သျှမ်းပြည် မြောက်ပိုင်း လားရှိုးမြို့အတွင်းကို ၁၃ မျဉ်းစောင်း လရန နိုင်ငံသားစိစစ်ရေး မှတ်ပုံတင် ကိုင်ဆောင် ထားသော ဒေသခံများသာ ဝင်ရောက်နိုင်ကြောင်း သတင်းရရှိသည်။

သျှမ်းပြည် မြောက်ပိုင်း လားရှိုးမြို့တွင် စစ်ကောင်စီ နှင့် ကိုးကန့်တပ်ဖွဲ့ MNDAA တို့ တိုက်ပွဲများဖြစ်ပွားပြီးနောက်‌ ဒေသခံများ နီးစပ်ရာမြို့နှင့် ဆွေမျိုးစီသို့ ထွက်ပြေးတိမ်းရှောင်နေကြရပြီး သြဂုတ် ၃ရက်တွင် MNDAA ဘက်မှ လားရှိုးမြို့သို့ အလုံးစုံ သိမ်းပိုက်နိုင်ခဲ့သည်။

ထို့နောက် လက်ရှိ ၃ ရက်သာအတွင်း တိုက်ပွဲများ ငြိမ်သက်နေပြီး လားရှိုးမြို့ ရပ်ကွက် (၃) ၊ရပ်ကွက် (၄) ၊ရပ်ကွက် (၅) အတွင်းသို့ လွတ်လပ်စွာ သွားလားနိုင်သည်။

သို့သော် လားရှိုး မြို့တွင်းတွင် ကိုးကန့်တပ်ဖွဲ့ ၏ စစ်ဆေးမှုများရှိနေပြီး ၁၃မျဉ်းစောင်း လရန (၁၃/လရန (နိုင်) နိုင်ငံသားစိစစ်မှတ်ပုံတင် ကိုင်ဆောင်ထားသော ဒေသခံများသာ မြို့အတွင်းသို့ ဝင်ရောက်နိုင်ကြောင်း လားရှိုးမြို့ ဒေသခံ အမျိုးသားတစ်ဦးက ပြောသည်။

“အခုလောလောဆယ်တော့ လွတ်လွတ်လပ်လပ်သွားလာလို့ရတဲ့ အနေအထားတော့ရှိတယ်။ ဒါပေမဲ့ ကိုးကန့်တပ်ဖွဲ့တွေက ရပ်ခိုင်းရင်တော့ ရပ်ပေါ့ဗျာ။ သူတို့က ဘယ်သွားမလဲ ဘာညာတော့ မေးလိမ့်မယ်၊ ဖြေနိုင်ရင်တော့ သူတို့လည်း ပေးသွားတယ်။ လားရှိုးကိုဝင်ရင် မှတ်ပုံတင်က လားရှိုးကဖြစ်ရမယ်။ လားရှိုးက မှတ်ပုံတင် မဟုတ်ရင် ဝင်လို့မရဘူး။”ဟု လားရှိုးမြို့‌ဒေသခံအမျိုးသားတစ်ဦးက ပြောသည်။

ထိုပြင်လားရှိုးမြို့အတွင်း၌ အလောင်းများကို ကိုးကန့်တပ်ဖွဲ့ မှ ဦးဆောင်၍ ကျန်ရှိနေသော ပြည်သူအချို့ နှင့် သန့်ရှင်းရေးများ လုပ်ဆောင်ပေး နေ‌ကြောင်း လားရှိုးမြို့ဒေသခံ အမျိုးသားတစ်ဦးက ကဆက်ပြောသည်။

“အဓိက လမ်းမကြီးတွေပေါ့။ လူသေအလောင်းတွေလည်း တွေ့ပါတယ်။ အလောင်းတွေတော့ရင်တော့ ရှင်းတယ်။ အလောင်းတွေကို လိုက်ရှာပြီး ရှင်းတာတော့မရှိသေးဘူး။ လမ်းပေါ်မှာ သေနေတဲ့အလောင်း တွေကိုတော့ သဲတွေဖုံး၊ ကား တာယာနဲ့ အုပ်ပြီး မီးရှို့ဆိုတာပေါ့။ အခုအလောင်း သွားမြုပ်ဆိုလည်း ဘယ်သူမှမသွားရဲတော့ဘူး။ အိမ်ဝန်း၊ ခြံဝန်းထဲမှာ သေနေတဲ့အလောင်းတွေတော့ မတွေ့ရင် မကောက်ဘူးပေါ့ဗျာ။”ဟု ၎င်းက ပြောသည်။

လားရှိုးမြို့တွင် ကျန်ရှိနေသော ဒေသခံအချို့သည် လေကြောင်းဖြင့် ဗုံးကြဲတိုက်ခိုက်မည်ကို စိုးရိမ်နေကြပြီး၊ အခြားမြို့သို့ ထွက်ပြေးတိမ်းရှောင်နေသော ဒေသခံများလည်း နေရပ်သို့ ပြန်ရန် စိုးရိမ်နေကြကြောင်း လားရှိုးမြို့‌ ဒေသခံအမျိုးသားတစ်ဦးကဆက်ပြောသည်။

“ကျနော်တို့ကတော့ လေယာဉ်ကိုပဲ ကြောက်တယ်။ ပြီးတော့ အရမ်းကြောက်ဖို့ကောင်းတာတစ်ခု ညဘက်ကျနော်တို့အိပ်ပျော်နေတဲ့အချိန်မှာ လေယာဉ်နဲ့ ဗုံးလာကြဲမှာကို အကြောက်ဆုံးပဲ။ လောလောဆယ် ပြည်သူတွေတော့ မပြန်ရဲကြသေးဘူး။ လေယာဉ်နဲ့ ဗုံးလာကြဲမှာကို ကြောက်တာ၊ စိုးရိမ်တာကြောင့်လည်း ပြန်မလာနေကြသေးဘူး။”ဟု ၎င်းက ဆက်ပြောသည်။

လက်ရှိ လားရှိုးမြို့အတွင်းတွင် စစ်ကောင်စီတပ်ဖွဲ့နှင့် ကိုးကန့်တပ်ဖွဲ့ MNDAA တို့ သွားလာလှုပ်ရှားနေပြီး၊ လားရှိုးမြို့ အကျဉ်းထောင် အတွင်းတွင်လည်း အကျဉ်းသား ၆၀၀ ကျော် ကျန်ရှိနေကြောင်း သိရသည်။

ပြီးခဲ့သည့် ဩဂုတ်လ ၃ ရက် လားရှိုး ရမခ အလုံးစုံ သိမ်းပိုက်မှုအတွင်း စစ်သည်နှင့် မိသားစု ၄၇၀၀ ကျော် အလံဖြူထောင် လက်နက်ချခဲ့ပြီး ထိပ်တန်း စစ်အရာရှိ ၃ ဦးကို ကိုးကန့်တပ်ဘက်က ဖမ်းမိထားသည်။

လက်ရှိ လားရှိုးမြို့ပေါ်တွင် နှစ်ဘက်တိုက်ပွဲများကြား အရပ်သားများ ထိခိုက်သေဆုံးမှုများ ရှိနေပြီး မြို့တွင်းတွင် ရုပ်အလောင်းများ မကောက်နိုင်အောင် ရှိနေကြောင်း ဒေသခံများက သျှမ်းသံတော်ဆင့်ကိုပြောသည်။

ပြီးခဲ့သည့် ဇွန်လ ၂၅ ရက်စပြီး ဇူလိုင် ၃၁ ရက်အထိ သျှမ်းပြည် မြောက်ပိုင်းတွင် ဖြစ်ပွားနေသော “ ၁၀၂၇ စစ်ဆင်ရေး” ဒုတိယလှိုင်းအတွင်း အရပ်သား စုစုပေါင်း ၁၃၀ ကျော်သေဆုံးပြီး ၁၇၀ ကျော် ထိခိုက်ဒဏ်ရာရှိထားကြောင်း သိရသည်။