သျှမ်းပြည် လင်းခေးခရိုင်တွင် နမ့်တိန်းချောင်းရေကြီးမှုကြောင့် ဈေးတန်းရပ်ကွက်နှင့် ဝမ်းပျဉ်ရပ်ကွက်ရှိ နေအိမ် ၂၀ ကျော် ရေလျှံ ၊ ရေမြုပ် ရှိနေသည်ဟု စုံစမ်းသိရသည်။
(ဩဂုတ်လ ၂၄ ရက်)မှ ရေစတင်တက်လာပြီး ယနေ့ (ဩဂုတ်လ ၂၆ရက်)နေ့အထိ ရေပိုမိုမြင့်နေကြောင့် ဈေးတန်းရပ်ကွက်နေအိမ်များ ရေလျှံ ၊ ရေမြုပ်မှုတွေရှိသည်။
လက်ရှိတွင် နေအိမ်အတွင်းရှိပစ္စည်းများ သယ်ထုတ်ပြီး ဆွေမျိုးရှိနေအိမ်များကို ခိုလှုံနေရကြောင်း မြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
‘’ ဒီလ ၂၄ ရက်ကတည်းကစပြီး ရေတက်လာတယ် ဒီနေ့အထိပဲ ရေပိုတက်လာပြီး နေအိမ်တွေ ရေမြှုပ်ကုန်တယ်။ လက်ရှိအနေအထားတော့ သယ်စရာပစ္စည်းတွေ လာရောက်ဝိုင်းဝန်းကူညီပေးတယ်။ အမျိုးအိမ်တွေမှာ ခိုလှုံနေကြတယ်’’ ဟု ၎င်းက ပြောသည်။
ရေလျှံမှုကြောင့် လင်းခေးမြို့နယ် ဘေးပတ်လည်ရှိ မက်အွန်လောင်း ၊ ခုမ်အွတ် ၊ နားကုန်းကျေးရွာတစ်လျှောက်တွင် စပါးခင်းပျက်စီးမှု ဧက ၃ထောင်နီးပါးလောက်ရှိသည်ဟု သိရသည်။
အလားတူ ထိုနားကုန်းကျေးရွာတွင်းရှိ ဘုန်းကြီးကျောင်းတွင် ရေပိုမိုမြင့်တက်နေကြောင့် လှေဖြင့်သာသွားလာ ပြုလုပ်နေရကြောင်း သိရသည်။
” ဘေးရွာက မက်အွန်လောင်း၊ ခုမ်အွတ်၊ နားကုန်းကျေးရွာတစ်လျှောက်တော့ စပါးခင်းတွေမြှုပ်ကုန်တယ်။ ပျက်စီးမှုက ဧက ၃ထာင်နီးပါးလောက်ရှိတယ်။ နားကုန်းဘုန်းကြီးကျောင်းဆို လှေနဲ့တောင်သွားရတယ် ရေတွေအရမ်းတက်တယ် ” ဟု ၎င်းကပြောသည်။
မိုးဆက်တိုက်ရွာသွန်းမှုကြောင့် သျှမ်းပြည်တောင်ပိုင်း လင်းခေးခရိုင် ဟိုမိန်း-လင်းခေးလမ်းပိုင်း သံလွင်မြစ်နှင့် နမ့်စန်တိန်းချောင်းဆုံရာ (တာဆွတ်တိန်း)ကူးတို့ဆိပ်၌ ဩဂုတ်လ ၁၄ ရက်နေ့မှစတင်ပြီး သံလွင်မြစ်ရေ စိုးရိမ်ရေမှတ်အထက် မြင့်တက်တက်လာမှုကြောင့် ကားလမ်းနှင့် လူနေအိမ် ရေမြှုပ်မှုများဖြစ်ပြီး ရေဘေးဒုက္ခကြုံနေရကြောင်း သိရသည်။
ထို့အပြင် ၂၀၀၄ ခုနှစ်တွင်လည်း ရေမြင့်တက်မှုကြောင့် လှေဖြင့်ရေကူးရာ ဒေသခံ ၃ ဦးသေဆုံးမှုရှိသည်ဟု ဒေသခံပြောဆိုချက်အရ သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments