သျှမ်းပြည်မြောက်ပိုင်း တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ကွတ်ခိုင်မြို့ကို စစ်ကောင်စီတပ်သည် လေကြောင်းဖြင့် ဗုံးကြဲတိုက်ခိုက်ရာ ဆိုင်ခန်းပေါင်းအားလုံးနီးပါး မီးလောင်သွားကြောင်း သတင်းရရှိသည်။

ယမန်နေ့ (သြဂုတ် ၅)ရက် ညနေပိုင်း ၃နာရီကျော်တွင် ကွတ်ခိုင်မြို့ကို စစ်ကောင်စီမှ လေကြောင်းဖြင့် ဗုံးကြဲတိုက်ခိုက်ခဲ့ရာ အရပ်သား ၅ဦးသေဆုံးခဲ့ပြီး ထိခိုက်ဒဏ်ရာရရှိသူများရှိကာ ကွတ်ခိုင်မြို့မစျေးရှိ ဆိုင်ခန်းပေါင်း အားလုံးနီးပါး မီးလောင်းမှု ဖြစ်ပွားခဲ့ကြောင်း ကွတ်ခိုင်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။

‘’စစ်တပ်ဗုံးချတာ ၄/၅ ရပ်ကွက်နဲ့ သစ်တောရုံးတို့ဘက်မှာ ဗုံး ၇လုံးလောက်ချတယ်။ အိမ်ထိခိုက်တာများတယ် ။ ပေါင် ၅၀၀ က မြို့မဈေးထဲနဲ့ ကွတ်ခိုင်လမ်းဆုံတစ်နေရာမှာ ပေါက်ကွဲတော့ လမ်းသွားလာသူကိုထိတော့ ပွဲချင်းပြီး ၅ ဦးဆုံးသွားပြီး ဒဏ်ရာရတဲ့ ၄ ဦးကိုတော့ အနီးစပ်ဆုံးဆေးရုံကို ပို့ပေးတယ်’’ ဟု မြို့နယ်ဒေသခံ အမျိုးသားက ပြောသည်။

ကွတ်ခိုင်မြို့ ပြည်သူများသည် ထိုမီးလောင်းသွားသည့် မြို့မစျေးရှိ စျေးဆိုင်ခန်းကို အားကိုးနေရပြီး၊ ယခုကဲ့သို့ မီးလောင်မှုသည် ပြည်သူများအတွက် ဆုံးရှုံးမှုများဖြစ်ပြီး ခေတ်ကာလ မကောင်းချိန်တွင် ဖြစ်ပွားသဖြင့် ဆိုင်ရှင်များလည်း အခက်အခဲဖြစ်ကြောင်း အသက် ၃၀ကျော် အမျိုးသားတစ်ဦးက သျှမ်းသံတော်ဆင့်ကိုပြောသည်။

‘’ပြည်သူတွေက ဆိုင်တွေကိုပဲ အားကိုးဝယ်စားကြတယ်လေ ။ စစ်တပ်က ဗုံးလာကြဲတော့ ပြည်သူတွေ ဒုက္ခရောက်ကုန်ပြီ ကျနော်ရဲ့ သူငယ်ချင်းဆိုင်ဆိုရင် ဆုံးရှုံးမှု သိန်းသောင်းရာချီလောက်ရှိတယ်။ ဖုန်းဆိုင် ၊ ဆေးဆိုင်တွေဆို ဘာတစ်ခုမှမကျန်အောင် မီးထဲပါသွားတယ် ’’ ဟု ၎င်းက ပြောသည်။

ကွတ်ခိုင်မြို့မစျေး မီးလောင်ဖြစ်ပွားနေစဉ် ခိုးဆိုး၊လုယက်မှုတွေ ပစ္စည်းခိုးယူခြင်းတွေမရှိအောင် TNLA တပ်ဖွဲ့ဘက်က လုံခြုံရေးများ တစ်ညလုံးချပေးထားသည်ဟု သိရသည်။

ကွတ်ခိုင်မြို့နေထိုင်သူများအနေဖြင့် စစ်ကောင်စီဘက်မှ လေကြောင်းဖြင့် ဗုံးလာရောက်ထပ်မံကြဲခြင်း၊ တိုက်ပွဲများ ထပ်မံဖြစ်မည်ကို စိုးရိမ်နေကြသည်။

Witness enemy air scoutမှ ယနေ့ (သြဂုတ်လ ၅ ရက်) နေ့လည် ၃ နာရီဝန်းကျင်တွင် ကွတ်ခိုင်မြို့ပေါ်၌ စစ်ထောက်ပို့တိုက်ခိုက်သည့် လေယာဉ် Y-12 တစ်စီးပျံဝဲနေကြောင်း ထုတ်ပြန်ခဲ့သည်။

ကျောက်မဲမြို့တွင် စစ်ကောင်စီတပ်စခန်းများအဖြစ် ကျန်ရှိနေသော အမှတ် (၁) စစ်ဆင်ရေး ကွပ်ကွဲမှုဌာနချုပ် စကခ -၁ ၊ ခြေမြန်တပ်ရင်း ခမရ (၅၀၁) နှင့် (၅၀၂) တို့ ရှိနေသည်။

လက်ကျန်စခန်းသိမ်းတိုက်ပွဲအတွင်း စစ်ကောင်စီတပ်က စခန်းကုန်းအနီးတဝှိက်နှင့် ပတ္တမြားစေတီအနီး၊ ဂေါက်ကွင်းအနီးနှင့် ခမရ -၅၀၁ စခန်းနီးသို့ နှစ်ရက်အတွင်း စစ်ကောင်စီတပ်က ဂျက်ဖိုက်တာလေယာဉ်ဖြင့် ၁၆ ကြိမ် တိုက်ခိုက်ခဲ့ကြောင်း၊ ၎င်းတို့တပ်စခန်းသို့ ထောက်ပို့လေယာဉ် Y 12 ဖြင့် လက်နက်ခဲယမ်း ၂၂ ထုတ် လာရောက်ကြဲချခဲ့ကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။