သျှမ်းပြည် ကျောက်မဲမြို့တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်မှ လေကြောင်းဖြင့် ပေါင် (၅၀၀) ဗုံး ၂ လုံး ကြဲချတိုက်ခိုက်ခဲ့ခြင်းကြောင့် ဒေသခံ(၁)ဦး သေဆုံးပြီး (၂) ဦး ဒဏ်ရာရရှိခဲ့ကြောင်း စုံစမ်းသိရသည်။
ဩဂုတ်လ (၂၇) ရက် ည ၁၁ နာရီကျော်တွင် ကျောက်မဲမြို့ ရပ်ကွက်(၉) တိလင်ရပ်ရှိ အထက-(၂) စာသင်ကျောင်းသို့ စစ်ကောင်စီတပ်မှ ဂျက်ဖိုက်တာဖြင့် ပေါင် (၅၀၀) ဗုံးနှစ်လုံး ကြဲချတိုက်ခိုက်ခဲ့ရာ စာသင်ဆောင်များ ထိခိုက်ပျက်စီးခဲ့ပြီး အနီးရှိ နေအိမ်အတွင်းမှ ဒေသခံ (၁) ဦး သေဆုံးပြီး (၂) ဦးထက်မနည်း ထိခိုက်ဒဏ်ရာ ရရှိခဲ့ကြောင်း ကျောက်မဲဒေသခံများက ပြောသည်။
“အရင်ညက ဂျက်ဖိုက်တာနဲ့ နှစ်ခါလာကြဲတာ။ တိလင်က အထက (၂) ဘော်လုံးကွင်းထဲ ကျတယ်။ ပတ္တမြားခန်းမကော တခြားစာသင်ဆောင်တွေကော ခေါင်မိုးလှန်တာ၊ ပြိုကျကုန်တာ ရှိတယ်။ ကျောင်းမြောက်ဘက်က အိမ်တွေလည်း ပျက်စီးတာရှိတယ်၊ လူတစ်ယောက်သေတယ်။ လက်ဖက်ပွဲရုံဘက်လည်း တစ်လုံးကျတယ်”ဟု ကျောက်မဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့ လေကြောင်းဗုံးကြဲ ခံရမှုဖြစ်စဉ်တွင် ရပ်ကွက်(၉) နေ အသက် (၅၄) နှစ်အရွယ် မိုင်းအညော် ဆိုသူ ပွဲချင်းပြီး သေဆုံး၍ အသက် (၃၅) နှစ်အရွယ် ကိုငယ်လေးနှင့် အသက် (၅၀) အရွယ် ကိုနောင် ဆိုသူ (၂) ဦး ထိမှန်ဒဏ်ရာ ရရှိခဲ့ကြောင်း TNLA သတင်းနှင့် ပြန်ကြားရေးဌာနမှ ယမန်နေ့ (ဩဂုတ်လ ၂၇ ရက်) တွင် ထုတ်ပြန်ထားသည်။
အလားတူ ဩဂုတ်လ ၂၇ ရက်တွင် သီပေါမြို့ပေါ် ရပ်ကွက်များသို့ စစ်ကောင်စီတပ်မှ ဂျက်ဖိုက်တာနှင့် Y-12 ထောက်ပို့လေယာဉ် နှစ်စီးဖြင့် လေကြောင်းမှ ဗုံးအလုံး (၅၀) ကျော် ကြဲချတိုက်ခိုက်ခဲ့ရာ အရပ်သား(၂) ဦး သေဆုံးသွားခဲ့ပြီး အထက-(၃)၊ အမက-(၃) စာသင်ကျောင်းများလည်း ထိခိုက်ပျက်စီးခဲ့ကြောင်း သီပေါဒေသခံများထံမှ သိရသည်။
ယခုရက်ပိုင်းအတွင်း တိုက်ပွဲဖြစ်ပွားခြင်းမရှိဘဲ သီပေါ၊ ကျောက်မဲ၊ ကွတ်ခိုင်၊ နမ့်ဆန်မြို့များရှိ ပြည်သူလူထုများအား ဦးတည်ပြီး လေကြောင်းဖြင့် လိုက်လံဗုံးကြဲချမှုကြောင့် အရပ်သားပြည်သူ သေဆုံးမှုနှင့် ထိခိုက်ဒဏ်ရာရရှိမှု အများအပြား ရှိသကဲ့သို့ ဘုန်းကြီးကျောင်း၊ စာသင်ကျောင်း၊ ဘာသာရေးအဆောက်အဦးနှင့် ဒေသခံနေအိမ်များ ထိခိုက်ပျက်စီးမှုလည်း အများအပြား ရှိခဲ့ကြောင်း TNLA ဘက်မှ ထုတ်ပြန်သည်။
Leave a Comments