သျှမ်းပြည် ကျောက်မဲမြို့တွင် စစ်ကောင်စီတပ်စခန်းများအဖြစ် ကျန်ရှိနေသော အမှတ် (၁) စစ်ဆင်ရေး ကွပ်ကွဲမှုဌာနချုပ်၊ ခြေမြန်တပ်ရင်း ခမရ (၅၀၁) နှင့် (၅၀၂) တို့ မကျဆုံးရေးအတွက် စစ်ကောင်စီက လေကြောင်းဖြင့် အပြင်းအထန်တိုက်ခိုက်နေကြောင်း သိရသည်။
ကျောက်မဲမြို့ရှိ စစ်ကောင်စီ လက်ကျန်တပ်စခန်းများကို တအာင်း (ပလောင်) အမျိုးသားလွတ်မြောက်ရေး တပ်မတော် TNLA နှင့် တော်လှန်ရေးမဟာမိတ် ပူးပေါင်းတပ်ဖွဲ့တို့က သြဂုတ် ၃ ရက်ကစတင်ဝင်တိုက်ခိုက် ခဲ့ခြင်း ဖြစ်သည်။
လက်ကျန်စခန်းသိမ်းတိုက်ပွဲအတွင်း စစ်ကောင်စီတပ်က စခန်းကုန်းအနီးတဝှိက်နှင့် ပတ္တမြားစေတီအနီး၊ ဂေါက်ကွင်းအနီးနှင့် ခမရ -၅၀၁ စခန်းနီးသို့ နှစ်ရက်အတွင်း စစ်ကောင်စီတပ်က ဂျက်ဖိုက်တာလေယာဉ်ဖြင့် ၁၆ ကြိမ် တိုက်ခိုက်ခဲ့ကြောင်း၊ ၎င်းတို့တပ်စခန်းသို့ ထောက်ပို့လေယာဉ် Y 12 ဖြင့် လက်နက်ခဲယမ်း ၂၂ ထုတ် လာရောက်ကြဲချခဲ့ကြောင်း TNLA ကထုတ်ပြန်ထားသည်။
“အခုကကျောက်မဲမှာကရေရှည်နေလို့ မရတော့ဘူး။ တိုက်ပွဲကတော်တော်လေးကို ပြင်းနေတာ။ လက်နက်ကြီးတွေ၊ လေယာဉ်တွေနဲ့ ပစ်နေကြတာ။ မြို့ထဲကိုဝင်လို့မရ၊ သွားလို့လည်းမရဘူး။ သွားချင်ရင်တစ်ပါး လူမှုကယ်ဆယ်ရေးကားနဲ့ မနက် ၆ နဲ့ ၉ နာရီအထိတော့ သွားလို့ရလောက်တယ်။ အခုက လုံးဝကိုသွားလာလို့မရတော့ဘူး” ဟု ကျောက်မဲမြို့ ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
ထိုလေကြောင်းတိုက်ခိုက်မှုအတွင်း အရပ်သားနေအိမ်များလည်း ထိခိုက်ပျက်စီးဆုံးမှုရှိနေသကဲ့သို့ လူထိခိုက်သေဆုံးမှုများလည်း ရှိကြောင်း သိရသည်။
“၁၀၂၇ စစ်ဆင်ရေး” ဒုတိယလှိုင်းအတွင်း အရှေ့မြောက်တိုင်း စစ်ဌာနချုပ် (ရမခ) အပါအဝင် တပ်စခန်းများစွာကို လက်လွတ်ဆုံးရှုံးလိုက်ရသည့် စစ်ကောင်စီတပ်သည် မြေပြင်မှာ စစ်ကြောင်းထိုးပြီး တန်ပြန်တိုက်ခိုက်ရန် မဖြစ်နိုင်တော့ကြောင့် လေကြောင်းကိုသာအားကိုးပြီး တိုက်ခိုက်နေရခြင်း ဖြစ်သည်။
လက်ရှိ ကျောက်မဲမြို့ပေါ် မြို့သိမ်းတိုက်ပွဲကြောင့် နှစ်ဖက်တိုက်ပွဲကြား သေဆုံးသွားသည့် အရပ်သားများရှိနေပြီး၊ မြို့တွင်းတွင် ရုပ်အလောင်းများ မကောက်နိုင်အောင် ရှိနေသည်ဟု ကျောက်မဲမြို့ ဒေသခံတစ်ဦးက ထပ်လောင်းပြောသည်။
“အခုကျောက်မဲမြို့ပေါ် ရပ်ကွက် လမ်းကျိုလမ်းကြားမှာ မကောက်နိုင်တဲ့ လူသေအလောင်းတွေ ရှိတယ်။ တချို့ ပရဟိတအသင်းတွေ သွားကောက်လို့တောင် မရသေးဘူး။ လူသေအလောင်းတွေက ပုတ်သိုးနေပြီ၊ နံ့ဆော်နေတာပဲ “ ဟု ၎င်းကပြောသည်။
ပြီးခဲ့သည့် ဇွန်လ ၂၅ ရက်စပြီး ဇူလိုင် ၃၁ ရက်အထိ သျှမ်းပြည် မြောက်ပိုင်းတွင် ဖြစ်ပွားနေသော “ ၁၀၂၇ စစ်ဆင်ရေး” ဒုတိယလှိုင်းအတွင်း အရပ်သား စုစုပေါင်း ၁၃၀ ကျော်သေဆုံးပြီး ၁၇၀ ကျော် ထိခိုက်ဒဏ်ရာရှိထားကြောင်း သိရသည်။
Leave a Comments