သျှမ်းပြည်တောင်ပိုင်း တောင်ကြီးမြို့နယ်နှင့် ရပ်စောက်မြို့နယ်တို့တွင် ဆန်ကြမ်းများကို ပေါ်ဆန်းမွှေးဟုဆိုကာ လိုက်လံ လိမ်ညာ ရောင်းချမှုပြုလုပ်နေကြောင်း စုံစမ်းသိရသည်။
ယမန်နေ့ (ဩဂုတ်လ ၂၇ ရက်) တွင် တောင်ကြီးမြို့နယ် အေးသာယာတွင် ပေါ်ဆန်းမွှေးဟုဆိုကာ ဆန်ကြမ်းများကို လိုက်လံရောင်းချနေကြောင်း ကိုယ်တိုင်ကြုံတွေ့ခဲ့သူ မြို့ခံတစ်ဦးက သျှမ်းသံတော်ဆင့်သို့ပြောသည်။
“ ပေါ်ဆန်းအကောင်းစားဆိုပြီး ဆန်အိတ်ကိုလည်း ထိုးပြတယ် အစမ်းလည်းချက်ခိုင်းတယ်၊ တကယ်ယူတော့မှ ဆန်ကြမ်းအိတ်တွေကိုပေးတာ၊ ယူမယ့်အိတ်တွေထိုးပြဆိုတော့ မရဘူးလို့ပြောတယ်၊ Light truck လိုကားမျိုး နဲ့လာတာ၊ တိုက်ခန်းပေါ်ထိတက်ပြီးရောင်းတာ” ဟု ၎င်းကပြောပြသည်။
အလားတူ ရပ်စောက်မြို့နယ်တွင်လည်း လွန်ခဲ့သည့်တစ်ပတ်ခန့်က ရွှေဘိုဘက်မှ စစ်ဘေးရှောင်လာသည်ဟု ပြောဆိုပြီး ရောင်းချခဲ့ကြောင်းလည်းသိရသည်။
“ရွှေဘိုဘက်က စစ်ဘေးရှောင်ရင်းရှိတဲ့ဆန်တွေသယ်လာတာလို့ပြောတယ်။ နောက်ဆုံး
လက်ကျန်၊ နောက်ဆို ထပ်မစိုက်နိုင်တော့ဘူးဆိုပြီးပြောတော့ သနားပြီး ဝယ်ကြတာ” ဟု ၎င်းကဆက်ပြောသည်။
အဆိုပါ ဆန်သည် တစ်အိမ်လျှပ် ကျပ်ငွေ တစ်သိန်းသုံးသောင်း၅ထောင်ကျပ် (၁၃၅၀၀၀)ဖြစ်ပြီး၊ ၅အိတ်ဝယ်ယူခဲ့ကာ ဆန်ကြမ်းများဖြစ်နေကြောင်း ကိုယ်တိုင်ကြုံတွေ့သူက ပြောသည်။
ထိုသို့လိမ်လည်ရောင်းချမှုများသည် တောင်ကြီးမြို့နယ် ရပ်စောက်မြို့နယ်များအပြင် သျှမ်းတောင်ပိုင်းရှိ အခြားမြို့နယ်များတွင်ပါ လှည့်လည်ရောင်းချမှုများရှိလာသောကြောင့် ပြည်သူများအနေဖြင့် သေချာစစ်ဆေးပြီးမှ ဝယ်ကြရန် ထိုသူမှဆက်ပြောသည်။
လက်ရှိဈေးကွက်ထဲတွင် ရွှေဘိုပေါ်ဆန်း ဆန်အဟောင်း (အကောင်းစား) တအိတ်လျှင် ကျပ်ငွေ တစ်သိန်းကိုးသောင်း ( ၁၉၀,၀၀၀ )ကျော်ရှိနေပြီး အလတ်တန်းစား ရွှေဘိုပေါ်ဆန်း တအိတ်လျှင် ကျပ်ငွေ တစ်သိန်း ခြောက်သောင်း ( ၁၆၀,၀၀၀) ကျပ်နှင့် ဧည့်မထ ဆန်ကြမ်း တအိတ်လျှင် ကျပ်ငွေ တစ်သိန်း ၁၀၀,၀၀၀ ဝန်းကျင်ထိ ပေါက်ဈေးရှိနေကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments