သျှမ်းပြည် နောင်ချိုမြို့နယ်သို့ စစ်အင်အား ဖြည့်တင်းနေသည့် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ၊ PDF ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့ကြောင်း စုံစမ်းသိရသည်။

ယမန်နေ့ (ဩဂုတ်လ ၆ ရက်) နံနက် ၁၁ နာရီကျော်မှ စတင်ပြီး နောင်ချိုမြို့ တောင်ဘက်ရှိ ရွှေမုဋ္ဌောနှင့် ရေဖြူရွာအနီးတွင် တောင်ကြီး-ရပ်စောက်ဘက်မှ စစ်အင်အား ဖြည့်တင်းလာသည့် စစ်ကောင်စီယာဉ်တန်းကို TNLA နှင့် PDF ပူးပေါင်းတပ်ဖွဲ့တို့က တိုက်ခိုက်ခဲ့ရာ တိုက်ပွဲပြင်းထန်ခဲ့ကြောင်း ဒေသခံများက ပြောသည်။

“နောင်ချိုတောင်ဘက်က ရွှေမုဋ္ဌောနဲ့ ရေဖြူမှာ တိုက်ပွဲဖြစ်တာ။ ရှေ့ရက်က တစ်မနက်လုံး တိုက်ပွဲပြင်းနေတာ။ တောင်ကြီး-ရပ်စောက်ဘက်ကနေ ကား (၈) စီးနဲ့ အင်အား (၃၀၀) လောက် တက်လာတယ်။ တိုက်ပွဲဖြစ်တဲ့ ရွှေမုဋ္ဌောနဲ့ TNLA သိမ်းထားတဲ့ ဒုံးတပ်ရင်းက (၆) မိုင်လောက်ပဲ ဝေးတော့တယ်”ဟု နောင်ချိုမြို့နယ် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

အလားတူ ဩဂုတ်လ ၅ ရက်နေ့တွင်လည်း နောင်ချိုမြို့နယ် ရွှေမုဋ္ဌောကျေးရွာအနီး အင်အားဖြည့် စစ်ကောင်စီတပ်နှင့် TNLA ၊ PDF ပူးပေါင်းတပ်တို့ တနေကုန် တိုက်ပွဲပြင်းထန်ခဲ့ကြောင်း ဒေသခံများထံမှ သိရပြီး စစ်ကောင်စီနှင့် ရင်ဆိုင်တိုက်ပွဲ ဖြစ်ပွားခဲ့ကြောင်း TNLA ဘက်မှ ထုတ်ပြန်ထားသည်။

ပြီးခဲ့သည့် ဇူလိုင်လလယ်ပိုင်းမှ စတင်ပြီး သျှမ်းပြည်တောင်ပိုင်း ကလောမြို့အခြေစိုက် စစ်ကောင်စီ တပ်မ (၅၅) ကို စစ်ကား (၃၂) စီးခန့်ဖြင့် ဗထူးတပ်မြို့တွင် စုဖွဲ့၍ ရပ်စောက်-ကျောက်ဂူ-အင်တောလမ်းမှ နောင်ချိုမြို့နယ်ဘက်သို့ စစ်ကူသွားခဲ့ကြောင်း စစ်ရေးသတင်းရင်းမြစ်က သျှမ်းသံတော်ဆင့်ကို ဇူလိုင်လ ၁၄ ရက်တွင် ပြောကြားထားသည်။

လက်ရှိတွင် နောင်ချိုမြို့နယ်အတွင်း တိုက်ပွဲငြိမ်သက်နေသော်လည်း ထွက်ပြေးတိမ်းရှောင်နေရသည့် စစ်ဘေးရှောင်များအတွက် စားနပ်ရိက္ခာများကို ဘန့်ဘေး၊ ခြေမြစ်ပင်တွင် တပ်စွဲထားသည့် စစ်ကောင်စီတပ်မှ သယ်ဆောင်ခွင့်မပေးခြင်းကြောင့် အခက်အခဲ ကြုံတွေ့နေရကြောင်း စစ်ဘေးရှောင်များက ပြောသည်။

“စိုက်ပျိုးရာသီ တိုက်ပွဲဖြစ်တော့ ပြေးနေရတာနဲ့ အလုပ်မဖြစ်ဘူး။ စပါးဆိုလည်း ပျိုးပင်အရွယ်ရောက်တာ ကောက်မစိုက်နိုင်ဘူး။ အင်းဝိုင်းတကြောမှာ စစ်ရှောင်နေကြတာ ၂၀၀၀ ကျော် ရှိတယ်။ ကူညီတဲ့အဖွဲ့တွေ ရှိတာတောင်မှ စစ်တပ်က ခြေမြစ်ပင်မှာ ပိတ်ထားတာ၊ ရိက္ခာပေးမသယ်ဘူး။ လောလောဆယ် စားသုံးဆီကော၊ စက်သုံးဆီကော အခက်အခဲဖြစ်တယ်”ဟု နောင်ချိုမြို့နယ် စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။

နောင်ချိုမြို့နယ်အတွင်းရှိ စစ်ဘေးရှောင်များမှာ လွယ်တောင်း၊ ဆေးထိုး၊ ကျောင်းခမ်း၊ နားခေါ့၊ ပလောင်ကုန်း၊ သဲတိုက်၊ ပန်ဟိုက်၊ အင်းဝိုင်း စသည့် ကျေးရွာများသို့ ထွက်ပြေးရောက်ရှိနေပြီး စစ်ဘေးရှောင် (၂၀၀၀) ကျော်အတွက် စားနပ်ရိက္ခာများ လိုအပ်နေကြောင်း စစ်ဘေးရှောင် ကူညီသူများထံမှ သိရသည်။

ဇွန်လ ၂၅ ရက်က စတင်ခဲ့သည့် TNLA ပူးပေါင်းတပ်၏ ထိုးစစ်အတွင်း နောင်ချိုမြို့ရှိ စစ်ကောင်စီ ခမရ (၁၁၅) နှင့် (၁၁၄) တပ်ရင်း ၂ ခုကို သိမ်းပိုက်နိုင်ခဲ့ပြီး ဇူလိုင်လ ၁၀ ရက်နေ့က (၆၀၆) ဒုံးတပ်ကို TNLA ပူးပေါင်းတပ်ဖွဲ့ ထပ်မံသိမ်းပိုက်ပြီးနောက် နောင်ချိုမြို့ကို အလုံးစုံ ထိန်းချုပ်ထားသည်။