သျှမ်းပြည် ဆီဆိုင်မြို့သို့ ပို့ဆောင်ခံရသည့် အခြားပြည်နယ်က စစ်မှုထမ်းသင်တန်းဆင်း တပ်သားသစ်များ သေဆုံးမှုများနေကြောင်း သိရသည်။

သြဂုတ်လဆန်းမှစ၍ ဆီဆိုင်မြို့နယ်တွင် စစ်ကောင်စီတပ်နှင့် ပအိုဝ်းအမျိုးသားလွတ်မြောက်ရေး တပ်မတော် PNLA တို့ တိုက်ပွဲပြန်ဖြစ်ပွားလာရာ တစ်လနီးပါးအတွင်း စစ်ကောင်စီတပ်ဖွဲ့ဝင် ၅၀ ခန့်သေဆုံးခဲ့သည်ဟု PNLA ကသြဂုတ် ၂၄ ရက်တွင် ထုတ်ပြန်ထားသည်။

တိုက်ပွဲအတွင်း သေဆုံးသွားခဲ့သည့် စစ်ကောင်စီတပ်ဖွဲ့ဝင်များမှာ စစ်မှုထမ်းသင်တန်းဆင်းမှ တပ်သားသစ်များ ဖြစ်ကြပြီး ဆီဆိုင်မြို့နယ် ခမရ (၄၂၃)၊ (၄၂၅) တပ်ရင်းသို့ ပို့ခံရသည်မှာ တစ်လဝန်းကျင်သာရှိသေးကြောင်း၊ ရှေ့တန်းသို့ ပို့ဆောင်ခံရကြောင်း PNLA ဖမ်းမိသည့် စစ်သုံ့ပန်းများ၏ ထွက်ဆိုချက်အရ သိရသည်။

“လက်ရှိအနေအထားကတော့ တိုက်ပွဲဖြစ်ပွားနေဆဲလို့ ပြောရမှာဖြစ်ပါတယ်။ တိုက်ပွဲအတွင်း သေဆုံးတဲ့ စစ်ကောင်စီတပ်သားတွေဟာ ၄၂၃ ၊ ၄၂၄ က တပ်တွေနဲ့ စစ်ကောင်စီလက်အောက်ခံ PNO ပြည်သူ့စစ်တွေဖြစ်ပါတယ်။ သေဆုံးတဲ့သူတွေဟာ ဖမ်းမိတဲ့ စစ်သုံ့ပန်းတွေရဲ့ ထွက်ဆိုချက်အရ အများစုက တပ်သားသစ်တွေဖြစ်ပြီး ဆီဆိုင်ကို အပို့ခံရတာ တလဝန်းကျင်သာရှိသေးတဲ့ သူတွေဖြစ်ပါတယ်” ဟု PNLA ၏ ပြန်ကြားရေးတာဝန်ခံ ခွန်ရိန်းယံက သျှမ်းသံတောဆင့်ကို ပြောသည်။

အဆိုပါ တခြားပြည်နယ်ဖြစ်သည့် စစ်ကိုင်းတိုင်း ရွှေဘိုမြို့ဘက်မှ တက်လာသည့် စစ်သင်တန်းဆင်း တပ်သားသစ်များဖြစ်ကြောင်း သိရသည်။

ထို့အပြင် တိုက်ပွဲအတွင်း လက်နက်ငယ် ၁၄ လက်၊ ၆၀ မမ ပြောင်းတို ၁ လက်နှင့် ဒရုန်း ၂ စင်း သိမ်းဆည်းရမိကြောင်း ထုတ်ပြန်ချက်၌ရေးသားဖော်ပြထားသည်။

ထိုတိုက်ပွဲအတွင်း စစ်ကောင်စီတပ်မှ လေယာဉ်ဖြင့် ပေါင် ၅၀၀ ဗုံး၊ ပေါင် ၃၀၀ ဗုံးဖြင့် အသုံးပြုပြီး တိုက်ခိုက်သကဲ့သို့ လက်နက်ကြီးဖြင့်လည်း ပစ်ခတ်တိုက်ခိုက်ခဲ့သည်မှာ အကြိမ်ပေါင်း ၁၀၀ ရှိကြောင်း ဆိုသည်။

စစ်ကောင်စီတပ်၏ လက်နက်ကြီး ပစ်ခတ်မှုကြောင့် ဒေသခံ ၁ ဦးသေဆုံးပြီး ၃ ဦး ထိခိုက်ဒဏ်ရာရရှိခဲ့သည်ဟု PNLA ကထုတ်ပြန်ထားသည်။

လက်ရှိ ဆီဆိုင်မြို့နယ်အတွင်း တိုက်ပွဲကြောင့် စစ်ဘေးရှောင် ၃,၀၀၀ ကျော် ထွက်ပြေးတိမ်းရှောင်နေရပြီး စားနပ်ရိက္ခာနှင့် အမိုးအကာလိုအပ်နေသည်ဟု စစ်ဘေးရှောင်ကူညီသူများထံမှသိရသည်။