သျှမ်းပြည်နယ်တောင်ပိုင်း၊ ညောင်ရွှေမြို့နယ် အင်းလေးဒေသဘက်တွင် ဖောင်တော်ဦးဘုရားပွဲ ပြုပ်လုပ် မည်ဆိုသောကြောင့် စစ်ရှောင်များကို နေရပ်ပြန်ခိုင်းကြောင်း စုံစမ်းသိရသည်။
ဖောင်တော်ဦးဘုရားပွဲကို ယခင်က နိုင်ငံရေးအခြေအနေအကြောင်းအမျိုးမျိုး ကြောင့် မကျင်းပဖြစ်သော်လည်း ဒုတိယအကြိမ်အစည်းဝေးတွင် အထက်လူကြီးများက ကျင်းပခိုင်းသည့်ဟုဆိုကာ အင်းလေးဒေသအကြီးအကဲနှင့် ပအိုဝ်းပြည်သူ့စစ် ( PNO) တို့ ဦးစီးကျင်းပမည်ဖြစ်သည်။
ထိုသို့ ဘုရားပွဲ ကျင်းပမည်ဆိုသောကြောင့် အင်းလေးဒေသ အကြီးကဲ ဥက္ကဌနှင့် ဆရာတော်များ တိုင်ပင်ဆွေးနွေးကာ ဖောင်တော်ဦးဘုရား စံမည့် မိုင်းပျိုးကျောင်းနှင့် နောင်တောဘုန်းကြီးကျောင်းတွင် ရှိသော စစ်ရှောင်များကို နေရပ်ပြန်ခိုင်းထားကြောင်း သိရသည်။
“ တချို့ကျတော့လည်း ဘုန်းကြီးကျောင်းမှာ ရေတက်လာလို့ နေရာပြောင်းခိုင်းတာ။ မိုင်းပျိုးဘုန်းကြီးကျောင်းဖက်တော့ ဘုရားစံမဲ့ နေရာဆိုတော့ နေရာဖယ်ခိုင်းတာ။ စစ်ရှောင်တွေတော့ ပြန်လို့ရတဲ့သူက နေရပ်ပြန်ကုန်ပီ၊ ပြန်မရတဲ့သူကတော့ အမျိုးအိမ်တွေမှာ နေတယ်။ အိမ်ငှားနေကြတယ်။”ဟု အင်းလေးဒေသခံ အမျိုးသားတစ်ဦးက ပြောသည်။
နိုင်ငံရေးအခြေနေနှင့် စားဝတ်နေရေး အခက်ခဲကြောင့် အင်းလေးဘုရားပွဲကို မလုပ်စေချင်ကြောင်းနှင့် ကုန်ကျစရိတ်များ များစွာကုန်ကျကာ ဒေသခံများအတွက် ပို၍ဝန်ထုတ်ဝန်ပိုးဖြစ်စေကြောင်း ၎င်းအမျိုးသားက ထပ်လောင်းပြောင်းသည်။
စစ်ရှောင်အများစုမှာ လွိုင်ကော်၊ မိုးဗြဲနှင့် ဒီးမော့ဆို့ ဖက်မှ အများဆုံးဖြစ်ပြီး မိုင်းပျိုးကျောင်းနှင့် နောင်တော ကျောင်းတွင် စစ်ရှောင်ဦးရေမှာ ၅၀၀ နီးပါးခန့်ရှိပြီး အင်းလေးဒေသတစ်ခုလုံးတွင် စစ်ရှောင် တစ်ထောင်နီးပါးခန့် ရှိကြောင်းသိရသည်။
ထိုသို့ စစ်ရှောင်များကို နေရာရွှေ့ပြောင်းခိုင်းကာ နေရပ်ပြန်ခိုင်းတာကြောင့် စစ်ရှောင်များအနေဖြင့် နေစရာနှင့် စားစရာအတွက် အခက်ခဲဖြစ်နေကြောင်း သိရသည်။
“ ဘုရားကြွတာလည်း ကြွတာပေါ့လေ။တကယ်ဆို ပြန်လို့မရတဲ့သူဆိုရင် နေခိုင်းလို့ရနေတာပဲ၊ ငြိမ်းချမ်းပြီ ဆိုပြီးပြန်ခိုင်းတာလားမသိဘူး။ အိမ်ငှားမယ်ဆိုလည်း အလုပ်မရှိရင် အဆင်မပြေဘူးလေ။ ခုတောင် စားဖို့တောင်အခက်ခဲရှိတာ။ “ဟု စစ်ရှောင်အမျိုုးသမီးတစ်ဦးမှ သျှမ်းသံတော်ဆင့်ကိုပြောသည်။
ထို့အပြင် စစ်ရှောင်များမှာ သက်ကြီးရွယ်အိုနှင့် ကလေးအရွယ် ပိုများတာကြောင့် အလုပ်ကိုင်ရှားပါးကာ အလှူရှင်နည်းပါးတာကြောင့် စားဝတ်နေရေးအတွက် ဆရာတော်များက ညောင်ရွှေတွင် ခရမ်းချဉ်းသီးနှင့် အခြားသော အသီးအရွက်များကို အလှူခံ၍ ကျွေးမွေးထားကြောင်းသိရသည်။
လက်ရှိအင်းလေးဒေသတွင် မိုးအဆက်မပြတ်ရွာသွန်းတာကြောင့် ဖောင်တော်ဦးဘုရားရင်ပြင်တော်အထိ ရေများဝင်ရောက်နေလျှက်ရှိပြီး သွားရေးလာရေးအတွက်ပါ ခက်ခဲနေကာ စပါးစိုက်ခင်း ဧက ထောင်ချီရေမြုပ်သွားကြောင်းသိရသည်။
ဖောင်တော်ဦးဘုရားပွဲကို အောက်တိုဘာလ ၃ ရက်မှ ၂၀ ရက်အထိကျင်းပပြုလုပ်သွားမည်ဖြစ်ပြီး (PNO) မှ လုံခြုံရေးယူကာ ဆောင်ရွက်သွားမည်ဖြစ်ကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments