သျှမ်းပြည်မြောက်ပိုင်း သီပေါမြို့နယ်ရှိ နမ့်လန်မြို့တွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ စစ်ရေးပြင်းထန်လာမည်ကို ဒေသခံပြည်သူများ လုံခြုံရေး စိုးရိမ်နေကြကြောင်း သတင်းရရှိသည်။
ယမန်နေ့ (သြဂုတ်လ ၁၄ ရက်)တွင် သီပေါမြို့နယ် နောင်ကော်ကြီးရွာ အခြေစိုက် စစ်ကောင်စီတပ် ခလရ-(၁၄၇) ကို ကိုးကန့်တပ်ဖွဲ့ MNDAA က သိမ်းပိုက်နိုင်ခဲ့ပြီး နမ့်လန်မြို့အနီးရှိ ကျေးရွာအုပ်စုများတွင် စစ်ကောင်စီနှင့် MNDAA တို့ တိုက်ပွဲနေ့စဉ် ဖြစ်ပွားလျက်ရှိသည်။
ထို့နောက် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ အပြန်အလှန် ပစ်ခတ်နေချိန် နမ့်လန်မြို့အခြေစိုက် စစ်ကောင်စီ၏ ခြေမြန်တပ်ရင်း ခမရ-(၅၀၆) အနီး ဗုံးဆံ ကျရောက်ပေါက်ကွဲခဲ့ခြင်းကြောင့် ပြည်သူများ စိုးရိမ်ကြောက်လန့်နေကြောင်း နမ့်လန်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့က နောင်ကော်တပ်စခန်းကို MNDAA က သိမ်းလိုက်ပြီ။ ၅၀၆ တပ်ကိုလည်း ပစ်ဗုံးနဲ့ ပစ်သွားတယ်။ ထပ်ပစ်တော့ အုံးဆီးရွာဘက်မှာ ကျသွားတယ်၊ နမ့်လန်နဲ့ အရမ်းနီးနေတယ်။ နမ့်လန်ထဲဝင်လာမှာ ပြည်သူတွေ အရမ်းကြောက်ရွံ့နေရပြီ ၊ ပစ္စည်းတွေတောင် ကြိုသိမ်းနေတယ်’’ ဟု နမ့်လန်မြို့မှ ၎င်းဒေသခံအမျိုးသားက ပြောသည်။
လက်ရှိ နမ့်လန်မြို့အနီး တိုက်ပွဲဖြစ်နေသည့် ကျေးရွာများသည် နမ့်လန်မြို့ထဲသို့ စစ်ရှောင်နေရကြောင်း၊ တိုက်ပွဲအခြေအနေကို စောင့်ကြည့်ရင်း စစ်ရှောင်များကို လက်ခံသွားမည် ဟုလည်း အသက် ၄၀ ကျော် ဒေသခံအမျိုးသားတစ်ဦးက ပြောသည်။
“တိုက်ပွဲဖြစ်နေတဲ့ ရွာတွေက လူတွေတော့ နမ့်လန်မြို့ထဲကို ခဏ လာရှောင်ကြတယ်။ ကျနော်တို့ နမ့်လန်က လူတွေကလည်း တိုက်ပွဲအခြေအနေကို စောင့်ကြည့်ပြီးတော့ စစ်ရှောင်ကို လက်ခံနေပါတယ်။ ဘာလို့ဆို ဒီမှာလည်း တိုက်ပွဲဖြစ်ရင် ထပ်ထွက်ပြေးရမှာလေ”ဟု ၎င်းအမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် နမ့်လန်မြို့ ဒေသခံများ၊ သက်ကြီးရွယ်အိုများ၊ ကလေးငယ်များကို လဲချားမြို့နှင့် ပင်လုံမြို့သို့ ကြိုတင်ထွက်ပြေး တိမ်းရှောင်နေရကြောင်း သိရသည်။
နမ့်လန်မြို့အခြေစိုက် စစ်ကောင်စီတပ်ရင်းများလည်း သီပေါမြို့ဘက်သို့ ဦးတည်၍ တစ်ဘက်သက် လက်နက်ကြီး ရမ်းသမ်းပစ်ခတ်နေခြင်းကြောင့် ဒေသခံများမှာ လုံခြုံရေး စိုးရိမ်ထိတ်လန့်နေရကြောင်း ဒေသခံများထံမှ သိရသည်။
သီပေါမြို့ပေါ်တွင်လည်း တအာင်း(ပလောင်)တပ်ဖွဲ့ TNLA ပူးပေါင်းတပ်ဖွဲ့တို့က စစ်ကောင်စီလက်အောက်ခံ ခလရ-(၂၃)၊ ခမရ-(၅၀၃၊ ၅၀၄) တပ်ရင်းတို့ကို ဆက်လက်ထိုးစစ်ဆင်နေပြီး တိုက်ပွဲပြင်းထန်လျက်ရှိသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments