သျှမ်းပြည် နောင်ချိုမြို့နယ်တွင် စစ်ကောင်စီတပ်၏ တာဝေးပစ် အမြောက် ကျည်ပေါက်ကွဲမှုကြောင့် အရပ်သား ၁ ဦး သေဆုံးပြီး ၂ ဦး ဒဏ်ရာရရှိခဲ့ကြောင်း စုံစမ်းသိရသည်။

ဩဂုတ်လ ၃ ရက်တွင် နောင်ချိုမြို့နယ် တောင်ခမ်းအခြေစိုက် စစ်ကောင်စီ အမြောက်စစ်ဆင်ရေး ကွပ်ကဲမှုဌာနချုပ် (မစခ-၉၀၂) ကို TNLA ပူးပေါင်းတပ်ဖွဲ့မှ ထိုးစစ်ဆင် တိုက်ခိုက်လျက်ရှိရာ စစ်ကောင်စီတပ်၏ လက်နက်ကြီးကျည်သည် မဲပုတ်ရွာသို့ ကျရောက်ပေါက်ကွဲခဲ့ပြီး အရပ်သား ၁ ဦး သေဆုံး၍ ၂ ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။

“လက်နက်ကြီးက ပစ်နေတုန်းပဲ၊ မဲပုတ်ရွာထဲ လူနေအိမ်နား ကျည်ကျကွဲတယ်။ အိမ်ဝင်းထဲ စကားထိုင်ပြောတဲ့ လူတွေနား ကျကွဲတာ ၃ ယောက်ထိတယ်။ တစ်ယောက်သေပြီး ၂ ယောက်က ဒဏ်ရာပြင်းတယ်လို့ ပြောတယ်”ဟု နောင်ချိုမြို့နယ် တောင်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြင်ဦးလွင်မြို့ရှိ စစ်ကောင်စီတပ်က တာဝေးပစ် အမြောက်များ ပစ်ခတ်၍ ပစ်ကူပေးခဲ့ခြင်းကြောင့် နောင်ချိုမြို့နယ် မဲပုတ်ရွာရှိ ပြည်သူနေအိမ်များနှင့် စာသင်ကျောင်းလည်း ထိမှန်ပျက်စီးခဲ့ကြောင်း သိရသည်။

နောင်ချိုမြို့နယ်၊ တောင်ခမ်းရွာ မြောက်ဘက်ရှိ အမြောက်စစ်ဆင်ရေး ကွပ်ကဲမှုဌာနချုပ် (မစခ-၉၀၂) အပါအဝင် အမြောက်တပ်စခန်းများကို TNLA ပူးပေါင်းတပ်က ထိုးစစ်ဆင် တိုက်ခိုက်နေရာ စစ်ကောင်စီဘက်က လေကြောင်းနှင့် တာဝေးပစ် အမြောက်ပစ်ကူများ အသုံးပြု ခုခံနေသဖြင့် တိုက်ပွဲ ပြင်းထန်နေကြောင်း စစ်ရေးသတင်းရင်းမြစ်က ပြောသည်။

ပြီးခဲ့သည့် ရက်ပိုင်းက စ၍ ပြင်ဦးလွင်မြို့မှ တောင်ခမ်း အမြောက်တပ်ဘက်သို့ တာဝေးပစ်အမြောက်ဖြင့် ပစ်ကူပေးနေသည်ဟု ယူဆရကြောင်း မြို့ခံများကလည်း ဆိုသည်။

အလားတူ နောင်ချိုမြို့နယ် ရွှေဂူလက်ပံကုန်းရွာသို့ စစ်ကောင်စီတပ်မှ လေကြောင်းဖြင့် ပေါင် ၅၀၀ ဗုံးဖြင့် ကြဲချတိုက်ခိုက်ခဲ့ခြင်းကြောင့် စစ်ဘေးရှောင် အမျိုးသမီး ၂ ဦး အပါအဝင် စုစုပေါင်း ၃ ဦး ဗုံးစထိမှန် သေဆုံးခဲ့ပြီး ပြည်သူနေအိမ် ၅ လုံးထက်မနည်း ပျက်စီးဆုံးရှုံးခဲ့ကြောင်း ဒေသခံများထံမှ သိရသည်။

လက်ရှိတွင် နောင်ချိုမြို့နယ် တောင်ခမ်းရွာရှိ (၂၀၆)နှင့် (၄၀၆) အမြောက်တပ်ရင်းများကို TNLA ပူးပေါင်းတပ်က ဩဂုတ်လ (၂၈) ရက်တွင် သိမ်းပိုက်ထားပြီး စစ်ကောင်စီက အမြောက်စစ်ဆင်ရေး ကွပ်ကဲမှု ဌာနချုပ် (မစခ-၉၀၂) အတွင်း စုပြုံခုခံနေသည့်အပြင် လေကြောင်းမှလည်း အဆက်မပြတ် ဗုံးကြဲခုခံနေကြောင်း စစ်ရေးသတင်းရင်းမြစ်က ပြောဆိုသည်။

နောင်ချိုမြို့နယ် တောင်ခမ်းဒေသတွင် ကျန်ရှိနေသည့် စစ်ကောင်စီတပ်၏ အမြောက်စစ်ဆင်ရေး ကွပ်ကဲမှု ဌာနချုပ် (မစခ-၉၀၂)နှင့် အမတ (၃၅၄) တပ်ရင်းတို့ကို TNLA က စစ်ကောင်စီထံမှ သိမ်းဆီးရမိသည့် သံချပ်ကာယာဉ် ၂ စီးကို အသုံးပြုနေသည့် မှတ်တမ်းကိုလည်း TNLA သတင်းနှင့် ပြန်ကြားရေးဌာနမှ ယမန်နေ့ (စက်တင်ဘာ ၄ ရက်)တွင် ထုတ်ပြန်ခဲ့သည်။