သျှမ်းပြည်တောင်ပိုင်း၊ ဆီဆိုင်မြို့နယ် အရှေ့ဘက်ကျေးရွာ ဒေသခံများသည် သူခိုးများသောင်းကျန်းနေသောကြောင့် စစ်မရှောင်ဘဲ အိမ်စောင့်ရန် အမျိုးသားများ ကျန်နေခဲ့ကြောင်း စုံစမ်းသိရသည်။
ပြီးခဲ့သည့် (ဩဂုတ်လ ၆ရက်) မှ စပြီး ဆီဆိုင်မြို့ အရှေ့ဘက်ခြမ်းတွင် ပအိုဝ်းအမျိုးသား လွတ်မြောက်ရေးတပ်မတော် (PNLA ) နှင့် စစ်ကောင်စီ ၊ ပအိုဝ်းပြည်သူ့စစ် ( PNO) တို့တိုက်ပွဲ ပြင်းထန်စွာ ဖြစ်ပွားခဲ့ကြပြီး ဒေသခံ အချို့မှာ လက်နက်ကြီးပစ်ခတ်သည့် ကြားမှ နေအိမ်ကို စောင့်နေခဲ့ ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“သူခိုးတွေမိတယ်။ ၈ယောက် ၁၀ ယောက်လာက်ရှိတယ်။ နေအိမ်ပြန်သွားရင် ဘာမှ မရှိတော့မှာ စိုးရိမ်တယ်။ အဲကြောင့် မိသားစု တစ်ခုမှာ လူတစ်ယောက်တော့ အိမ်စောင့် ကျန်ခဲ့ကြတယ်။” ဟု ၎င်းဒေသခံ အမျိုးသား က ပြောသည်။
အဆိုပါ သူခိုးများကြောင့် ပြည်သူများ၏ နေအိမ်ထဲရှိ ပစ္စည်းများကို ခိုးယူခြင်း၊ ထိုသူခိုးများကို ပြည်သူများက ဖမ်းမိထားသော်လည်း မည်သည့်အဖွဲ့အစည်းမှ ကူညီဖြေရှင်းပေးခြင်းမရှိကြောင်း သိရသည်။
“ သူခိုးတွေက တစ်အိမ်လုံးကို မွေနှောက်သွားကြတာ။ ရောင်းစားလို့ရသမျှ အကုန်ယူသွားကြတာ ။ရေခဲသေတ္တာကမှ အစယူတာ။ စစ်ရှောင်တာတောင် စိတ်ဖြောင့်ဖြောင့် မရှောင်ရဲဘူး။”ဟု စစ်ရှောင်အမျိုးသမီးက ဆိုသည်။
ပြီးခဲ့သည့် ဇန်နဝါရီလ ၂၁ ရက်နေ့ကတည်းက ဆီဆိုင်မြို့နှင့် ကျေးရွာများတွင် တိုက်ပွဲဖြစ်ပွားခဲ့ပြီး တစ်မြို့လုံးနီးပါး သူခိုးကြောင့် ပစ္စည်းဥစ္စာ ဆုံးရှုံးမှုများကြောင်း သိရသည်။
အလုပ်သင်သတင်းထောက် နန်းလရောင် ရေးသားသည်။
Leave a Comments