သျှမ်းပြည်တောင်ပိုင်း၊ အောင်ပန်းမြို့နယ် ထီတိန်ရွာတွင် တောင်ကျချောင်းရေကြောင့် မိခင်နှင့် လသားအရွယ် ကလေးငယ်မျောပါသေဆုံးသွားခဲ့ကြောင်းသတင်းရရှိသည်။

ဖြစ်စဉ်မှာ ယမန်နေ့ (စက်တင်ဘာလ ၄ ရက်) ညနေ ၄ နာရီ တွင် အသက် ၂၄ နှစ် မနန်းနော်ဆိုသည့် အမျိုးသမီးတစ်ဦးသည် သူ၏ ၆လ အရွယ် သမီးငယ်နှင့်အတူ ချောင်းတစ်ခုကို ဖြစ်ကူးနေစဉ် ရုတ်တရက် တောင်ကျချောင်းရေကျလာကာ ရေစီးနှင့်အတူမျောပါသေဆုံးခဲ့သည်။

လက်ရှိတွင် မိခင်အလောင်းကို ဒဏ်ရာများနှင့်အတူရှာတွေ့သော်လည်း လသားအရွယ်ကလေးငယ်ကို ယနေ့အထိရှာမတွေ့သေးကြောင်း အောင်ပန်း နာရေးကူညီမှုအသင်းမှ တာဝန်ရှိသူတစ်ဉီးက သျှမ်းသံတော်ဆင့်ကိုပြောသည်။

“ မိုးက တခြားရွာဖက်မှာ ကြီးတာ ။ သူတို့ရွာတော့အဲနေ့က မိုးမရွာဘူး။ သူဖြတ်ကူးတဲ့ချောင်းက ချောင်းခြောက် ရေစီးတာနည်းတယ်။ သူဖြတ်တဲ့အချိန်မှ တောင်ကျရေ ရုတ်တရက်ကြီးလာတာ။ ရှာတွေ့တော့ သူမျက်နှာ နဲ့ ဦးခေါင်းမှာ ဒဏ်ရာတွေနဲ့။ကလေးကရှာတွေ့တော့မှာမဟုတ်တော့ဘူး သဲထဲဖုံးနေလောက်ပီ။” ဟု ၎င်းကပြောသည်။

ထီတိန်ရွာသည် အောင်ပန်းမြို့နှင့် ၁၅ မိုင်ခန့် ကွာဝေးပြီး ထိုဖြစ်စဉ်ကြောင့် အောင်ပန်းနာရေးကူညီမှုအသင်းမှ သွားရောက်ကူညီခဲ့ကာ မနန်းနော်ဆိုသူကို ယနေ့ (စက်တင်ဘာလ ၅ ရက်)နေ့ နေ့လည် (၂ နာရီ) အချိန်တွင် သင်္ဂြုလ်ပေးသွားမည်ဖြစ်ကြောင်း သိရသည်။

ယခုကဲ့သို့ တောင်ကျချောင်းရေကြောင့် သေဆုံးမှုဖြစ်စဉ်တွင် အောင်ပန်းတွင် ပထမဆုံးဖြစ်ပြီး အများပြည်သူများအနေဖြင့် ချောင်းဖြတ်ကူးစဉ်နှင့် မိုးရာသီတွင် လမ်းသွားလမ်းလာ အထူးဂရုစိုက်ကြရန် အောင်ပန်းနာရေးကူညီမှုအသင်းမှ အသိပေးတိုက်တွန်းထားသည်။

” တောင်ကျချောင်းရေက ဘယ်ချိန်ဖြစ်မယ်ဆိုတာမသိတော့ စိုးရိမ်ရတောပေါ့။ အခုဆိုရင် အစစအရာရာ စိတ်ပူနေရတယ်။ စားဖို့ခက်သလို အရေးအကြောင်းဆိုရင် ရှောင်ဖို့ကလည်း ခက်တယ်” ဟု အောင်ပန်းမြို့နယ် ဒေသခံ အမျိုးသမီးတစ်ဉီးက ပြောသည်။

အောင်ပန်းမြို့သည် ကုန်စည်ပစ္စည်းများ အဓိကရောင်းဝယ် သည့်နေရာဖြစ်ပြီး ဒေသအသီးသီးမှ ကုန်ပစ္စည်းရောင်းဝယ်သူများနှင့်စည်ကားလျှက်ရှိပြီး ယာဉ်မတော်တဆ ထိခိုက်မှုလည်း မကြာခဏဖြစ်ပွားလေ့ရှိသည်။

အလုပ်သင် သတင်းထောက် နန်းလရောင် ရေးသားသည်။