သျှမ်းမြောက်၊ တရုတ်-မြန်မာ နယ်စပ်၊ မူဆယ်မြို့၊ ဟိုမွန်ရပ်ကွက် ၄၅ကုန်းအနီး ယနေ့ (ဩဂုတ်လ ၁၂ ရက်) ည ၁၀ နာရီကျော်တွင် ကျယ်လောင်သည့် ပေါက်ကွဲသံ ထွက်ပေါ်လာသဖြင့် ထိတ်လန့်နေရကြောင်း မြို့ခံများက ပြောသည်။
စစ်ကောင်စီ ထိန်းချုပ်ထားသည့် မူဆယ်မြို့ကို ညီနောင်မဟာမိတ်တပ်များ တိုက်ခိုက်မည်ဆိုသည့် သတင်းများ ထွက်ပေါ်နေစဥ် ယခုကဲ့သို့ ပေါက်ကွဲသံ ထွက်ပေါ်လာသဖြင့် ထိတ်လန့်နေရကြောင်း မြို့ခံ တစ်ဦးက ပြောသည်။
“ပေါက်ကွဲသံ အကျယ်ကြီး ကြားရတယ်၊ ဘာပေါက်ကွဲတာလဲတော့ မသိဘူး၊ ဟိုမွန်ဘက် ၄၅ကုန်းဘက်ကလို့ ထင်တာပဲ၊ ကြောက်တာပေါ့၊တိုက်ပွဲဖြစ်ရင် ဘယ်မှ ပြေးစရာမရှိဘူးလေ” ဟု မြို့ခံ အမျိုးသား တစ်ဦးက ပြောသည်။
ယင်းပေါက်ကွဲမှုနှင့် ပတ်သက်၍ သျှမ်းသံတော်ဆင့် အနေဖြင့် ထပ်မံ မေးမြန်းစုံစမ်းနေဆဲ ဖြစ်သည်။
ပြီးခဲ့သည့် ဩဂုတ်လ ၉ ရက်တွင်လည်း မူဆယ်မြို့အနီးတွင် စစ်ကောင်စီတပ်နှင့် ညီနောင်မဟာမိတ်တပ်များ တိုက်ပွဲ ဖြစ်ပွားခဲ့သေးသည်။
တိုက်ပွဲဖြစ်ပွားပြီးနောက် မူဆယ်မြို့ ထိခိုက် ပျက်စီးမှု မရှိစေရေး အတွက် စစ်ကောင်စီတပ် လက်နက်ချရန် ညီနောင်မဟာမိတ်တပ်က အကြောင်းကြားထားကြောင်း စစ်ရေးသတင်းရင်းမြစ်က ပြောဆိုထားသည်။
Leave a Comments