သျှမ်းပြည်တောင်ပိုင်း၊ မြို့နယ်များတွင် ရေကြီးမှုများဖြစ်ပေါ်နေပြီး ဖုန်းလိုင်းများပါပြတ်တောက်နေကြောင်း သိရသည်။
ယနေ့ (စက်တင်ဘာလ ၁၁ )ရက် တွင် သျှမ်းပြည်တောင်ပိုင်း တောင်ကြီး၊ ညောင်ရွှေ၊ ရွှေညောင်၊ အောင်ပန်း ၊ကလော အစရှိသည့်မြို့များတွင်ရေကြီးမှုများဆက်တိုက်ဖြစ်ပေါ်နေပြီး ဖုန်းလိုင်းပါပါပြတ်တောက်နေကာ အခက်အခဲများတွေ့နေရကြောင်း ညောင်ရွှေမြို့ဒေသခံတစ်ဦးကပြောသည်။
“ဆိုင်လည်း ရေမြှုပ်လို့ ပြောင်းရွှေ့ဖို့ ပြင်နေတာ ဖုန်းလိုင်းကလည်း MPT တမျိုးပဲဆက်လို့ရတယ်၊ အရေးပေါ်ရွှေ့ဖို့ ပြောင်းဖို့ လိုတာကို ဆက်သွယ်လို့ မရလို့ တော်တော် အခက်တွေ့နေရတယ်၊ wifi ကတော့ ရနေသေးတယ်” ဟု ၎င်းကပြောသည်။
ထိုအပြင် ရွှေညောင်မြို့တွင်လည်း ရေတက်လာသောကြောင့် ပိတ်မိနေသူများလည်းရှိလာပြီး အကူအညီများလိုအပ်နေကြောင်းလည်းသိရသည်။
“ မနက်ကရေတက်လို့ ပိတ်မိနေတယ် ကူညီပေးပါဆိုပြီး လိုင်းပေါ်ဖုန်းနံပါတ်နဲ့တင်လာတာတွေ့တော့ နေရာမေးဖို့ ဖုန်းဆက်တာတောင် ဖုန်းလိုင်းကမရလို့ ဆက်မရတော့ဘူး” ဟု လူမှုကူညီရေးလုပ်ဆောင်နေသူတစ်ဦးက သျှမ်းသံတော်ဆင့်သို့ပြောသည်။
အလားတူ တောင်ကြီးမြို့ပေါ်ရပ်ကွက်အချို့တွင် မိုးအဆက်မပြတ်ရွာသွန်းပြီး ရေကြီးရေလျှံကာ အချို့နေရာများတွင် မြေသားများပါ နိမ့်ဆင်းလာမှုများပါရှိနေကြောင်း ဘုရားဖြူရပ်ကွက်တွင်နေထိုင်သည့် ဒေသခံတစ်ဦးထံမှ သိရသည်။
“မနက်က ရပ်ကွက်ထပ်က တချို့အိမ်တွေထဲမှာ ကားတွေကိုတောင် ကရိန်းနဲ့ မထုတ်ပြီးရွေ့ရတယ်လို့ကြားတယ်၊ မြေသားပျော့ပြီး နိမ့်ဆင်းသွားတာတွေပါဖြစ်နေတယ်” ဟု သူကပြောသည်။
တောင်ကြီးမြို့ပေါ် ကံသာရပ်ကွက်အတွင်းတွင်လည်း မြေပြိုမှုများဆက်တိုက်ဖြစ်ပေါ်နေပြီး အန္တရာယ်ရှိသောနေရာများမှ ပြည်သူများလည်း ရွေ့ပြောင်းနေရကြောင်းသိရသည်။
ယနေ့ စက်တင်ဘာလ ၁၁ ရက်နေ့အတွင်း သျှမ်းပြည်တွင်းသာမက မြန်မာနိုင်ငံအနှံ့အပြားရေကြီးမှုများဆက်တိုက်ဖြစ်ပေါ်နေပြီး အကူအညီများစွာလိုအပ်နေကြသည်။
လက်ရှိတွင် စစ်ကောင်စီနှင့် တိုင်းရင်းသားလက်နက်ကိုင်တပ်ဖွဲ့များ၊ တော်လှန်ရေးတပ်ဖွဲ့များကြား ဖြစ်ပွားနေသောတိုက်ပွဲများကြောင့် စစ်ဘေးရှောင်နေကြရသောပြည်သူများမှာ စစ်ဘေးသာမက ရေဘေးအန္တရာယ်ပါကြုံတွေ့နေရပြီး အခက်အခဲများစွာကြုံတွေ့နေရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments