သျှမ်းပြည် အရှေ့ပိုင်းတွင် ချိုင့်ခွက်များသည့် တာချီလိတ်-ကျိုင်းတုံလမ်းကြောင်း ကားသမားများ သွားလာရန်ခက်ခဲနေကြောင်း စုံစမ်းသိရသည်။

တာချီလိတ်-ကျိုင်းတုံ လမ်းပိုင်းသည် ၁၀၅ မိုင်သာ ဝေကွားပြီး၊ လမ်းကောင်းမွန်ပါက ၂နာရီခွဲသာ ကားမောင်းရကြောင်း၊ လက်ရှိတွင် ကားလမ်း ပျက်စီးမှု၊ ယာဉ်ကြောများ ပိတ်သဖြင့် ၄နာရီခွဲကျော် မောင်းရကြောင်း ယာဉ်မောင်းအမျိုးသားတစ်ဦးက သျှမ်းသံတော်ဆင့်ကို ပြောသည်။

‘’ အဓိကတော့ ကျိုင်းတုံ-မိုင်းဖြတ်လမ်းကြားက အဆိုးဆုံးပဲ။ ကုန်သည်ကားတွေသွားလာများတော့ ချိုင့်ခွက်တွေဖြစ်ကုန်တယ်။ ကားအသေးဆို သွားဖို့ မလွယ်ဘူး။ ကားမောင်းတာ တော်တော်ကိုအချိန်ပေးရတယ်။ ကားဆို ခဏခဏပျက်တယ် ’’ဟု ၎င်းကပြောသည်။

ကားလမ်းပျက်စီးမှု၊ ကားပိတ်ဆို့သည်ကို ဘယ်အာဏာပိုင်မှ လာရောက်ဖြေရှင်းမှု မရှိကြောင်း လမ်းပိုင်းအား တာဝန်ယူထားသည့် ကုမ္ပဏီလည်း ကားလမ်းကို သေချာ ပြုပြင်ခြင်းမရှိကြောင်းလည်း မိုင်းဖြတ်မြို့နယ်ခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

‘’ လမ်းစပျက်တာ ဇွန်လကတည်းကပဲ ချိုင့်ခွက်နေရာကို သဲနဲ့ဖို့တယ်။ ကားကြီးသွားရင် ပြန်ပြန်ပျက်တယ်။ အမှန်ဆို လမ်းအသစ်ပြန်ခင်းပေးရမှာ။ လမ်းအာဏာပိုင်တွေလည်း ပြန်လည်ပြုပြင်ပေးတာမရှိဘူး’’ဟု ၎င်းကပြောသည်။

ထို့အပြင် လမ်းပိုင်း ပျက်စီးမှု၊ လမ်းကြောင်းပိတ်ဆို့မှုသည် မကြာခဏဖြစ်ပွားသော်လည်း လမ်းကြောင်းကို သေချာပြုပြင်ခြင်းမရှိသည့်အတွက် ပျက်စီးရကြောင်းလည်း ဒေသခံပြောဆိုချက်အရ သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။