သျှမ်းပြည်နယ်တောင်ပိုင်း၊ညောင်ရွှေမြို့နယ်၊စံကားဒေသခံများသည် ယခုတွင် ကျေးရွာထဲ ပြန်နေကြပြီးနောက် မြေမြှုပ်မိုင်း၊လက်နက်ကြီးအန္တရာယ်များနှင့်ရင်ဆိုင်နေကြရကြောင်း သတင်းရရှိသည်။

စံကားဒေသတွင် ပြီးခဲ့သည့် ဇူလိူင်လတစ်လလုံးတိုက်ပွဲ ပြင်းထန်စွာ ဖြစ်ပွားခဲ့ပြီးနောက် လက်ရှိမှာ တိုက်ပွဲငြိမ်သွားပြီးနောက် ဒေသခံနေအိမ်ခြံဝိုင်းအတွင်း မြေမြှုပ်မိုင်းများထောင်ထားခဲ့သည့်အပြင် မပေါက်ကွဲသေးသည့် လက်နက်ကြီးလည်း များစွာ ကျန်ရှိနေကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“ပြောင်းခြံထဲ တွေမှာ လက်တက်ကြီးတွေ မြေမြှုပ်မိုင်းတွေများစွာရှိတယ်။ ပြန်လာတဲ့ဒေသခံတွေ ခုဆို ခြံတွေမသွားရဲကြဘူး။ ဘယ်သူ့မှလည်းရှင်းပေးသူ မရှိဘူး။ မိုင်းရှိတဲ့နေရာ တွေ လက်နက်ကြီး ရှိတဲ့နေရာတွေ စာပဲကပ်ထားတယ်”ဟု ၎င်းဒေသခံအမျိုးသားက ပြောသည်။

တိုက်ပွဲဖြစ်ပွားသည့်အချိန်တွင် အရပ်သား၅ဦး ထိခိုက်ဒဏ်ရာရရှိပြီး၊ ပြောင်းဂိုဒေါင်တစ်ခုအပါအဝင် ပြည်သူနေအိမ်၁၅လုံးထက်မနည်းလည်း လက်နက်ကြီး ၊လက်နက်ငယ်ထိမှန်ပျက်စီးခဲ့ကြောင်း သိရသည်။

“ထိခိုက်တဲ့သူတွေတော့ တစ်ချို့က ဆေးကုသနေဆဲပဲ ။ပြောင်းဂိုဒေါင်က လုံးလုံးမီးလောင်သွားတယ်။ အိမ်တွေ ကျတော့ လက်နက်ကြီးပေါက်ကွဲစထိတာ ကျည်ဆံထိတာတွေ အသေးစား ပျက်စီးတာ များတယ်”ဟု အသက် ၃၅အရွယ်ရှိ အမျိုးသမီးတစ်ဦးကဆိုပြန်သည်။

ယခုတွင် တိုက်ပွဲငြိမ်လျက်ရှိပြီးဖြစ်သော်လည်း စစ်ကောင်စီလက်နက်ကြီးပစ်ခတ်မှုပြုလုပ်နေဆဲဖြစ်သောကြောင်း ပင်လောင်း-ညောင်ရွှေ-ဖယ်ခုံ နယ်စပ် ကျေးရွာများတွင် ဒေသခံများ အိမ်မပြန်လာနိုင်ကြသေးကြောင်းသိရသည်။