သျှမ်းပြည်တောင်ပိုင်း လင်းခေးခရိုင် လင်းခေးမြို့တွင် ၂၁၁၂ ခု သျှမ်းနှစ်သစ်ကူးပွဲတော်ကို နို၀င်ဘာလ ၁၆ ရက်မှ ၁၈ ရက်နေ့အထိ ကျင်းပမည်ဖြစ်ကြောင်းသိရသည်။

ယခုနှစ်သျှမ်းနှစ်သစ်ကူးပွဲတော် ကို တောင်ရွာရပ်ကွက်ရှိ ဟိုနားကျောင်းတွင် ကျင်းပမည်ဖြစ်ပြီး ပွဲတော်ပထမညတွင် အဆိုတော်စိုင်းအောင်ထီးခမ်းနှင့် စိုင်းထီးဆိုင်၏သမီး နန်းဆိုင်စံတို့မှ သီဆိုဖျော်ဖြေကြမည်ဖြစ်ကြောင်း ပွဲတော်ဖြစ်မြောက်ရေးကော်မတီဝင် ယိင်းဟတ်ကပြောသည်။

“၁၆ ကနေ ၁၈ အထိ ပွဲကျင်းပပါမယ်။ အဆိုတော်တွေတော့ ၁၆ တညတည်း လာဆိုပေးဖို့အစီအစဉ်ရှိပါတယ်။ ခုလူငယ်တွေ တုတ်ဆူး အလှူခံလည်း ပြီးသွားပါပြီ။ ကျမတို့ဘက်ကလည်း မုန့်စျေးတန်းအတွက် စျေး ရောင်း သမားတွေကို အခန်းချပေးနေပါပြီ။ ဒီနှစ်အလုပ်လုပ်ရတာ လွယ်ကူမြန်ဆန်တယ်လို့ပြော လို့ရပါမယ်။မြို့နယ်၊ ခရိုင်အာဏာပိုင်တွေဘက်ကလည်း ကူညီမှုအပြည့်ပေးပါတယ်။ ”- ဟု သျှမ်းသံတော်ဆင့်အားပြောသည်။

သျှမ်းပြည်မြောက်ပိုင်းတွင် ဒေသခံလူထုရင်ဆိုင်ရသော စစ်ဘေးစစ်ဒဏ်အတွက် ၀မ်းနည်းမှုပြသည့်အနေဖြင့် လင်းခေးမြို့တွင် ၂၀၁၆ ခုနှစ်က သျှမ်းနှစ်သစ်ကူးပွဲတော်မကျင်းပဖြစ်ခဲ့ပေ။

လင်းခေးမြို့ သျှမ်းနှစ်သစ်ကူးပွဲတော်ဖြစ်မြောက်ရေးအတွက်ဦးဆောင်ဦးရွက်ပြုသည့် မြို့နယ် သျှမ်းစာပေယဉ်ကျေးမှုအသင်း၏ ဥက္ကဌနှင့်အလုပ်အမှုဆောင်အသစ်ကို ပြီးခဲ့သည့်စက်တင်ဘာလကပင် ပြန်လည်ရွေးချယ်ခဲ့သည်။ လက်ရှိတွင် ဥက္ကဌအဖြစ်ဆရာစိုင်းအောင်ခင်ကတာဝန်ယူဆောင်ရွက်ထားပါသည်။

လင်းခေးမြို့သည် ကွယ်လွန်ပြီးသော နိုင်ငံကျော်အဆိုတော် စိုင်းထီးဆိုင် ၏ ဇာတိမြို့ဖြစ်သည်။ သျှမ်းတေးသီ ချင်းအဓိက သီဆိုပြီး သျှမ်းလူထုကြား အထင်ကရ အဆိုတော်ဖြစ်သည့် စိုင်းအောင်ထီးခမ်းသည်လည်း စိုင်းထီးဆိုင်၏ ညီဖြစ်သည်။ စိုင်းထီးဆိုင်၏ သမီး နန်းဆိုင်စံမှာမူ ၄င်းဖခင်၏ သီချင်းများ ပြန်လည်သီဆိုရာမှ မြန်မာအသိုင်းအဝိုင်းကြား ထင်ပေါ်ကျော်ကြားလာသည့် အဆိုတော်တဦးဖြစ်သည်။