သျှမ်းပြည် အရှေ့ပိုင်း မိုင်းတုံမြို့နယ်တွင် မိုးသည်းထန်စွာရွာသွန်းမှုကြောင့် မိုင်းတုံ-တာဆန်းလမ်း ပြတ်တောက်သွားကြောင်း သတင်းရရှိသည်။
သြဂုတ် ၁၂ရက်မှ စတင်ပြီး မိုးအဆက်မပြတ်ရွာသွန်းမှုကြောင့် သြဂုတ် ၁၄ရက် ညနေပိုင်းတွင် မိုင်းတုံ-တာဆန်းလမ်းပြတ်တောက်မှု ဖြစ်ပွားကာ လက်ရှိတွင် ယာယီတံတားထိုးပေးထားကြောင်း မိုင်းတုံ ဒေသခံ အမျိုးသားတစ်ဦးက သျှမ်းသံတော််ဆင့်ကို ပြောသည်။
” လမ်းက ပြတ်တောက်သွားတာ။ အခုတော့ သွားလာလို့ရအောင် တံတားထိုးထားတယ်။ ကားကြီးတော့ ဖြတ်မရဘူး။ ယာယီတံတားဆိုတော့ မခိုင်ဘူးပေါ့” ဟု ၎င်းအမျိုးသားက ပြောသည်။
လက်ရှိယာယီတံတားပြုလုပ်ထားပြီး ဆိုင်ကယ်၊ ကားအသေးစားသာ သွားလာနိုင်အောင် တည်ဆောက်ထားသည်။
“ဆိုင်ကယ်နဲ့ ကားအသေးစားတွေလောက်ပဲ သွားလို့ရတယ်။ သက်ဆိုင်ရာ အာဏာပိုင်နဲ့ ပြည်သူတွေက လုပ်အားပေးတဲ့အနေနဲ့ ပါဝင်ကူညီကြတယ်။ ရေတွေက မကျသေးဘူး’’ဟု ၎င်းက ပြောသည်။
အဆိုပါ လမ်းပြတ်တောက်မှုသည် မိုးသည်းထန်စွာ ရွာသွန်းမှု တစ်ခုတည်းမဟုတ်ဘဲ ယခင် ဆောက်လုပ်ရေးဦးစီးဌာနမှ လမ်းပိုင်းဆောက်လုပ်ရာတွင် အစစအရာရာ ခိုးယူထားမှုကြောင့် ယခုကဲ့သို့ ဖြစ်ကြောင်းလည်း ဒေသခံများက သုံးသပ်ပြောသည်။
” လမ်းပြတ်တောက်သွားတာကြည့်လိုက်တော့ သူတို့တွေ ဆောက်တုန်းကခိုးထားတာ သိသာတယ်။ အောက်ခြေမခိုင်ဘူး။ အပေါ်ယံဘဲ ဆောက််လုပ်ထားတာ” ဟု မိုင်းတုံ ကားသမား တစ်ဦးက သျှမ်းသံတော်ဆင့်ကိုပြောသည်။
သျှမ်းပြည်အရှေ့ပိုင်းတွင် သစ်တောများ အလွန်အကျွံခုတ်ယူခြင်း၊ သတ္တုများအ လွန်အကျွံ တူးဖော်ခြင်း နှင့် တောတောင်တွင် သစ်ပင်များမရှိတော့သဖြင့် မိုးရွာသွန်းသည်အခါ မြေကြီးမှ ရေစုတ်ယူမှု မရှိတော့သဖြင့် ယခုကဲ့သို့ ရေကြီးရေလျှံမှု ဖြစ်ပွားလာရခြင်းဖြစ်ကြောင်း သဘာဝပတ်ဝန်းကျင်စောင့်ကြည့်လေ့လာသူကဆိုပြန်သည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments