သျှမ်းပြည် မြောက်ပိုင်းရှိ မြို့များတွင် စစ်ကောင်စီတပ်မှ လေယာဉ်ဖြင့် ဗုံးကြဲတိုက်ခိုက်ပြီးနောက် ဒေသခံများ မြို့အတွင်း၌ မအိပ်ရဲတော့ဘဲ ညအိပ်ချိန်ကို နီးစပ်ရာ ကျေးရွာများသို့ ရှောင်တိမ်းနေကြောင်း သတင်းရရှိသည်။
စစ်ကောင်စီတပ်မှ နမ့်ခမ်းမြို့ပေါ်သို့ ပြီးခဲ့သည့် စက်တင်ဘာ ၆ ရက်က လေကြောင်းဖြင့် ဗုံးကြဲတိုက်ခိုက်ပြီးနောက် ဒေသခံများသည် ထပ်မံ ဗုံးကြဲတိုက်ခိုက်ခံရမည်ကို စိုးရိမ်သဖြင့် ညအချိန်တွင် နီးစပ်ရာ ကျေးရွာများသို့ ပြောင်းရွှေ့ နေထိုင်ကြကြောင်း နမ့်ခမ်းမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“နမ့်ခမ်းမှာက ဒေသခံတွေက ညညတွေဆို မအိပ်ရဲကြဘူး။ မြို့နဲ့ နီးတဲ့နေရာ အရမ်းမဝေးတဲ့ နေရာတွေမှာပဲ သွားအိပ်ကြတာပါ။ တချို့ တွေကလည်း သက်ကြီးရွယ်အိုတွေအတွက် အရမ်း စိုးရိမ်ပြီး ထွက်ပြေးနေတာ ရှိတယ်။ ကျနော်တို့လည်း ညတွေဆို တခြားနေရာမှာ သွားအိပ်ရတယ်”ဟု နမ့်ခမ်းမြို့ ဒေသခံအမျိုးသားတစ်ဦး ကပြောသည်။
ယခင်က စစ်ကောင်စီ၏ လက်အောက်ခံ ဌာနဆိုင်ရာရုံးများတွင် TNLA စစ်သားများ ဝင်ရောက်နေထိုင် နေသည့်အတွက် ထိုနေရာများနှင့် နီးသည့် ဒေသခံအများစုသည် နီးစပ်ရာ ကျေးရွာများတွင် ထွက်ပြေးတိမ်းရှောင် နေကြကြောင်း ၎င်းက ဆက်ဆိုသည်။
အလားတူ လားရှိုးမြို့ကို စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ပြီးနောက် ဒေသခံများသည် ည အချိန်တွင် နီးစပ်ရာ ခိုင်ခန့်သည့် အဆောက်အဦးများ နှင့် ကျောင်းဆောင်များတွင် ပြောင်းရွေ့ နေထိုင်ကြကြောင်း လားရှိုးမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဘုန်းကြီးကျောင်းတွေ တိုက်မြင့်တွေမှာပဲ အိပ်ကြတယ်။ လေယာဉ်နဲ့ ဗုံးကြဲပြီးကတည်းက အဲ့လိုတွေ လိုက် အိပ်နေကြတာ။ တချို့ အဆင်မပြေတဲ့အိမ်တွေကတော့ ဆွေမျိုး အိမ်တွေစီမှာ ပြောင်းအိပ်ကြရတာပေါ့။ ရွာတွေမှာ လိုက်အိပ်တာမျိုးတော့ မရှိဘူး”ဟု လားရှိုးမြို့ ဒေသခံ အမျိုးသားတစ်ဦးက ပြောသည်။
ထိုပြင် စစ်ကောင်စီမှ လားရှိုးမြို့ကို လေကြောင်းဖြင့် ဗုံးကြဲတိုက်ခိုက်ခဲ့ပြီးနောက် ဒေသခံများ စက်တင်ဘာလ ပထမပတ်အတွင်းတွင် သျှမ်းပြည် တောင်ပိုင်းသို့ ပြန်လည် ထွက်ပြေးတိမ်းရှောင်သူများလည်း ရှိနေကြောင်း ၎င်းက ဆက်ပြောသည်။
ညီနောက်မဟာမိတ်တို့ ထိန်းချုပ်ထားသည့် လားရှိုး၊ သိန္နီ နှင့် နမ့်ခမ်းမြို့တို့ကို စစ်ကောင်စီက မကြာခဏဆိုသလို လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ကိုယ်ဝန်ဆောင်မိခင်၊ ကလေးငယ်များ အပါအဝင် ၂၀ ဦးထပ် မနည်း သေဆုံးမှုရှိနေကြောင်း သိရသည်။
လက်ရှိလားရှိုးမြို့ပေါ်တွင် တိုက်ပွဲများ ငြိမ်သက်လျှက် ရှိသော်လည်း စစ်ကောင်စီမှ ယခုရက်ပိုင်းအတွင်း လေကြောင်းမှတစ်ဆင့် မကြာခဏ လာရောက်ဗုံးကြဲနေကြောင်း သိရသည်။
သျှမ်းပြည်မြောက်ပိုင်း တိုက်ပွဲများတွင် ရှုံးနိမ့်မှုနှင့် နယ်မြေဆုံးရှုံးမှု ရင်ဆိုင်နေရသည့် စစ်ကောင်စီသည် ညီနောင်မဟာမိတ်တပ်များကို စက်တင်ဘာလ ၂ ရက်တွင် အကြမ်းဖက်အဖွဲ့များအဖြစ် ကြေညာခဲ့သည်။
Leave a Comments