သျှမ်းပြည် ကွတ်ခိုင်မြို့တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လေကြောင်းဖြင့် ဗုံး ၃ လုံးလာရောက် ကြဲချခဲ့ပြီး နေအိမ်များမီးလောင်ကာ၊ ထိခိုက် ဒဏ်ရာရရှိသူ ၁၀ ဦးခန့်ရှိနေကြောင်း သတင်းရရှိသည်။
ယနေ့ (သြဂုတ်လ ၅ ရက်)နေ့လည် ၃ နာရီဝန်းကျင်တွင် စစ်ကောင်စီမှ တိုက်ပွဲဖြစ်ပွားခြင်းမရှိဘဲ ကွတ်ခိုင်မြို့ ရပ်ကွက် ၅ ၊ ဈေးဘက်အနီးတွင် လေကြောင်းဖြင့် ဗုံး ၃ လုံး ကြဲချခဲ့ပြီး နေအိမ် ၂ လုံး ဗုံးစထိမှန်၍ မီးလောင်ခဲ့သည်။
ထိုဗုံးဒဏ်ကြောင့် ထိခိုက်ဒဏ်ရာရရှိသူ ၁၀ ဦးခန့်ရှိနေကြောင်း ကွတ်ခိုင်မြို့ ဒေသခံအမျိုးသားတစ်က သျှမ်းသံတော်ဆင့် ကို ပြောသည်။
“ အခုလေးတင် ဗုံးလာကြဲသွားတာ။ အခုလောလောဆယ်တော့ လူတွေက ၆ ယောက်လောက် ဆွဲထုတ် ထားတယ်။ ထိတဲ့တွေပေါ့။၁၀ဦး ဝန်ကျင်လောက်ရှိမယ်။ အခု ဆက်ဆွဲထုတ်နေတာ ကျန်သေးတယ်။ သေချာမကြည့်ပေးရသေးဘူး”ဟု ကွတ်ခိုင်မြို့ဒေသခံ အမျိုးသာတစ်ဦးက ပြောသည်။
Witness enemy air scoutမှ ယနေ့ (သြဂုတ်လ ၅ ရက်) နေ့လည် ၃ နာရီဝန်းကျင်တွင် ကွတ်ခိုင်မြို့ပေါ်၌ စစ်ထောက်ပို့တိုက်ခိုက်သည့် လေယာဉ် Y-12 တစ်စီးပျံဝဲနေကြောင်း ထုတ်ပြန်ခဲ့သည်။
ထို့အပြင် ကျောက်မဲမြို့ရှိ စစ်ကောင်စီတပ်စန်းများ မကျဆုံးရှုံးရေးအတွက် စစ်ကောင်စီတပ်က လေကြောင်းဖြင့် အပြင်းအထန်တိုက်ခိုက်နေကြောင်း သိရသည်။
ကျောက်မဲမြို့တွင် စစ်ကောင်စီတပ်စခန်းများအဖြစ် ကျန်ရှိနေသော အမှတ် (၁) စစ်ဆင်ရေး ကွပ်ကွဲမှုဌာနချုပ် စကခ -၁ ၊ ခြေမြန်တပ်ရင်း ခမရ (၅၀၁) နှင့် (၅၀၂) တို့ ရှိနေသည်။
လက်ကျန်စခန်းသိမ်းတိုက်ပွဲအတွင်း စစ်ကောင်စီတပ်က စခန်းကုန်းအနီးတဝှိက်နှင့် ပတ္တမြားစေတီအနီး၊ ဂေါက်ကွင်းအနီးနှင့် ခမရ -၅၀၁ စခန်းနီးသို့ နှစ်ရက်အတွင်း စစ်ကောင်စီတပ်က ဂျက်ဖိုက်တာလေယာဉ်ဖြင့် ၁၆ ကြိမ် တိုက်ခိုက်ခဲ့ကြောင်း၊ ၎င်းတို့တပ်စခန်းသို့ ထောက်ပို့လေယာဉ် Y 12 ဖြင့် လက်နက်ခဲယမ်း ၂၂ ထုတ် လာရောက်ကြဲချခဲ့ကြောင်း သိရသည်။
