သျှမ်းပြည်တောင်ပိုင်း၊ ရွှေညောင်မြို့နယ် မြို့ပေါ်ရပ်ကွက် အချို့တွင် ရာအိမ်မှူးမှ စစ်မှုထမ်းအတွက် ငွေအတင်းအကြပ်ကောက်ခံမှုများရှိနေကြောင်း ဒေသခံများထံမှ သိရသည်။
ဩဂုတ်လအတွင်း ရွှေညောင်မြို့၊ မြို့ပေါ်ရပ်ကွက်အချို့တွင် စစ်မှုထမ်းအကြောင်းပြကာ ငွေအတင်းအကြပ်ကောက်ခံမှုများရှိနေကြောင်း မြို့ခံတစ်ဦးကပြောသည်။
“ယောကျ်ားလေးရှိတဲ့ အိမ်တိုင်းကိုကောက်တာ တအိမ်ကို ၃ သောင်းကျပ်၊ အစည်းအဝေးတွေ ခေါ်တာမျိုးလည်း မကြားမိဘူး။ အိမ်တိုင်ရာရောက်လိုက်ကောက်နေတာ၊ ယောကျ်ားလေးမရှိတဲ့ အိမ်တွေကိုလည်း ရသလောက် လိုက်ကောက်နေတာ” ဟု မြို့ခံ တစ်ဦးက သျှမ်းသံတော်ဆင့်သို့ပြောသည်။
ထိုသို့လိုက်လံကောက်ခံနေသည့် အတွက် ပြည်သူများ အဆင်မပြေမှုများစွာကြုံတွေ့နေရပြီး လက်လုပ်လက်စား မိသားစုများအတွက် အခက်အခဲများစွာကြုံတွေ့နေကြောင်းလည်းသိရသည်။
“မထည့်ရင်လည်း မဲနှိုက်ခိုင်းပြီး ကျတဲ့ သူကိုမသွားမနေရလုပ်မယ်လို့လည်းပြောတယ်၊ ရတဲ့နည်းနဲ့တော့ ယူနေတာပဲ၊ မိဘတွေကလည်း စိုးရိမ်တော့ ထည့်ကြရတာပေါ့” ဟု ၎င်းဆက်ပြောသည်။
ငွေကောက်ခံနေသည့် ရာအိမ်မှူးသည် အမျိုးသမီး ဖြစ်ပြီး၊ ယခင်ကလည်း စစ်ကောင်စီနှင့် ပူးပေါင်းပြီး သတင်းပေးသည့် အလုပ်များလုပ်နေသောကြောင့် ရွှေညောင် PDF မှ သတိပေးစာပေးပို့ခံထားရဖူးကြောင်းလည်းသိရသည်။
“အရင်ကလည်း PDF တွေဆီက သူ့ကို စစ်တပ်နဲ့ ပူးပေါင်းနေတာရပ်ဖို့ ကျည်ဆံနဲ့ သတိပေးစာပို့ခံရဖူးတယ် ဒါလည်း ဆက်လုပ်နေတာပါပဲ” ဟု မြို့ခံတစ်ဦးကပြောသည်။
ပြီးခဲ့သည့် ဇူလိုင်လကုန်ပိုင်းကလည်း တောင်ကြီးနှင့် ညောင်ရွှေမြို့နယ် နန်းပန်မြို့များတွင်လည်း စစ်မှုထမ်းရန်အကြောင်းပြချက်များဖြင့် ငွေကျပ် ၁ သိန်းခွဲမှ ၄ သိန်းထိ ကောက်ခံမှုများရှိခဲ့ကြောင်းလည်းသိရသည်။
လက်ရှိတွင် နိုင်ငံတဝန်း၌ စစ်ကောင်စီမှ အင်အားပြုန်းတီးမှုများစွာဖြစ်ပေါ်နေပြီး စစ်အင်အားဖြည့်တင်းရန်အတွက် စစ်မှုထမ်းဥပဒေပြဌာန်းပြီးနောက် နိုင်ငံအနှံ့တွင် စစ်မှုထမ်းဥပဒေအားအကြောင်းပြကာ ငွေကြေးကောက်ခံမှုများလည်း ဆိုးဝါးလာကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments