ကရင်နီပြည်၊ ဒီးမော့ဆို့မြို့နယ်အရှေ့ဖက်ခြမ်း တွင် မိုးအဆက်မပြတ်ရွာသွန်းမှုကြောင့် ပွန်ချောင်းမှာ ရေမြင့်တက်လာပြီး ပွန်ချောင်းအနီးတဝိုက်ရှိ (အမှတ်၆) စစ်ရှောင် စာသင်ကျောင်းနှင့် စစ်ဘေးရှောင် အဆောင်းအချို့ ရေနစ်မြှုပ်ကြောင်း စုံစမ်းသိရသည်။
ထိုစာသင်ကျောင်း ရေဝင်မှုကြောင့် ယာယီပိတ်ထားရပြီး၊ အချို့စစ်ရှောင်များသည် ရေလွတ်ရာသို့ ထပ်မံ ပြောင်းရွှေ့နေထိုင်ရကြောင်း စစ်ရှောင်ကူညီသူအမျိုးသမီးတစ်ဦး က သျှမ်းသံတော်ဆင့် ကို ပြောသည်။
“ခုလောလောဆယ်တော့ ကျောင်းပိတ်ထားတယ်။ ဘယ်အချိန်ပြန်ဖွင့်ရမလဲတော့မသိသေးဘူး။ ကျောင်းကဖွင့်လို့ရအုံးမှာလားတောင်မသိတော့ဘူး။ကလေးတွေလည်း တစ်နေရာစီဖြစ်ကုန်ပီလေ”ဟု စစ်ရှောင်ကူညီနေသူ အမျိုးသမီးတစ်ဦးက ဆိုသည်။
အဆိုပါ စစ်ရှောင်ကျောင်းတွင် KG တန်းမှ Grade 10 အထိဖွင့်လှစ်ထားပြီး ကျောင်းသား/သူ (၄၀၀)နီးပါးခန့် ပညာသင်ကြားနေကြသည်။
ပွန်းချောင်းရေ ရုတ်တရက် မြင့်တက်ပြီး ရေကြီးမှုကြောင့် စစ်ရှောင်ကလေးများ တကွဲတပြားဖြစ်ပြီး၊ စစ်ရှောင်များ အခြားနေရာသို့ ထပ်မှာ ရွှေ့ပြောင်းနေရကြောင်းလည်း ၎င်းက ပြောသည်။
” အခုက စစ်ရှောင်တွေ တကွဲတပြားထပ်ဖြစ်တယ်။ ရုတ်တရက်ကြီး ရေကြီးလာတော့ ကလေးတွေ အတွက်စိတ်မကောင်းဘူး။ စိတ်ပူတာက ကျောင်းပြန်ဖွင့်မယ်ဆိုရင်တောင် ကျောင်းတစ်လုံးရဖို့မလွယ်ဘူး။ ကုန်စျေးနူန်းတွေ အစစရာရာစျေးတက်နေတော့ ကျောင်းပြန်မဖွင့်နိုင်မှာ စိုးရိမ်တယ်။” ဟု ဒီမော့ဆိုးဒေသခံ တစ်ဦးကဆိုသည်။
ပြီးခဲ့သည့် ဇူလိုင်လ ၂၅ ရက်တွင်လည်း စစ်ကောင်စီမှ မိုးဗြဲရေကာတာ ဖွင့်ချမှုကြောင့် ကျေးရွာ (၃)ရွာထက်မနည်းရေနစ်မြုပ်ကာ ဒေသခံထောင်နှင့်ချီရေဘေးသင့်ခဲ့ရကြောင်း သိရသည်။
လက်ရှိ ကရင်နီပြည်နယ်လွိုင်ကောင်ဘက်ကို စစ်ကောင်စီတပ်မှ အင်အားဖြည့်တင်းကာ ထိုးစစ်ဆင်နေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments