည်တော်ရှိ ဦးမြင့်လှိုင် ၏ နေအိမ်ကို ဝင်ရောက်စီးနင်း ဖမ်းဆီးရာတွင် တရုတ်နိုင်ငံသားဟု ယူဆရသူ အချို့ပါ ဖမ်းမိသည့် အတွက် အခြအနေ ရှုပ်ထွေးနေကြောင်း ၎င်းက ထပ်လောင်းပြောသည်။

“(ဒုတိယဗိုလ်ချုပ်ကြီးညိုစော) အတိုင်ခံရလို့ စစ်ဆေးတယ်ဆိုတဲ့ သဘောပါ။ စောင့်ကြည့်ရမှာပေါ့။ အခြအနေတွေက ရှုပ်ထွေးနေတယ်” ဟု ၎င်းကသုံးသပ်သည်။

ယခုရက်ပိုင်း အတွင်း တရုတ်နိုင်ငံဘက်မှ ကျားဖြန့်နှင့် ပတ်သက်၍ နေပြည်တော် စစ်ကောင်စီကို ဆက်တိုက် ဖိအားပေးနေချိန်တွင် နေပြည်တော်၌ ဖမ်းဆီးမှုများ ပေါ်ပေါက်လာခြင်း ဖြစ်သည်။

ပြီးခဲ့သည့် ဧပြီလ ပထမ အပတ်က ပြည်ထဲရေး ဒုဝန်ကြီး ဗိုလ်ချုပ်အောင်လင်းထွန်း ဖမ်းဆီးခံခဲ့ရပြီးနောက် ယခုကဲ့သို့ နေပြည်တော် ဖမ်းဆီး စစ်ဆေးမှုများ ဆက်တိုက် ဖြစ်ပေါ်လာခြင်း ဖြစ်သည်။