သျှမ်းပြည်နယ်မြောက်ပိုင်း၊ လားရှိုးမြို့တွင် စစ်ကောင်စီ၏ လေကြောင်းတိုက်ခိုက်မှုများကြောင့် ဒေသခံများ ပြန်လည် တိမ်းရှောင်နေရကြောင်း သတင်းရရှိသည်။
ပြီးခဲ့သည့် စက်တင်ဘာလ ၈ ရက်မှ ၉ ရက်နေ့အထိ ကိုးကန့် တပ်မတော် (MNDAA) ထိန်းချုပ်ထားသည့် လားရှိုးမြို့တွင် စစ်ကောင်စီမှ လေကြောင်းကနေ ဗုံးကြဲတိုက်ခိုက်တာကြောင့် အရပ်သားပြည်သူ အများပြားသေဆုံးခဲ့ပြီး နေအိမ် အဆောက်အုံများ ပျက်စီးခဲ့ရသည်။
ထို့ကြောင့် နေရပ်ပြန်ပြည်သူများ ကြောက်လန့်ကာ ထပ်မံတိမ်းရှောင်နေကြရပြီး နေအိမ်ချိတ်ပိတ်ခံရမည်စိုး၍ အိမ်စောင့်အဖြစ် မိသားစုဝင်တစ်ဦးစီ သာလျှင် ကျန်ခဲ့ကြကြောင်း သိရသည်။
“ စစ်ရှောင်ပြီး ပြန်လာတာ တစ်လမပြည့်သေးဘူး။ ခုထပ်ပြီး စစ်ရှောင်ရပြန်ပီ။ အိမ်မှာတော့ အဒေါ်ပဲ ကျန်တာပေါ့။ သမီးနဲ့ မြေးတွေကတော့ တခြားဖက်မှာ စစ်ရှောင်ခိုင်းလိုက်ပြီ။ အိမ်မှာ ပစ္စည်းပျောက်မှာလည်း စိုးရိမ်တယ်။ ချိတ်ပိတ်ခံရမှာလည်း စိုးရိမ်လို့ တစ်အိမ်တစ်ယောက်ပဲ ကျန်ခဲ့တော့တာ။” ဟု ဒေသခံ အမျိုးသမီးတစ်ဦးက ပြောသည်။
စစ်ရှောင်အများစုမှာ ပန်စိမ်း၊ ဝမ်မွမ်းနှင့် မိုင်းယော်ဘက်သို့ အများဆုံး ထပ်မံ စစ်ရှောင်နေရပြီး မြို့ပေါ်တွင် လူအနည်းငယ်များသာ ကျန်ရှိကြောင်း ၎င်းက ထပ်လောင်း ပြောသည်။
လားရှိုးမြို့ပေါ်တွင် စစ်ကောင်စီလေကြောင်း အန္တရာယ်ကြောင့် ပြည်သူများ ကြောက်လန့်နေကြရပြီး အမျိုးသမီးနှင့် ကလေးများမှာ ပို၍ စိတ်ပိုင်းဆိုင်ရာ ထိခိုက်နေကြရကြောင်း သိရသည်။
“ ညအိပ်နေတုန်း လေယာဉ်နဲ့ လာပစ်မှာ စိတ်ပူတယ်။ ပစ္စည်းတွေ ပျောက်မှာလည်း စိတ်ပူတယ်။ အရင်ကလည်း ပိုက်ဆံတွေ အကုန်ခံပြီး ပြေးပြီးပြီ။ မြို့ပေါ်မှာက ဘာမှလုပ်ကိုင်စားလို့လည်း မရတော့ဘူး။ စိုက်ပျိုးလို့လည်း မရတော့ဘူး။ “ ဟု ဒေသခံ တစ်ဦးက သျှမ်းသံတော်ဆင့်ကို ပြောသည်။
လက်ရှိလားရှိုးမြို့ပေါ်တွင် တိုက်ပွဲများ ငြိမ်သက်လျှက် ရှိသော်လည်း စစ်ကောင်စီမှ ယခုရက်ပိုင်းအတွင်း လေကြောင်းမှ တစ်ဆင့် မကြာခဏ လာရောက်ဗုံးကြဲနေကြောင်း သိရသည်။
စစ်တပ်မှ ညီနောင်မဟာမိတ် သုံးဖွဲ့ဖြစ်သည့် ကိုးကန့်(MNDAA) ၊ တအာင်း(TNLA) နှင့် ရက္ခိုင့်တပ်တော် (AA) တို့ကို အကြမ်းဖက်အုပ်စုအဖြစ် ကြေညာပြီး ညီနောင်မဟာမိတ် ထိန်းချုပ်ထားသည့် နေရာများကို စစ်ကောင်စီမှ လေကြောင်းဖြင့် တိုက်ခိုက်နေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments