သျှမ်းပြည်နယ်တောင်ပိုင်း၊ ဟိုပုံးမြို့နယ် မဲနယ်တောင်ဒေသဖက်တွင် လူငယ်အများစု ပြည်ပထွက်ကုန်ကြသဖြင့် စိုက်ပျိုးရေးလုပ်ကိုင်သူလျော့နည်းလာကြောင်း စုံစမ်းသိရသည်။
ပြီးခဲ့သည့် ဇန်နဝါရီလ ၂၁ ရက်တွင် ပအိုဝ်းအမျိုးသားလွတ်မြောက်ရေးတပ်မတော် ( PNLA) နှင့် ပအိုဝ်းပြည်သူ့စစ် (PNO) ၊ စစ်ကောင်စီ ပူးပေါင်းတပ်တို့သည့် မဲနယ်တောင်ဒေသတွင် လက်နက်ခဲယန်းကိစ္စနှင့် ပတ်သက်ပြီး စတင် ထိတွေ့တိုက်ပွဲဖြစ်ပွားခဲ့သည်။
ထိုသို့ တိုက်ပွဲဖြစ်ပွားခဲ့ပြီးနောက် ဒေသခံအများပြား စစ်ဘေးရှောင်နေခဲ့ရကာ စစ်ပွဲ ငြိမ်သက်ချိန်တွင် လူငယ်အများစုမှာ စစ်ရှောင်ရင်းပြည်ပနိုင်ငံများသို့ တိမ်းရှောင်သွားခဲ့ကြသည်။
“ ရွာမှာတော့ သက်ကြီးရွယ်အိုနဲ့ အသက်မပြည့်သေးတဲ့ ကလေးတွေပဲကျန်ခဲ့တာ။ လုပ်နိုင်ကိုင်နိုင်တဲ့သူတွေက အကုန် နိုင်ငံခြားရောက် ကုန်တော့ ရွာမှာ စိုက်ပျိုးရေးလည်း သိပ်မလုပ်ဖြစ်ကြတော့ဘူး။ အရင်က ကျနော်တို့ ခြံ သုံးခြံလောက်လုပ်တာ ခုတော့ တစ်ခြံတောင် ကောင်းကောင်းမလုပ်နိုင်တော့ဘူး။ “ ဟု ဒေသခံတစ်ဦးက ပြောသည်။
ကျေးရွာဘက်တွင် အသက် ၁၈ နှစ်အောက်ဖြစ်သည့် ၁၂ နှစ်နှင့် ၁၄ နှစ်အရွယ်မျှသာ ကျန်ရှိတော့ကြောင်းနှင့် လုပ်ငန်း လုပ်ကိုင်နိုင်သည့် လူငယ်များ မရှိတာကြောင့် လုပ်အားခ ဈေးပိုပေးလျှင်လည်း နေ့စားလိုက်မည့်သူ မရှိတော့ကြောင်း ထိုအမျိုးသားက ဆက်ပြောသည်။
ကျောက္ကချား၊ တလျနွိုး၊ စံဖူး၊ ဗန်းစောက်၊ပင်လျမ်၊ နမ်းဟူး နှင့် ထီတဲမ်လိတ် စသည့် မဲနယ်တောင်တကျောမှ ကျေးရွာများတွင် စိုက်ပျိုးရေးလုပ်ကိုင်မှုသည် ယခင်ကထက် ၆၀ ရာခိုင်နူန်းမျှ ကျဆင်းသွားကြောင်း သိရသည်။
ထို့အပြင် ပြည်ပရောက်နေသူ ဒေသခံ တစ်ဦးမှာ အလုပ်လုပ်နေသော်လည်း အလုပ်ရှင်များမှ အလုပ်သမားခ အပြည့်မပေးပဲ ဈေးနှိမ်ခံရမှုများကြုံတွေ့နေရကြောင်းကို အခုလိုပြောသည်။
“ ပြည်ပရောက်နေပေမဲ့ စိတ်ကပြန်ချင်တယ်ပေါ။ တိုင်းတပါးမှာ ဘာသာစကားမတတ်တဲ့ အခက်ခဲတွေရှိတယ်။ ပြီးရင် အလုပ်ချိန်မမှန်တာရှိတယ်။ တော်တော်များများ အလုပ်မရှိကြဘူး။ အလုပ်သမားများတော့ ထိုင်းကလူတွေက လူရွေးတယ်။လေသံမာ နဲ့ပြောတယ် ခိုင်းတယ်။ သုံးလမှ ဘတ်၆ထောင်ပဲရတယ်။နှိမ်ခံရတယ်။”ဟု ဆိုသည်။
ပြည်ပတွင်အလုပ်ရှားပါးတာကြောင့် ဝင်ငွေ မရသည့်အပြင် (PNO) မှ ပြည်ပရောက်နေသူများကို လစဉ် ကျပ်ငွေ သုံးသိန်း ကောက်ခံတာကြောင့် ပို၍အဆင်မပြေဖြစ်ရကြောင်း ထိုအမျိုးသားက ထပ်လောင်းပြောသည်။
ယခုရက်ပိုင်းအတွင်း (PNO) တပ်သားများသည့် မဲနယ်တောင်ဒေသဖက်တွင် အင်အားပြ လှည့်လည်သွားလာနေပြီး ဒေသခံပြည်သူများနေအိမ်တွင် တည်းခို၍ လုံခြုံရေးအကြောင်းပြကာ တစ်ရွာဝင်တစ်ရွာထွက် သွားလာနေကြကြောင်းသိရသည်။
ယခုကဲ့သို့ လှည့်လည်သွားလာနေကြသော (PNO) တပ်သားအများစုသည် အတင်းအဓမ္မတပ်သားစုဆောင်းခံရသူများပါဝင်ပြီး အများစုမှာ အသက် ၁၈ နှစ် အရွယ်မျှသာဖြစ်ကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments