သျှမ်းပြည် မြောက်ပိုင်း လားရှိုးမြို့ရှိ ပြည်သူများ အချို့သည် နေအိမ်ဖောက်ထွင်းခံရခြင်း၊ သူခိုးရန် ကို စိုးရိမ်သဖြင့် နေရပ်ပြန်ကြကြောင်း သတင်းရရှိသည်။

လွန်ခဲ့သည့် သြဂုတ်လ ၃ရက် တွင် လားရှိုးမြို့ရှိ စစ်ကောင်စီ၏ အရှေ့မြောက်တိုင်း စစ်ဌာနချုပ် ရမခကို ကိုးကန့်တပ်ဖွဲ့ MNDAA က အလုံးစုံ သိမ်းပိုက်နိုင်ခဲ့သည်။

ထို့နောက် တိုက်ပွဲများ မရှိတော့သဖြင့် အနယ်နယ် အရပ်ရပ်သို့ထွက်ပြေးတိမ်းရှောင်ခဲ့သော စစ်ဘေးရှောင်များသည် မိမိနေအိမ်ဖောက်ထွင်းခံရခြင်း၊ သူခိုးရန်ကို စိုးရိမ်သဖြင့် အိမ်စောင့်ရန် အချို့ နေအိမ်ပြန်ကြကြောင်း လားရှိုးမြို့ဒေသခံ အမျိုးသားတစ်ဦး ကသျှမ်းသံတော်ဆင့်ကို ပြောသည်။

“ပြန်တော့ အိမ်တွေပြန်ကြည့်နေကြပါတယ်။ အများကြီးတော့ မပြန်မလာသေးဘူး။ အိမ်စောင့်ဖို့ အိမ်ကြည့်ဖို့ လောက်ပဲ ဝင်ကြသေးတယ်။တချို့ ကလည်း ပစ္စည်းတွေ သိမ်းပြီး ပြန်ထွက်တာပေါ့။အဓိကတော့ ပြန်လာ ကြည့်ကြတာကတော့ သူခိုးရန်ကို ကြောက်နေရလို့ပေါ့။ လောလောဆယ်တော့ အိမ်ပြန်ကြည့်တာလောက်ပဲ ကောင်းတယ်”ဟု လားရှိုးမြို့ ဒေသခံအမျိုးသားတစ်ဦကပြောသည်။

လက်ရှိ လားရှိုးမြို့ပေါ်တွင် တိုက်ပွဲများ ငြိမ်သက်နေပြီး နံနက်ပိုင်းတွင် ဈေးများပြန်ရောင်းချနေကြောင်း၊ အချို့ ဒေသခံများ ပုံမှန်သွားလာနေပါသော်လည်း ဒေသခံများ လေကြောင်းမှ ဗုံးကြဲ ချမည်ကိုစိုးရိမ်နေရကြောင်း လားရှိုးမြို့ ဒေသခံအမျိုးသားတစ်ဦက ဆက်ပြောသည်။

“သိပ်ပြီးတော့ လုံခြုံရေးအတွင်လည်း အာမခံမှုမရှိဘူး။ ခုလောလောဆယ်တော့ သန့်ရှင်းရေးတွေ ဝိုင်းလုပ်နေကြတယ်။သိမ်းနေကြတယ်။နေတာတော့ အရမ်းကြီးမနေရဲဘူး လေကြောင်းကနေဗုံးကြဲမှာကိုပဲ စိုးရိမ်နေကြရတာ။” လားရှိုးမြို့ ဒေသခံအမျိုးသားတစ်ဦက ပြောသည်။

လားရှိုးမြို့အတွင်းကို ၁၃ မျဉ်းစောင်း လရန နိုင်ငံသားစိစစ်ရေး မှတ်ပုံတင် ကိုင်ဆောင်ထားသူ မဟုတ်လည်း ပြန်လည် ဝင်ရောက်နိုင်ကြောင်း ဒေသခံများကပြောသည်။

လက်ရှိ လားရှိုးမြို့ပေါ်တွင် နှစ်ဘက်တိုက်ပွဲများကြား အရပ်သားများ ထိခိုက်သေဆုံးမှုများ ရှိနေပြီး မြို့တွင်းတွင် ရုပ်အလောင်းများ မကောက်နိုင်အောင် ရှိနေကြောင်း ဒေသခံများက သျှမ်းသံတော်ဆင့်ကိုပြောသည်။

သျှမ်းပြည်မြောက်ပိုင်းတွင် ညီနောင်မဟာမိတ်တပ်များ ထိန်းချုပ်ထားသည့် တိုက်ပွဲဖြစ်ပွားခြင်း မရှိဘဲ စစ်ကောင်စီတပ်မှ လေကြောင်းပစ်ခတ် တိုက်ခိုက်နေခြင်းအပေါ် တရုတ်နိုင်ငံမှ တားဆီးဟန့်တားပေးရန် ညီနောင်မဟာမိတ် ၃ ဖွဲ့က ယမန်နေ့ (ဩဂုတ်လ ၆ ရက်) တွင် တောင်းဆိုလိုက်သည်။

ထို့နောက် ရတရုတ်အထူးကိုယ်စားလှယ် မစ္စတာ တိန့်ရှီကျွင်းသည် နေပြည်တော်သို့ ယမန်နေ့ (သြဂုတ်၈)ရက်တွင် ရောက်ရှိခဲ့ပြီး စစ်အာဏာသိမ်းခေါင်းဆောင်နှင့်တွေ့ဆုံခဲ့ကြောင်း သိရသည်။

ယမန်နေ့ (ဩဂုတ်လ ၇ ရက်) တွင် ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့သို့ ‘ဝ’တပ်ဖွဲ့ UWSA မှ တန့်ယန်း-မိုင်းရယ်ဘက်မှတဆင့် ကားကြီးများဖြင့် စစ်အင်အား အများအပြား ထပ်မံဖြည့်တင်းလာကြောင်း စစ်ရေးသတင်းရင်းမြစ်က ပြောသည်။

ပြီးခဲ့သည့် ဩဂုတ်လ ၃ ရက် လားရှိုး ရမခ အလုံးစုံ သိမ်းပိုက်မှုအတွင်း စစ်သည်နှင့် မိသားစု ၄၇၀၀ ကျော် အလံဖြူထောင် လက်နက်ချခဲ့ပြီး ထိပ်တန်း စစ်အရာရှိ ၃ ဦးကို ကိုးကန့်တပ်ဘက်က ဖမ်းမိထားသည်။