သျှမ်းပြည်နယ်တောင်ပိုင်း၊ကလောမြို့နယ်၊ဘော်ဆိုင်းကျေးရွာ၊ကံသာအုပ်စုတွင် ရဲ၊စစ်သား ခွင့်ပြုချက်ဖြင့်ဘော်ဆိုင်းအုပ်ချုပ်ရေးမှူး၏သနပ်ဖက်ဂိုဒေါင်တွင်လောင်းကစားဝိုင်းဖွင့်လှစ်နေကြောင်း သတင်းရရှိသည်။
ဇူလိူင်လနောက်ဆုံးပတ်တွင် စတင်ဖွင့်လှစ်ခြင်းဖြစ်ပြီး လေးကောင်ဂျင် လောင်ကစားဝိုင်းအမျိုးအစားဖွင့်ကာ ယင်းလောင်းကစားဝိုင်းကြောင့် ဒေသခံများ ပျက်စီးနေကြောင်း ဒေသခံ အမျိုးသား တစ်ဦးက ပြောသည်။
“လောင်းကစားကြောင့်ဘဝပျက်သူတွေ အများကြီး သားမယားတွေနဲ့ပါ ကွဲကြတာ၊ မိသားစုတွေ မျက်ရည်မျက်ခွက် ဒုက္ခပေါင်းစုံခံနေရတာ။ ဘော်ဆိုင်းအုပ်ချုပ်ရေးမှူး ဦးအောင်သန်း ရဲကင်းမှူးဒုရဲအုပ်(အမည်မသိ)ရပ်ကျေးစာရေးဇေယျာကျော်ဝင်းတို့ ပူးပေါင်း ပြီးဖွင့်နေတာ”ဟု ၎င်းက ဆက်ပြောသည်။
ထို့အပြင်ဘော်ဆိုင်းဒေသ အုပ်ချုပ်ရေးမှုများ လူကြီးပိုင်းများက စစ်ရှောင်များကို နေအိမ်ငှားရမ်းခွင့်မပြုကြောင်း သိရသည်။
နောက်ဒေသခံတစ်ဦးက “စစ်ရှောင်တွေကိုကြ နေအိမ်ငှားရမ်းခွင့်တောင်ပိတ်ပင်ထားကြပြီး လောင်းကစားဝိုင်းကြ ပြုလုပ်နေတာ အင်မတန်ရှက်စရာပါပဲ။ ဘော်ဆိုင်းမှာ စစ်ရှောင်တွေကို အိမ်မငှားရဘူး။ ငှားရင်အိမ်ရှင်တွေကိုယ်တိုင်တာဝန်ယူရမယ်။ တခုခု ဖြစ်ရင် အိမ်ရှင် က ပြစ်ဒဏ် နှစ်ဆခံရမယ်လို့ ခြိမ်းခြောက်ထားတယ်” ဟု အထက်ပါ ပုဂ္ဂိုလ် က ပြောသည်။
ဘော်ဆိုင်းမြို့သည် အေးချမ်းသောမြို့ဖြစ်ပြီး စစ်ကောင်စီအာဏာသိမ်းပြီးနောက်တွင် နိုင်ငံရေးအခြေအနေ အပြောင်းအလဲများကြောင့် လောင်းကစားဝိုင်းများ ပေါလာသဖြင့် သူခိုးများလည်း ပေါများလာကြောင်း ဒေသခံများကပြောသည်။
Leave a Comments