ဒေသကာကွယ်ရေးနှင့် လုံခြုံရေးကိစ္စရပ်များကို ဆောင်ရွက်နိုင်ရန် စစ်အင်အား တစ်သောင်းဖြင့် စီမံဆောင်ရွက်သွားမည်ဟု ပအိုဝ်းပြည်သူ့စစ် PNO က ထုတ်ပြန်လိုက်သည်။
ယနေ့ ( သြဂုတ် ၂၁) ရက်တွင် ပင်လောင်းမြို့နယ် နောင်တရားမြို့တွင် ပအိုဝ်းပြည်သူ့စစ် PNO ဦးဆောင်ပြီး သင်တန်းအောင်ပွဲ အခမ်းအနားကို ကျင်းပပြုလုပ်ခဲ့ကြောင်း ပင်လောင်းမြို့ဒေသခံတစ်ဦးက သျှမ်းသံတော်ဆင့်ကို ပြောသည်။
“ဟုတ်တယ်။ ဒီနေ့နောင်တရားမှာ သင်တန်းဆင်းပွဲလုပ်သွားတာ။ အဓိကတော့ စစ်အင်အားပြချင်တာပေါ့။ ဒါပေမဲ့ လက်နက်တွေတော့ မတွေ့ရဘူး။ စစ်ဝတ်စုံပဲတွေ့ရတယ်” ဟု ပင်လောင်းမြို့ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
ထို့အပြင် ဒေသကာကွယ်ရေးနှင့် လုံခြုံရေးကိစ္စရပ်တွေကို ဆောင်ရွက်နိုင်ရန် အမှတ်စဉ် (၁)၊ စစ်အင်အား (၁) သောင်းဖြင့် စီမံဆောင်ရွက်သွားမှာဖြစ်ကြောင်းလည်း PNO ထုတ်ပြန်ချက်၌ ရေးသားဖော်ပြထားသည်။
သြဂုတ်လ ပထမပတ် ကစပြီး အသက် ၁၈ နှစ်မှ အသက် ၄၀ နှစ်အရွယ် ဆောင်းပြောင်း ဒေသခံများကို PNO တပ်ထဲ စစ်မှုထမ်းရမည်ဟု ပြောဆိုထားသကဲ့သို့ ထွက်ပြေးနေရသည့် စစ်ဘေးရှောင်များကိုလည်း PNO တပ်ထဲဝင်ကြောင်းလက်မှတ်ထိုးမှသာလျှင် ပြန်လာနေခွင့်ပြုမည်ဟု ခြိမ်းခြောက်ခဲ့သေးကြောင်း ဒေသခံများကပြောသည်။
Leave a Comments