သျှမ်းပြည် ကျောက်မဲမြို့ရှိ တပ်စခန်းများ မကျဆုံးရှုံးရေး စစ်ကောင်စီတပ်မှ လေကြောင်းဖြင့် ခုခံတိုက်ခိုက်နေသည့်ကြားထဲ ထိုတပ်စခန်းများကို တအာင်း(ပလောင်) အမျိုးသားလွတ်မြောက်ရေး တပ်မတော် (TNLA )နှင့် ပူးပေါင်းတပ်တို့ အလုံးစုံ တိုက်ခိုက်သိမ်းပိုက်ခဲ့ကြောင်း သိရသည်။
ကျောက်မဲမြို့ရှိ စစ်ကောင်စီ၏ အမှတ် (၁) စစ်ဆင်ရေးကွပ်ကွဲမှုဌာနချုပ် စကခ-၁နှင့် ခြေမြန်တပ်ရင်း ခမရ ၅၀၁၊ ၅၀၂ တို့ကို တအာင်းတပ်ဖွဲ့ TNLA နှင့် ပူးပေါင်းတပ်ဖွဲ့တို့ ဝင်ရောက်တိုက်ခိုက်ရာ ယနေ့ (သြဂုတ် ၆)ရက် နံနက်ပိုင်းမှာ အလုံးစုံ သိမ်းပိုက်နိုင်ခဲ့သည်ဟု စစ်ရေးသတင်းရင်းမြစ်က ပြောသည်။
” ဒီမနက်ပိုင်းမှာ အလုံးစုံ သိမ်းပိုက်နိုင်ပြီ။ လေကြောင်းဗုံးကြဲမှုကတော့ ကြောက်နေရတယ်” ဟု စစ်ရေးသတင်းရင်းမြစ်က သျှမ်းသံတော်ဆင့်ကိုပြောသည်။
ထို့အပြင် မြေပြင်အခြေအနေနှင့် ပတ်သက်၍ ဒေသခံများထံသို့ ဖုန်းဖြင့်ဆက်သွယ်မေးမြန်းရန် ကြိုးစားခဲ့သော်လည်း ဖုန်းလိုင်းပြတ်တောက်မှုများကြောင့် လက်တလောတွင် ဆက်သွယ်၍မရသေးပေ။
ကျောက်မဲမြို့ရှိ စစ်ကောင်စီတပ်စခန်းများကို ဇွန်လ ၂၅ ရက်နေ့ကစတင်၍ တအာင်းတပ်ဖွဲ့ TNLA နှင့် ပူးပေါင်းတပ်ဖွဲ့တို့ တိုက်ခိုက်ခဲ့ပြီး ၁ လကျော်ကြာသည်အထိ သြဂုတ် ၅ ရက်မှ သိမ်းပိုက်နိုင်ခဲ့ခြင်း ဖြစ်သည်။
စခန်းသိမ်းတိုက်ပွဲအတွင်း တပ်စခန်းများမကျစေရေး စစ်ကောင်စီတပ်က လေကြောင်းမှတစ်ဆင့် အပြန်းအထန် ဗုံးကြဲခုခံတိုက်ခိုက်ခဲ့ကြောင်း သိရသည်။
ယမန်နေ့တစ်နေ့တည်းတွင် စခန်းကုန်း အနီးတဝိုက်သို့ စစ်ကောင်စီတပ်မှ Y 12 လေယာဉ်ဖြင့် ဗုံး (၉၆) လုံး၊ ပတ္တမြားစေတီအနီးတဝိုက်သို့ ဗုံး (၂) လုံး နှင့် ဂျက်ဖိုက်တာဖြင့် (၄) ကြိမ် လာရောက်ပစ်ခတ် တိုက်ခိုက်ခဲ့ကြောင်း TNLA ကထုတ်ပြန်ထားသည်။
Leave a Comments