သျှမ်းပြည်မြောက်ပိုင်း တအာင်း(ပလောင်)အမျိုးသားလွတ်မြောက်ရေးတပ်မတော် (TNLA)
ထိန်းချုပ်ထားသည့် ကွတ်ခိုင်မြို့အတွင်းသို့ စစ်ကောင်စီမှ လေကြောင်းဖြင့် ထပ်မံထိုးဆင်းလာမည်ကို ပြည်သူများ ထပ်မံစိုးရိမ်နေရသည်ဟု စုံစမ်းသိရသည်။
ကွတ်ခိုင်မြို့အတွင်း သြဂုတ် ဒုတိယပတ်မှ စပြီး ယနေ့ (ဩဂုတ်လ ၂၉ ရက်)နေ့အထိ စစ်ကောင်စီမှ လေယာဉ်ဖြင့် နေ့ညအဆက်မပျက် လေယာဉ်ပျံဝဲနေခြင်းကြောင်း ပြည်သူများစိုးရိမ်နေကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
‘’ ဒုတိယပတ်လောက်ကတည်းက အသံတွေကြားနေရတယ်။ အခုက မြို့အပေါ်က နေ့နေ့ညည ပျံဝဲနေတယ်။ လားရှိုးကစစ်ရေးမငြိမ်သေးတော့ ကွတ်ခိုင်မှာလည်း ကြောက်နေရတယ် ‘’ ဟု ၎င်းကပြောသည်။
စစ်ကောင်စီသည် ဩဂုတ်လ ၅ ရက်တွင်လည်း ကွတ်ခိုင်မြို့မဈေးကို လေကြောင်းဖြင့် ဗုံးကြဲသဖြင့် ယခုတွင်လည်း ထပ်မံကြဲမည်ကို ကြောက်နေရကြောင်း ဆိုင်ခန်းများပိတ်ထားရသည်ဟု မြို့နယ်ခံ အမျိုးသမီးတစ်ဦးက ပြောသည်။
‘’ မြို့မဈေးကို ဗုံးကြဲသွားပြီးကတည်း ကြောက်နေရပြီလေ ဘယ်ချိန်များထက်လာကြဲမှာကို။ အဲဒါကြောင် ဆိုင်တွေ ပိတ်ထားတယ် ။ တချို့ဖွင့်တဲ့သူလည်းရှိပါသေးတယ် ကျမတို့က ပိုစိုးရိမ်နေလို့ ကြိုပိတ်ထားတယ်’’ ဟု ၎င်းက ပြောသည်။
စစ်ကောင်စီသည် ဩဂုတ် ၅ရက်တွင်လည်း ကွတ်ခိုင်မြို့မဈေးကို လေကြောင်းဖြင့် ဗုံးကြဲသဖြင့် အရပ်သား ၆ဦး သေဆုံးကာ ၁၀ဦးဒဏ်ရာရရှိခဲ့ပြီး စျေးဆိုင်ခန်းပေါင်း ၄၀၀ကျော် မီးလောင်ပျက်စီးခဲ့သည်။
စစ်ကောင်စီသည် တိုက်ပွဲဖြစ်ပွားခြင်းမရှိသည့် မြို့ ၊ ရွာများရှိ ဈေး၊ စာသင်ကျောင်း၊ ဆေးရုံစသည့် အဆောက်အုံးများကို တိုက်လေယာဥ်ဖြင့် ဗုံးကြဲတိုက်ခိုက်နေ၍ တားဆီးဟန်တားပေးရန် အိမ်နီးချင်း တရုတ်နှင့် နိုင်ငံတကာသို့ မြောက်ပိုင်းမဟာမိတ်သုံးဖွဲ့က ဩဂုတ် ၆ ရက်တွင် တောင်းဆိုထားသည်။
ကွတ်ခိုင်မြို့နေထိုင်သူများအနေဖြင့် စစ်ကောင်စီဘက်မှ လေကြောင်းဖြင့် ဗုံးလာရောက်ထပ်မံကြဲခြင်း၊ တိုက်ပွဲများ ထပ်မံဖြစ်မည်ကို စိုးရိမ်နေကြသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments