သျှမ်းပြည်မြောက်ပိုင်း ” UWSA ” “ဝ” ထိန်းချုပ်သည့် ဒေသ မိုင်ပေါက်မြို့နှင့် ပန်ဆန်းမြို့တွင် မိုးအဆက်မပြတ်ရွာသွန်းမှုကြောင့် ရေကြီး၊ရေလျှံမှုဖြစ်ပွားသည်ဟု စုံစမ်းသိရသည်။
ယမန်နေ့ (စက်တင်ဘာလ ၉ ရက်)နံနက်ပိုင်းတွင် မိုးသည်းထန်စွာရွာသွန်းနေကြောင့် နေအိမ်အဆောက်အအုံ ၊ လမ်းမပေါ်ရှိဆိုင်ကယ်နှင့် မော်တော်ယာဉ်မျး နစ်မြှုပ်သည့်အထိ ရေကြီးမှု ကြုံနေရကြောင်း မြို့နယ်ဒေသခံ အမျိုုးသားတစ်ဦးက သျှမ်းသံတော်ဆင့်ကို ပြောသည်။
“ အရင်ရက်ကတည်းက မိုးတွေအရမ်းရွာတယ်။ မနေ့က မနက်ပိုင်းတော့ ရေတွေစတက်တယ်။ မြေနိမ့်ပိုင်းရှိတဲ့ အိမ်တွေဆို တစ်အိမ်လုံးမြှုပ်သွားတယ်။ လမ်းမှာရှိတဲ့ ကားတွေ ဆိုင်ကယ်တွေဆို ရေထဲပါသွားတယ် မြှုပ်ကုန်တယ်” ဟု ၎င်းကပြောသည်။
မိုင်းပေါက်မြို့နှင့် ပန်ဆန်းမြို့အတွင်းတွင် ရေလျှံ၊ရေကြီးဖြစ်ပွားခြင်းကို မကြုံဖူးသည့်အတွက် ပြည်သူများ ထိတ်လန့်မှုဖြစ်နေကြောင်း ရေထပ်မံကြီးလာမည်ကို စိုးရိမ်နေကြသည်။
“ဝ”တပ်ဖွဲ့ (UWSP/UWSA) နှင့် တရုတ်စစ်တပ်တို့သည် ဆည်များထပ်မံတည်ဆောက်ပါက ယခုထက် ရေများပိုကြီးလာနိုင်ကြောင်း မြို့နယ်ဒေသခံ အမျိုးသမီးတစ်ဦးက ပြောသည်။
“ မိုင်းပေါက် နဲ့ ပန်ဆန်းဘက်တွေလည်း ရေတက်တော့ ပြည်သူတွေ တကယ်ကို လန့်သွားတယ်။ တခါမှ မကြုံဘူးတော့လေ။ တကယ်လို့ “ဝ”တပ်ဖွဲ့နဲ့တရုတ်တွေ ဆည်တွေဆောက်ဖို့လုပ်ရင် ဒီထက်မကရေတွေကြီးလာနိုင်တယ်” ၎င်းကပြောသည်။
ထို့အပြင် ယနေ့ (စက်တင်ဘာလ ၁၀ရက်)နံနက်ပိုင်းတွင် မိုင်းကိုင်မြို့တွင် ဆည်နှင့်နီးသည့် ရပ်ကွက်များနေအိမ်များ ရေကြီး၊ရေလျှံမှုများဖြစ်ပွားနေသည်ဟု သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments