သျှမ်းပြည်တောင်ပိုင်း လင်းခေးမြို့နယ်တွင် မိုးရွာသွန်းပြီး နမ့်တိန်းချောင်းရေ မြင့်တက်မှုကြောင့် ပြည်သူနေအိမ် တစ်ထောင်ဝန်းကျင်နှင့် လယ်ယာစိုက်ခင်းများ ဧက ၃၀၀၀ ခန့် ရေနစ်မြှုပ်နေကြောင်း‌ေသတင်းရရှိသည်။

ပြီးခဲ့သည့် သြဂုတ်လ ၂၅ ရက်မှ စတင်၍ နမ့်တိန်းချောင်း ရေမြင့်တက်လာပြီး ယနေ့ (သြဂုတ်လ ၂၇ ရက်) အထိ ရေများ ဆက်လက်မြင့်တက်နေကြောင်း သိရသည်။

ထို့ကြောင့် နမ့်တိန်းချောင်း အနီးတဝိုက်ရှိ ဈေးတန်းရပ်ကွက်၊ ရွာမ အရှေ့ရပ်ကွက်၊ ဒါးဆိပ်ရွာ၊ နမ့်အွန်ရွာ၊ ပင်ထနောင်းရွာ၊ ဝမ်မပျဉ်းရွာ၊ တောင်ရွာရပ်ကွက်နှင့် ကမ္မဌာန်းကျောင်း အပြင် လင်းခေးမြို့ တောင်ဘက် မအွန်လောင်းရွာ၊ နားကုန်းရွာ၊ စလောင်းရွာ စသည့် ရပ်ကွက်နှင့် ကျေးရွာများရှိ ဒေသခံ နေအိမ် (၁၀၀၀) ဝန်းကျင် ရေကြီးရေလျှံမှုများ ကြုံတွေ့နေကြောင်း ဒေသခံများက ပြောသည်။

“မိုးတွေလည်း ရွာနေတုန်းပဲ။ ဒီနေ့ထိ ရေတွေ ဆက်တက်နေတုန်း၊ တချို့တွေလည်း ပြောင်းရွှေ့နေရတယ်။ ကျောင်းတွေကလည်း ပိတ်ထားရတယ်။ ဒီနေ့ထိ မိုးတွေ ဆက်ရွာနေတော့ ခါးလောက်ရှိတယ်။ တချို့နေရာဆို ၃ ပေ လောက် ရေတက်လာတယ်။ အိမ်ခြေတွေဆိုရင်တော့ ထောင်ဂဏန်း ဝန်းကျင်လောက်ရှိမယ်”ဟု လင်းခေးဒေသခံတစ်ဦးက ပြောသည်။

နမ့်တိန်းချောင်းရေ ဆက်လက်မြင့်တက်မှုကြောင့် လယ်ယာစိုက်ခင်း ဧက ၃၀၀၀ ဝန်းကျင်ခန့် ရေနစ်မြှုပ်နေပြီး၊ ကားလမ်းမကြီးပေါ်တွင်လည်း ရေလျှံနေကာ သွားလာရန်လည်း ခက်ခဲနေကြောင်း လင်းခေးမြို့ ဒေသခံအမျိုးသမီးတစ်ဦးက ဆက်ပြောသည်။

“ရေတွေက ဆက်တက်နေတော့ လယ်တွေ၊ စပါးခင်းတွေ၊ ပြောင်းဖူးခင်း နှမ်းခင်းတွေကလည်း ရေတွေ မြှုပ်ကုန်ပြီ။ ဘယ်သူမှလည်း လယ်ထဲသွားလို့ မရတော့ဘူး။ ဒေသခံတွေ အတွက်ကတော့ စားဖို့သောက်ဖို့က ရှာစားရခက်ပြီ”ဟု လင်းခေးမြို့ ဒေသခံအမျိုးသမီးတစ်ဦးက ပြောသည်။

လက်ရှိ ရေဘေးသင့်နေသော ဒေသခံများကို နီးစပ်ရာ ရွာနှင့် ကုန်းမြင့်ပိုင်းသို့ ပြောင်း‌ရွှေ့ပေးထားပြီး ကျန်ရှိနေသော ဒေသခံအတွက် စားသောက်ရန်အတွက် အခက်အခဲများ ကြုံတွေ့နေရပြီး လှေဖြင့် သွားလာနေရကြောင်း သိရသည်။

“တချို့တွေလည်း အိမ်အကြီးတွေ မြင့်တဲ့အိမ်တွေမှာ ပြောင်းရွှေ့နေကြရတယ်။ ချက်စားဖို့က ခက်တော့ အချင်းချင်းပဲ ပြန်ကူညီပြီး ပြန်လှူနေရတယ်။ သောက်ဖို့ ရေတွေ၊ ဆေးတွေလည်း အခက်အခဲတွေ ဖြစ်နေတယ်”ဟု ၎င်းက ဆက်ပြောသည်။

လင်းခေးမြို့နယ်တွင် လွန်ခဲ့သည့် ၂၀၀၄ ခုနှစ်တွင်လည်း ရေကြီးမှုဒဏ်ကို ဆိုးရွာစွာ ကြုံတွေ့ခဲ့ရပြီး ရေ‌ဘေးကြောင့် လူသေဆုံးမှုများ ရှိခဲ့ကြောင်း သိရသည်။