သျှမ်းပြည်တောင်ပိုင်း၊ တောင်ကြီးမြို့၊ ပြည်နယ်အားကစားကွင်းတွင် ပြုလုပ်ခဲ့သော ရှမ်းနှင့် ရန်ကုန်အသင်းတို့၏ ဘောလုံးပွဲသို့ သွားရောက်ကြည့်ရှုသော ပရိတ်သတ်များထဲမှ လူငယ် အချို့ဖမ်းဆီးခံရကြောင်း သိရှိရသည်။
ယမန်နေ့ (ဩဂုတ်လ ၄ ရက်) ညနေ ၅ နာရီခန့်အချိန်တွင် ဘောလုံးပွဲလာကြည့်နေသောလူငယ်အချို့ကို လုံခြုံရေးယူထားသည့် ရဲများက လာရောက်ခေါ်ဆောင်သွားကြောင်း ပွဲသို့ သွားရောက်ကြည့်ရှုခဲ့သည့် ဒေသခံတစ်ဦးက သျှမ်းသံတော်ဆင့်ကိုပြောသည်။
“ဆဲလို့ ဖမ်းတာလား ဘီယာသောက်လို့ဖမ်းတာလားပေါ့၊ ဆဲရင်လည်း တကွင်းလုံးဆဲနေတာပဲ ဘောလုံးပွဲဆိုတော့ ထုံးစံပဲလေ အားပေးကြရင်း အော်ကြဟစ်ကြတာ ပုံမှန်ပါပဲ၊ဘီယာတွေဘာတွေလည်း အဝင်မှာ သူတို့စစ်တယ်။ ခုက မျက်စိရှေ့တင် ဘာမှမပြောဘဲ လာဆွဲခေါ်သွားတယ်။ ၁၀ယောက်နီးပါးရှိတယ်” ဟု ၎င်းကပြောသည်။
တောင်ကြီးမြို့၏ ပြည်နယ် အားကစားကွင်းတွင် ပြုလုပ်သော ရှမ်းယူနိုက်တက်နှင့် ရန်ကုန်ယူနိုက်တက်တို့၏ ဘောလုံးပွဲသို့ သွားရောက်ကြည့်ရှုသူများပြားပြီး ကွင်းအပြည့်ကြည့်ရှုခဲ့ကြကြောင်းသိရသည်။
“ကောင်လေး တစ်ယောက်ကို တစ်ပွင့်နဲ့ရဲက သေနတ်နဲ့ချိန်ပြီးတော့လာခေါ်သွားတာ၊ ကောင်လေးကလည်း ရုန်းပေမယ့် ပါသွားတာပဲ၊ လူတွေကလည်း ကြည့်ပဲကြည့်နေနိုင်တယ် သူတို့က လက်နက်တွေနဲ့ဆိုတော့ ဘယ်သူကမှ ဘာမှမလုပ်ရဲကြဘူး” ဟု ဖြစ်စဉ်ကို မြင်တွေ့ခဲ့သည့် သူတစ်ဦးက ပြောသည်။
ဖမ်းဆီးခံရသည့်အကြောင်းအရင်းနှင့် ပတ်သတ်၍ သျှမ်းသံတော်ဆင့်မှ ဆက်လက်စုံစမ်းနေဆဲဖြစ်သည်။
စစ်ကောင်စီ၏ မတရားဖမ်းဆီးမှုများနှင့် တပ်သားစုဆောင်းမှုများကြောင့် မြန်မာနိုင်ငံတွင်းမှ လူငယ်များသည် ပြည်ပသို့ ထွက်ပြေးတိမ်းရှောင်နေသူများရှိသလို၊ တော်လှန်ရေးတပ်ဖွဲ့များထံသို့ ဝင်ရောက်သွားကြသူများလည်းရှိနေသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments