သျှမ်း-မန္တလေးနယ်စပ် ပြင်ဦးလွင်မြို့ကို လော့ဒေါင်းချမည်ဟု ယခုရက်ပိုင်း ကောလဟာလ သတင်းထွက်ပေါ်နေကြောင်း ဒေသခံများ ပြောသည်။
ပြင်ဦးလွင်မြို့သည် စစ်တပ် အမာခံမြို့ တစ်မြို့လည်းဖြစ်ပြီး စစ်တက္ကသိုလ်၊ တပ်မတော်နည်းပညာတက္ကသိုလ်၊ ဆက်သွယ်ရေးတပ်များရှိကာ စစ်ကောင်စီတပ်အတွက် အရေးပါသည့် မြို့ဖြစ်သည်။
လားရှိုး ရမခ တိုင်းစစ်ဌာနချုပ်ကို ညီနောင်မဟာမိတ် တပ်များက သိမ်းပိုက်နိုင်ပြီးနောက် ဩဂုတ်လ ဒုတိယပတ်မှ စတင်ပြီး ပြင်ဦးလွင်မြို့ကို တော်လှန်ရေးအင်အားစုများက လာရောက်တိုက်ခိုက်မည် ဆိုသည့် သတင်းထွက်ပေါ်လာကာ စစ်ကောင်စီတပ်မှ လုံခြုံရေးအတွက် စစ်အင်အားဖြည့်ပြီး လော့ဒေါင်းချမည်ဟု ကောလာဟလ သတင်းထွက်ပေါ်နေသည် ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“လော့ခ်ဒေါင်းချဖို့က သတင်းအမျိုးမျိုး ထွက်နေတယ်။ တရားဝင်ထုတ်ပြန်ပြီး ပြည်သူလူထုကို ပြောတာတော့ မရှိသေးဘူး။ ဖြစ်နိုင်ခြေ ဘယ်လောက်ရှိတာတော့ မပြောတတ်ဘူး။ စောင့်ကြည့်ရဦးမယ်။ ပြင်ဦးလွင်က သူတို့အတွက် အမာခံမြို့လည်းဖြစ်တယ်၊ လုံခြုံရေးအတွက် စစ်အင်အားဖြည့်နေတယ်”ဟု ၎င်းဒေသခံ အမျိုးသားက ပြောသည်။
လက်ရှိတွင် စစ်ကောင်စီတပ်နှင့်နီးသည့် ရပ်ကွက်များကိုသာ လုံခြုံရေး ဦးစားပေးနေပြီး၊ သျှမ်းမြောက်နှင့် မိုးကုတ်ဘက်မှ ဖြစ်ပွားနေသည့် တိုက်ပွဲများလည်း ကူးစက်လာမည်ကို စစ်ကောင်စီဘက်မှ စိုးရိမ်နေသည့် သဘောမျိုးဖြစ်နေကြောင်း ပြင်ဦးလွင်မှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“စစ်တပ်နဲ့နီးတဲ့ ရပ်ကွက်ကိုပဲ သူတို့ စာရင်းကောက်တယ်။ သျှမ်းမြောက်မှာ တိုက်ပွဲ အကြီးအကျယ် ဖြစ်တာတွေ့တော့ ဒီဘက်လည်း ဖြစ်မှာကို ကြောက်နေကြတယ်”ဟု ၎င်းအမျိုးသမီးက ပြောသည်။
အလားတူ ပြင်ဦးလွင်မြို့ပေါ်တွင် စစ်ဆေးမှုများ ရှိနေပြီး နောင်ချို-ပြင်ဦးလွင် အဝင်တွင် စစ်တပ် ကင်းစခန်းများ အထိုင်ချထားကာ မန္တလေး-ပြင်ဦးလွင်ကြားရှိ ရတနာပုံ ဆိုက်ဘာစီးတီးတွင်လည်း စခန်းချထားကြောင်း၊ ဇီးပင်ကြီးရှိ ဗဟိုဝန်ထမ်းတက္ကသိုလ်ဘက်တွင်လည်း စစ်အင်အား ဖြည့်တင်းထားကြောင်း သိရသည်။
ထို့ပြင် သျှမ်းပြည် ၁၃ မျဉ်းစောင်း နိုင်ငံသားမှတ်ပုံတင်ကတ် ကိုင်ဆောင်သူများကိုလည်း ပြင်ဦးလွင်မြို့သို့ ဖြတ်သန်းခွင့်မပြုကြောင်း ဒေသခံများထံမှ သိရသည်။
Leave a Comments