လက်ရှိ ပြည်တွင်း၊ ပြည်ပ၏ အခြေအနေ အရပ်ရပ်အောက်တွင် မိုင်းလားအဖွဲ့ NDAA အနေဖြင့် ဘက်မလိုက်သည့် နိုင်ငံရေး ရပ်တည်ချက်ကို ဆုပ်ကိုင်ထားပြီး အမြင်မတူမှုများကို နိုင်ငံရေးနွေးပွဲများမှ တစ်ဆင့် ဖြေရှင်းကြရန် တိုက်တွန်းလိုက်ကြောင်း ပြောသည်။

သျှမ်းပြည် အရှေ့ပိုင်း အထူးဒေသ (၄) အဖြစ် သိကြသည့် မိုင်းလားတွင် သြဂုတ် ၃ ရက်နေ့က ပြုလုပ်ခဲ့သည့် ၂၀၂၄ ပထမနှစ်ဝက်ချုပ် အစည်းအဝေးအတွင်း၌ မိုင်းလားဒေသ ငြိမ်းချမ်းရေးနှင့် စည်းလုံးရေး ကော်မတီအတွင်း ရေးမှူးချုပ်လည်းဖြစ်၊ NDAA တပ်မှူးလည်း ဖြစ်သည့် ဦးထိန်လင်းက ယခုလိုပြောဆိုလိုက်ခြင်း ဖြစ်သည်။

နိုင်ငံတော်၏ တည်ငြိမ်အေးချမ်းရေးကို ကာကွယ်စောင့်ရှောက်ပြီး တိုင်းရင်းသားအဆင့်မြင့် ကိုယ်ပိုင်အုပ်ချုပ်ခွင့်ရဒေသအဖြစ် ရရှိအောင် ဆက်လက်ကြိုးပမ်းသွားမည်ဟု သူကဆက်ပြောသည်။

သျှမ်းအရှေ့ တရုတ်-မြန်မာနယ်စပ်က မိုင်းလားအဖွဲ့သည် ပြီးခဲ့သည့်နှစ် သျှမ်းမြောက်တွင် ဖြစ်ပွားနေသည့် “၁၀၂၇ စစ်ဆင်ရေး” ပထမလှိုင်းအတွင်း စစ်ရေးတင်းမာနေချိန်တွင်လည်း အလားတူ ထုတ်ပြောခဲ့ခြင်း ရှိခဲ့သည်။

ယခုအခါ သျှမ်းမြောက်တွင် “၁၀၂၇ စစ်ဆင်ရေး” ဒုတိယလှိုင်းအကြော့ ပြန်ဖြစ်နေချိန် ထပ်မံပြောဆိုလာခြင်း ဖြစ်သည်။

ပြီးခဲ့သည့် ဇူလိုင်လတွင်လည်း သျှမ်းအရှေ့ မိုင်းယောင်းမြို့ အနီးတဝှိက်ကို မိုင်းလားအဖွဲ့ သည် အင်အားရာချီသုံးပြီး ဝင်ရောက်နေရာယူထားသည်။

စစ်တပ်အာဏာသိမ်းပြီးနောက် မိုင်းလားအဖွဲ့သည် “ဝ” အဖွဲ့ UWSA ၊ ရှမ်းပြည်တိုးတက်ရေးပါတီ SSPP တို့နှင့်အတူ စစ်ခေါင်းဆောင်ဖိတ်ခေါ်သည့် ငြိမ်းချမ်းရေးဆွေးနွေးပွဲကိုလည်း ပြီးခဲ့သည့်နှစ်က တက်ရောက်ခဲ့သည်။

ပြီးခဲ့သည့်နှစ် တွေ့ဆုံပွဲအပြီးမှာ “ဝ” အဖွဲ့က ပြည်နယ်ကိုတောင်းဆိုခဲ့သကဲ့သို့ မိုင်းလားအဖွဲ့ကလည်း ကိုယ်ပိုင် အုပ်ချုပ်ခွင့်ရဒေသကို တောင်းခဲ့ဆိုခဲ့ပြီး မူးအားဖြင့် စစ်ကောင်စီဘက်က သဘောတူခဲ့သည်ဟု သိရသည်။