သျှမ်းပြည်နယ်တောင်ပိုင်း၊ တောင်ကြီးမြို့နယ် ကျောက်နီ ကျေးရွာ အုပ်စုရှိ ပြောင်းစိုက်တောင်သူများကို ကုမ္ပဏီများက ပြောင်းမျိုးစေ့လိမ်ညာရောင်းချနေသဖြင့် အရှုံးပေါ် ရင်ဆိုင်နေရကြောင်း စုံစမ်းသိရသည်။
ပြီးခဲ့သည့် မိုးရာသီအစ ဇွန်လိုင်လတွင် CP ကုမ္ပဏီနှင့် သြဘာ ကုမ္ပဏီမှ ရောင်းချသည့် ပြောင်းမျိုးစေ့ (၈၀၈)ကို တောင်ကြီးမြို့နယ် ကျောက်နီကျေးရွာမှ တောင်သူများဝယ်ယူပြီး စိုက်ပျိုးခဲ့ရာ ယနေ့ထိတိုင် ပြောင်းပင်မပေါက်သဖြင့် အခက်ကြုံနေရကြောင်း ပြောင်းစိုက်တောင်သူများက သျှမ်းသံတော်ဆင့်ကိုပြောသည်။
“ အရင်ကဆို ပြောင်းပင်မပေါက်ရင် ပြန်လျော်ပေးတယ်။ ခုက ကုမ္ပဏီတွေက အာမခံချက်မရှိတော့ဘူး။ အပင်မပေါက်လည်း ပြန်မလျော်ပေးတော့ဘူး။ ပြီးတော့ သူတို့ ဆီက မျိုးစေ့နဲ့ စိုက်ထားတဲ့ ပြောင်းတွေကို ပြန်မဝယ်ပေးတော့ဘူး။” ဟု ဒေသခံတစ်ဦးက ပြောသည်။
ပြောင်းခင်း တစ်ဧကကို အရင်းအနှီးသည် ကုန်ကျငွေ ကျပ်သိန်း (၇)သိန်းကျော် ရှိပြီး ပြန်ရသည့်အခါ အမြတ်အနေဖြင့် ကျပ်ငွေ တစ်သိန်းမျှသာ ရကြောင်း ၎င်းပြောင်းစိုက်တောင်သူ တစ်ဦးက ဆိုသည်။
ထို့အပြင် ပြောင်းဈေးနူန်းကျဆင်းပြီး ပြောင်းမျိုးစေ့ ကုမ္ပဏီ၏ အာမခံချက်မရှိတာကြောင့် ပြောင်း အစားထိုးအနေဖြင့် သနပ်ဖက်၊ နေကြာ၊ စပါးနှင့် မြေပဲများကို သာ အစားထိုးစိုက်ပျိုးနေကြကြောင်းသိရသည်။
“ ခုနိုင်ငံရေး အခြေနေ ကုန်ဈေးနူန်းတွေနဲ့တော့ အဆင်မပြေတော့ဘူး။ တောင်သူတွေလည်း ပြောင်းစိုက်ရင် ရှုံးတယ်။ အကြွေးတွေလည်း ထူနေပြီ။ ကိုယ့်အတွက် စားဖို့တောင် သိပ်မကျန်တော့တဲ့ အခြေနေဖြစ်နေတယ်။ဒီကြားထဲ စစ်ကောင်စီယော (PNO) ကိုပါ ငွေပေးနေရတော့ ပိုခက်ခဲတာပေါ့” ဟု ဒေသခံ အမျိုးသမီး တစ်ဦးက ဆိုသည်။
ယခင်နှစ်များတွင် ပြောင်းတစ်ပိဿကို ၃ထောင်ကျော်မျှ ရရှိခဲ့သော်လည်း အာဏာသိမ်းပြီး ကာလတွင် ပြောင်းပွဲစားများထပ်ဆင့် ဈေးနှိမ်မှုကြောင့် တစ်ပိဿလျှင် ကျပ်ငွေ ၈၀၀ မျှသာ ရတာကြောင့် အရှုံးဖြင့် ရင်ဆိုင်နေကြရသည်။
ပြောင်းကို တစ်နှစ်လျှင် တစ်ကြိမ်တွင် စိုက်ပျိုးကြပြီး မိုးရာသီအစ ဇွန်လမှ စတင်ကာ ဒီဇင်ဘာလတွင် ပြန်လည် ရိတ်သိမ်းကြသည်။
လက်ရှိ ကျောက်နီ ကျေးရွာအုပ်စုတွင် စစ်မှုထမ်းရန်အတွက် စစ်ကောင်စီမှ ငွေကြေးကောက်ခံနေပြီး ပအိုဝ်းပြည်သူစစ် (PNO) မှလည်း ဆက်ကြေးကောက်ခံနေကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
