သျှမ်းပြည် နောင်ချိုမြို့နယ် အင်းဝိုင်းရှိ ဆင်းရွှေလီသကြားစက် အဝင်လမ်းကို စစ်ကောင်စီတပ် အင်အားမဖြည့်နိုင်ရန် တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် PDF ပူးပေါင်းတပ်ဖွဲ့တို့က ဖြတ်တောက်လိုက်ကြောင်း စုံစမ်းသိရသည်။
ပြီးခဲ့သည့် ဩဂုတ်လ ၁၄ ရက် ညအချိန်တွင် နောင်ချိုမြို့နယ် အင်းဝိုင်းရှိ ဆင်းရွှေလီသကြားစက် အဝင်လမ်း နမ့်ဆိုင်ချောင်းကူးတံတား အကျော်တွင် TNLA ပူးပေါင်းတပ်များက ဘက်ဟိုးဖြင့် လမ်းပေါ် မြေတူးကာ စစ်ကောင်စီတပ် အင်အားမဖြည့်တင်းနိုင်ရန် လမ်းဖြတ်တောက်လိုက်ကြောင်း ဒေသခံများက ပြောသည်။
“ဆိုင်ကယ်နဲ့တောင် ဖြတ်သွားလို့ မရတော့ဘူး။ သကြားစက်ထဲ ဝင်တော့မယ့် လမ်းမှာ တမြန်နေ့ ညတုန်းက ဘက်ဟိုးနဲ့ မဟာမိတ်တပ်တွေ တူးလိုက်တာ။ မနေ့ကနေ ဒီနေ့အထိ စစ်ရှောင်တွေ ဖြတ်လို့မရတော့ဘူး။ ကုမ္ပဏီထဲ ဝင်မယ့်ကားတွေလည်း တံတားထိပ်မှာ ခံနေတယ်။ အဲ့ဘက်ကနေ စစ်ကောင်စီ အင်အားဖြည့်လာမှာ စိုးရိမ်တာ”ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့နယ် ပြည်ထောင်စုလမ်းမကြီးနှင့် ၈ မိုင်ခန့် ကွာဝေးသည့် အင်းဝိုင်းရှိ ဆင်းရွှေလီသကြားစက် အဝင်လမ်းကို TNLA ပူးပေါင်းတပ်က လမ်းဖြတ်တောက် လိုက်ခြင်းကြောင့် ဒေသခံများလည်း သွားလာရန် ခက်ခဲကြောင်း သိရသည်။
အခြားဒေသမှ စစ်ဘေးရှောင်များလည်း ဆမ္မဆယ်၊ ကံ့ကော်၊ သပြေဝန်း၊ လွန်းကျော်ဘက်မှတဆင့် ပြင်ဦးလွင်သို့ ဆက်လက်သွားရောက်ရကြောင်း ဒေသခံများက ပြောသည်။
“လယ်ကျင်းကွေ့ကနေ သကြားစက် ဆင်းသွားရင် ဘန့်ဘွေးအထိ လမ်းပေါက်တယ်။ ကြားထဲက ရွာတွေလည်း ပစ္စည်းဝယ်၊ ဟင်းဝယ် ဆို သွားလာလို့ မရတော့ဘူး၊ လမ်းလျှောက်ပဲ ရတော့မှာ။ ပြင်ဦးလွင်ကနေ ကုန်နဲ့ပစ္စည်းလည်း သယ်လာရောင်းလို့ မရတော့ဘူး”ဟု ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် ယမန်နေ့ (ဩဂုတ်လ ၁၅ ရက်) နေ့လယ် ၂ နာရီကျော်တွင် နောင်ချိုမြို့ပေါ် တိုက်ပွဲဖြစ်ပွားခြင်းမရှိဘဲ ဈေးရပ်ကွက်နှင့် ဘူတာရပ်ကွက်အကြား ယာယီဈေးအဖြစ် ဖွင့်လှစ်ရောင်းချသည့် နေရာကို စစ်ကောင်စီတပ်က လေကြောင်းဗုံးကြဲတိုက်ခိုက်ခဲ့ရာ ဗုံးဆံမပေါက်ကွဲခဲ့ခြင်းကြောင့် လူထိခိုက်မှု မရှိခဲ့ကြောင်း ဒေသခံများထံမှ သိရသည်။
Leave a Comments