သျှမ်းပြည် ‘ဝ’ဒေသအတွင်း ရာဇဝတ်မှု ကျူးလွန်သူများကို ‘ဝ’ပြည်သွေးစည်းညီညွတ်ရေးပါတီ (UWSP/UWSA) တရားစီရင်ရေးကော်မတီမှ လူစုလူဝေး ရှေ့မှောက်တွင် စီရင်ချက် ချမှတ်ပြီး ပြစ်ဒဏ်ပေးခဲ့ကြောင်း သတင်းသိရသည်။
ဩဂုတ်လ (၄) ရက် နံနက်ပိုင်းတွင် ‘ဝ’တပ်ဖွဲ့ UWSA ထိန်းချုပ်ဒေသရှိ ပန်ဆန်း(ပန်ခမ်း)မြို့တွင် ပြန်ပေးဆွဲမှု၊ ခိုးမှု၊ လုယက်မှုနှင့် သေနတ်ရောင်းဝယ်ဖောက်ကားမှု စသည့် ရာဇဝတ်မှု အမျိုးအစား (၁၁) မျိုးဖြင့် တရားစွဲဆိုခံရသူ (၅၀) ကျော်ကို လူစုလူဝေး ရှေ့မှောက်တွင် စီရင်ချက် ချမှတ်၍ ပြစ်ဒဏ်ပေးခဲ့ကြောင်း ‘ဝ’တပ်ဖွဲ့မှ သတင်းထုတ်ပြန်သည်။
၎င်းစီရင်ချက်ချသည့် နေရာသို့ UWSP တရားစီရင်ရေးကော်မတီမှ တာဝန်ရှိသူများ၊ မြို့နေလူထု၊ စာသင်ကျောင်းများမှ ဆရာ/မများနှင့် ကျောင်းသားကျောင်းသူများအပြင် ဖိတ်ကြားထားသူများလည်း တက်ရောက်ခဲ့ကြောင်း သိရသည်။
ပြီးခဲ့သည့် ဧပြီလနှင့် မေလအတွင်း ပြစ်မှုကျူးလွန်ခဲ့ပြီး တရားရေးဌာနမှ ဖမ်းဆီးရမိခဲ့သူ (၅၀) ကျော်ကို ရာဇဝတ်မှု အမျိုးအစား (၁၁) ခွဲခြား၍ တရားစွဲဆိုခဲ့ပြီး ပြစ်မှုအလိုက် ထောင်ဒဏ် တစ်နှစ် နှစ်နှစ်မှ (၁၇) နှစ်ထိ အပြင် တရားမဝင် လက်နက်ရောင်းဝယ်မှုအတွက် တစ်သက်တစ်ကျွန်း ထောင်ဒဏ်အထိ စီရင်ချက် ချမှတ်ပြီး ပြစ်ဒဏ်ပေးခဲ့ကြောင်း WSTV ရုပ်သံသတင်းတွင် ဖော်ပြသည်။
အလားတူ ယမန်နေ့ (စက်တင်ဘာလ ၅ ရက်)တွင် မိုင်းပေါက်မြို့တွင်လည်း တရားစွဲဆိုခံရသူများကို အများပြည်သူရှေ့မှောက်တွင် ပြစ်မှုအလိုက် တရားစီရင်ခဲ့ကြောင်း ဒေသခံများထံမှ သိရသည်။
ယခုကဲ့သို့ တရားစွဲဆိုခံရသူများအား လူစုလူဝေး ရှေ့မှောက်တွင် စီရင်ချက်ချ ပြစ်ဒဏ်ပေးခြင်းကို ပန်ဆန်းမြို့အပြင် ‘ဝ’ဒေသအတွင်းရှိ မိုင်းပေါက်မြို့နယ်၊ မိုင်းမောမြို့နယ်နှင့် ဟိုပန်မြို့နယ်တို့တွင် မကြာမီ ရက်ပိုင်းအတွင်း ထပ်မံပြုလုပ်မည်ဟု ထုတ်ပြန်ထားကြောင်း သိရသည်။
လောက်ကိုင်မြို့တွင် ကိုးကန့်တပ်ဖွဲ့ MNDAA က ပြစ်မှုကျူးလွန်သူ (၁၀) ဦးကို အများပြည်သူရှေ့မှောက် သေဒဏ်ချမှတ်ခဲ့စဉ်က ဥရောပသမဂ္ဂ EU မှ အပြင်းထန်ဆုံး ရှုတ်ချပြီး ဘယ်လိုအခြေအနေဖြစ်ဖြစ် သေဒဏ်ချမှတ်မှုကို ပြင်းပြင်းထန်ထန် ဆန့်ကျင်ကန့်ကွက်ကြောင်း မြန်မာနိုင်ငံဆိုင်ရာ ဥရောပသမဂ္ဂရုံးက ဧပြီလ ၂၆ ရက်တွင် ထုတ်ပြန်ထားသည်။
Leave a Comments