သျှမ်းပြည် တဝှမ်း နေရာအနှံ့ မကြုံစဖူးရေကြီးမှုဖြစ်ပေါ်ပြီး နေအိမ်ရေမြှုပ်မှု လယ်ယာစိုက်ခင်း ထောင်ချီ ပျက်စီးဆုံးရှုံးမှု ဖြစ်ပွားကြောင်း သတင်းရရှိသည်။
အဆိုပါ ရေကြီးမှုသည် သျှမ်းပြည် တောင်ပိုင်း နမ့်စန်မြို့နယ်၊ ခိုလမ်မြို့ ၊ ကွန်ဟိန်း ၊ မိုးနဲ ၊လင်းခေး၊ မိုင်းပန်မြို့နှင့် သျှမ်းပြည် အရှေ့ပိုင်း တာချီလိတ်မြို့တို့ ဖြစ်ကြောင်း သိရသည်။
ထိုရေကြီးမှုပြဿနာသည် သျှမ်းပြည်အတွင်း စီမံကိန်းများကို အလွန်အကျွံပြုလုပ်ခြင်း၊ သတ္တုတူးဖော်မှု၊ ရွှေတူးဖော်မှု နဲ့ကျောက်မီးသွေး တူးဖော်မှုများ ကို စည်းမဲ့ကမ်းမဲ့ ပြုလုပ်ခြင်း တို့၏ နောက်ဆက်တွဲ ပြဿနာဖြစ်သည်။
“ တစ်အိမ်လုံး ရေမြှုပ်တဲ့အထိပါပဲ။ အိမ်တွေ ကလည်း ရာနဲ့ချီ မြှုပ်နေပြီ။ ဒီနေ့ကပိုဆိုးတယ်” ဟု လင်းခေးမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
ရေကြီးမှုကြောင့် မိုးနဲမြို့နယ်ရှိ စပါးခင်း နှင့် ပြောင်းခင်း ဧက ခြောက်ထောင်ကျော် နစ်မြှုပ်ပြီး၊ လင်းခေးမြို့နယ်အတွင်း လယ်ယာစိုက်ခင်း ဧက သုံးထောင်ကျော် နစ်မြှုပ်ကြောင်း ဒေသခံများပေးပို့သည့် စာရင်းအရသိရသည်။
“ဒီနှစ်ရေကြီးမှုက တော်တော်ဆိုးတယ်။ လယ်ယာစိုက်ခင်းတွေအများကြီးနစ်တယ်။ အိမ်အချို့ ရေဝင်တယ်။ အမျိုးတွေအိမ်မှာ ပြောင်းရွှေ့နေရတယ်” မိုးနဲမြို့ ဒေသခံအမျိုးသားတစ်ဦးက သျှမ်းသံတော်ဆင့် ကိုပြောသည်။
ဆက်လက်ပြီး ကွန်းဟိန်မြို့တွင်လည်း တစ်ကြိမ်တစ်ခါမျှ မကြုံဖူးတဲ့ ရေကြီးမှုကို စတင်ကြုံတွေ့လာရသဖြင့် ဒေသခံများ စိုရမ်ပူပန်မှုဖြစ်နေကြောင်း သိရသည်။
“ ဒီလိုရေကြီးမှုက မကြုံဖူးတော့ စိုးရိမ်တာပေါ့။ နောက်နှစ်တွေမှာလည်း ဆက်ဖြစ်လာဖို့အလားအလာရှိတယ်။ မိုးဆက်ရွာရင်တော့ ရေက ဆက်ကြီးဖို့ပဲရှိတယ်” ဟု ကွန်ဟိန်း ဒေသခံ အမျိုးသားတစ်ဦးက ဆက်ပြောသည်။
အလားတူ သျှမ်းပြည် အရှေ့ပိုင်း တာချီလိတ်မြို့တွင်းလည်း ယခုမိုးရာသီ အတွင်း (၆)ကြိမ်တိုင်တိုင် ရေကြီးမှုကြုံသဖြင့် စံချိန်တင် ရေကြီးမှုဟာ ဒေသခံများက ပြောဆိုလိုက်သည်။
“ မိုးရွာရင် ရေကြီးတယ်။ ရေကျတော့ အိမ်သန့်ရှင်းရေးလုပ်လိုက် မိုးရွာတော့ ရေပြန်ကြီးလိုက်ပဲ။ ဒီလိုဖြစ်တာ ၆ကြိမ်ဖြစ်တော့ စိတ်ဓာတ်တောင်ကျတယ်” ဟု တာချီလိတ်ဒေသခံ အမျိုးသမီးတစ်ဦးက ပြောသည်။
ထိုရေကြီးမှုဒဏ်ခံရသည့် ပြည်သူများသည် ကိုယ်နည်းကိုယ်ဟန်ဖြင့်သာ ဖြေရှင်းနေရကြောင်း၊ ရေဘေးကြုံတွေ့နေရသည့် ပြည်သူများအတွက် သီးသန့်နေရာ မထားနိုင်ကာ ဆွေမျိုးနီးစပ်သူများထံပြောင်းရွှေ့နေရသကဲ့သို့ စားသောက်ရန် အတွက်လည်း အခက်အခဲကြုံတွေ့နေရသည်။
Leave a Comments