သျှမ်းပြည် သီပေါမြို့ကို စစ်ကောင်စီတပ်မှ လူအိပ်မောကျနေသည့် ညအချိန် လေကြောင်းဖြင့် အပြင်းအထန် ဗုံးကြဲတိုက်ခိုက်ခဲ့ရာ စာသင်ကျောင်းတွင် နေထိုင်သည့် အရပ်သားနှစ်ဦး သေဆုံးသွားခဲ့ကြောင်း စုံစမ်းသိရသည်။
ယနေ့ (ဩဂုတ်လ ၂၇ ရက်) နံနက် ၁ နာရီခန့်မှ စတင်၍ သီပေါမြို့ပေါ် ရပ်ကွက်များသို့ စစ်ကောင်စီတပ်မှ ဂျက်ဖိုက်တာနှင့် Y-12 ထောက်ပို့လေယာဉ် နှစ်စီးဖြင့် လေကြောင်းမှ အပြင်းအထန် ဗုံးကြဲတိုက်ခိုက်ခဲ့ရာ အမက-(၃) စာသင်ကျောင်းအတွင်း နေထိုင်သည့် အရပ်သား(၂) ဦး သေဆုံးသွားခဲ့ကြောင်း သီပေါဒေသခံများက ပြောသည်။
“ရဟတ်ယာဉ်ကော ဂျက်ဖိုက်တာကော နှစ်စီးတူတူလာတာ။ ရဟတ်ယာဉ်ကတော့ မြို့ပေါ်ဝဲနေပြီး ချချင်တဲ့နေရာ ချတာ။ အနောက်ရပ်က အထက (၃) နဲ့ အမက(၃) မိန်းကလေးကျောင်းမှာလည်း ကျတယ်။ သိရတာတော့ အခုထိ သေတာဆိုရင် ၂ ယောက်ရှိပြီ။ အမှတ်(၃) ကျောင်းထဲမှာ နေတဲ့ တစ်ယောက်ကတော့ ဗုံးသံလှန့်ပြီး ဆုံးတာ”ဟု သီပေါမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
သီပေါမြို့ပေါ် ရပ်ကွက်များသို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ခြင်းကြောင့် အထက(၃)၊ အမက(၃) စာသင်ကျောင်း နှစ်ကျောင်းနှင့် ဧမာနွေလ ဘုရားကျောင်းတို့အပြင် နေအိမ်အများအပြား ထိခိုက်ပျက်စီးခဲ့ပြီး အုတ်ကျင်းရပ်ရှိ စာသင်ကျောင်းအနီးနေထိုင်သည့် ကိုအောင်နိုင်နှင့် ဦးဖိုးလူတို့နှစ်ဦး သေဆုံးသွားခဲ့ကြောင်း သီပေါဒေသခံများက ပြောသည်။
အလားတူ ယမန်နေ့ (ဩဂုတ်လ ၂၆ ရက်) နံနက်အစောပိုင်းတွင် သီပေါမြို့နယ် နားမခေါ်ကျေးရွာသို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့စဉ် ဝမ်းဗိုက်တွင် ဒဏ်ရာရရှိခဲ့သည့် အသက်(၁၀)နှစ်အရွယ် စိုင်းဆိုင်မွန်း သည် မိုင်းကိုင်ဆေးရုံမှ တောင်ကြီးသို့ ထပ်မံလွှဲပြောင်းစဉ် လမ်းခရီးတွင် သေဆုံးသွားခဲ့ကြောင်း မိသားစုနှင့် နီးစပ်သူများထံမှ သိရသည်။
သီပေါမြို့နယ်တွင် တိုက်ပွဲဖြစ်ပွားသည့် ဇူလိုင်လ (၁၉) ရက်မှ ဩဂုတ်လ (၁၉) ရက်အတွင်း စစ်ကောင်စီတပ်မှ လက်နက်ကြီးနှင့် လေကြောင်းဖြင့် ပစ်ခတ်တိုက်ခိုက်မှုကြောင့် အရပ်သား (၁၉) ဦး သေဆုံးကာ (၁၉) ဦး ဒဏ်ရာရပြီး နေအိမ် (၁၁၀) ခန့် ပျက်စီးခဲ့ကြောင်း ရှမ်းလူ့အခွင့်အရေးမဏ္ဍိုင်မှ ယမန်နေ့ (ဩဂုတ်လ ၂၆ ရက်) တွင် ထုတ်ပြန်ထားသည်။
လက်ရှိတွင် သီပေါမြို့ပေါ် တိုက်ပွဲရပ်တန့်နေသော်လည်း TNLA တပ်ဖွဲ့ ထိန်းချုပ်ထားသည့် မြို့တွင်းရပ်ကွက်များသို့ စစ်ကောင်စီတပ်မှ လက်နက်ကြီးဖြင့် တဘက်သက် ရမ်းသမ်းပစ်ခတ်နေကြောင်း ဒေသခံများက ပြောသည်။
ထို့အပြင် ကိုးကန့်တပ်ဖွဲ့ MNDAA မှ သီပေါမြို့နယ် နောင်ကော်ကြီးရွာ အခြေစိုက် ခလရ-(၁၄၇) တပ်ကို သိမ်းပိုက်နိုင်ပြီးနောက် စစ်ကောင်စီတပ်မှ အနီးအနား ကျေးရွာများသို့ လေကြောင်းဖြင့် ဗုံးကြဲတိုက်ခိုက်နေကြောင်း သိရသည်။
Leave a Comments