ကချင်ပြည်နယ် မိုးမောက်မြို့အခြေစိုက် စစ်ကောင်စီ ခြေမြန်တပ်ရင်း ခမရ-၄၃၇ ကို ကချင်လွတ်လပ်ရေးတပ် KIA က သိမ်းပိုက်လိုက်ပြီး မြို့ကို ထိန်းချုပ်နိုင်သော်လည်း အုပ်ချုပ်ရေးယန္တရား မချမှတ်နိုင်သေးကြောင်း စုံစမ်းသိရသည်။

ပြီးခဲ့သည့် ဇူလိုင်လ ၂၄ ရက်က မိုးမောက်မြို့အခြေစိုက် စစ်ကောင်စီ ခြေမြန်တပ်ရင်း ခမရ-၄၃၇ ကို ကချင်လွတ်လပ်ရေးတပ် KIA က ပြန်လည်ထိုးစစ်ဆင် တိုက်ခိုက်ခဲ့ရာ ဩဂုတ်လ (၁၉) ရက်နေ့တွင် တပ်ရင်းတစ်ခုလုံးကို အပြီးသတ် သိမ်းပိုက်နိုင်ခဲ့ကြောင်း KIA ပြောရေးဆိုခွင့်ရှိသူ ဗိုလ်မှူးကြီး နော်ဘူ က အတည်ပြုသည်။

“မှန်ပါတယ်၊ မိုးမောက်က ခမရ-၄၃၇ စခန်းကို ဇူလိုင်လ ၂၄ ရက်ကနေ စပြီးတော့ ဩဂုတ်လ ၁၉ ရက်မှာ အပြီးကတော့ ၂၀ ရက်နေ့မှာ သိမ်းပိုက်နိုင်ပါတယ်။ ခမရ-၄၃၇ ရဲ့ တာဝန်က သူတို့ရဲ့ ဗန်းမော် လုံခြုံရေးအတွက် အဓိက ဖြစ်ပါတယ်။ ခမရ-၄၃၇ ကို ကျနော်တို့ သိမ်းပြီးတဲ့ နောက်ပိုင်းမှာ ဗန်းမော်ရဲ့ လုံခြုံရေးကတော့ စိုးရိမ်ရတာပေါ့”ဟု ဗိုလ်မှူးကြီး နော်ဘူ က သျှမ်းသံတော်ဆင့်ကို အတည်ပြု ပြောဆိုသည်။

ကချင်လွတ်လပ်ရေးတပ် KIA မှ သိမ်းပိုက်ရရှိသည့် မိုးမောက်မြို့အခြေစိုက် စစ်ကောင်စီလက်အောက်ခံ ခမရ-၄၃၇ တပ်ရင်းသည် တိုက်ခိုက်ရေးတပ်ရင်း (၁၀) ခု အထိ ရှိထားပြီး ထောက်ပို့တပ်အပါအဝင် စုစုပေါင်း တပ်ရင်း(၁၂) ခုအထိ အင်အားစုဝေးလျက် ရှိကြောင်း ဗိုလ်မှူးကြီးနော်ဘူက ပြောသည်။

၎င်းတပ်ရင်းများသည် ပြီးခဲ့သည့် မတ်လမှ စတင်ခဲ့သည့် KIA ၏ ထိုးစစ်ကြောင့် မြစ်ကြီးနား-ဗန်းမော် ကားလမ်းမကြီးနှင့် ဗန်းမော်-လွယ်ဂျယ် ကားလမ်းမတလျှောက်ရှိ စစ်ကောင်စီ တပ်ရင်းများမှ ထွက်ပြေးလာသည့် တပ်များဖြစ်ပြီး မိုးမောက်မြို့ရှိ ခမရ-၄၃၇ တပ်ရင်းတွင် စုဝေးနေခြင်း ဖြစ်သည်။

“မိုးမောက်မြို့ကိုတော့ ထိန်းချုပ်နိုင်လို့ ရပါတယ်၊ အုပ်ချုပ်ရေးယန္တရား ချနိုင်တဲ့ အနေအထားတော့ မရှိသေးဘူး။ (ဗန်းမော်မှာ) အချင်းချင်းကတော့ တော်တော်ကပ်လာတဲ့ အနေအထားတော့ ရှိပါတယ်။ ဒါပေမယ့် သူတို့ကလည်း ထိုးစစ်ဆင်လာမလား ဆိုတာ စောင့်ကြည့်ရမှာပါ”ဟု ဗိုလ်မှူးကြီးနော်ဘူ က သျှမ်းသံတော်ဆင့်ကို ဆက်ပြောသည်။

မိုးမောက်အခြေစိုက် ခမရ-၄၃၇ တပ်ရင်းကို ကချင်လွတ်လပ်ရေးတပ် KIA မှ တိုက်ခိုက်စဉ်အတွင်း စစ်‌ကောင်စီတပ်မှ လက်နက်အင်အား၊ လူအင်အား အများအပြားဖြင့် ခုခံတိုက်ခိုက်ပြီး လက်နက်ကြီး၊ လေကြောင်းပစ်ကူအပြင် ဒရုန်းများလည်း အသုံးပြုခဲ့ခြင်းကြောင့် အရပ်သား ထိခိုက်သေဆုံးမှုနှင့် နေအိမ်ပျက်စီးဆုံးရှုံးမှု များပြားကြောင်း ဒေသခံများက ပြောသည်။

အလားတူ ဩဂုတ်လ ၁၉ ရက် နံနက်ပိုင်းတွင် ဗန်းမော်မြို့ဘက်မှ လက်နက်နှင့် လူအင်အားဖြည့်တင်းရန် စစ်ကြောင်းထိုးလာသည့် စစ်ကောင်စီယာဉ်တန်းကိုလည်း KIA နှင့် PDF ပူးပေါင်းတပ်ဖွဲ့က ကြားဖြတ်တိုက်ခိုက်နိုင်ခဲ့ပြီး စစ်ကားလေးစီးနှင့် သံချပ်ကာယာဉ်တစ်စီး မီးလောင်ပျက်စီးခဲ့ကြောင်း သိရသည်။