သျှမ်းပြည် မြောက်ပိုင်း နမ့်လန်မြို့တွင်း သူခိုးများ သောင်းကျန်းနေသဖြင့် ဒေသခံများ ဝိုင်းဝန်း ဖမ်းဆီးရာ တစ်ရက်တည်း သူခိုး (၃၄)ဦး ဖမ်းဆီးရမိကြောင်း စုံစမ်းသိရသည်။
ယမန့်နေ့ (ဇူလိုင် ၃၁)ရက်ညနေပိုင်း တွင် နမ့်လန်မြို့တွင်း တစ်အိမ်လျှင် အမျိုးသားတစ်ဦးစုကာ မြို့တွင်း သောင်းကျန်း နေသည့် သူခိုးများကို ဝိုင်းဝန်းဖမ်းဆီးရာ (၃၄)ဦး ဖမ်းဆီးရမိကြောင်း နမ့်လန်ဒေသခံအမျိုးသားတစ်ဦးက သျှမ်းသံတော်ဆင့် ကိုပြောသည်။
‘’မနေ့ညက အေးချမ်းသာရပ်ကွက်က ယောကျာ်းလေးတွေ တစ်အိမ်တစ်ယောက်စုပြီး သျှမ်းအဖွဲ့အစည်းတွေနဲ့ သူခိုးသွားရောက် ဝိုင်းဖမ်းကြတာ ဒီမနက်မှ မိတာ စုစုပေါင်း ၃၄ ယောက်ရှိတယ် ‘’ဟု ၎င်းအမျိုးသားက ပြောသည်။
အဆိုပါ သူခိုးများကို ဖမ်းဆီးရာသူ ဒေသခံ အမျိုးသားများအပြင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်သားများ ပါဝင်ကူညီကြောင်း သိရသည်။
လက်ရှိကာလအတွင်း နမ့်လန်မြို့နယ် အတွင်း စစ်ရေး ပဋိပက္ခ ရှုပ်ထွေးနေချိန် လားရှိုးမြို့ဘက်မှ ရောက်လာသည့် စစ်ဘေးရှောင်များလည်း များပြားလာသည်ကို အခွင့်ကောင်းယူကာ သူခိုးများ သောင်းကျန်းနေကြောင်း၊ နမ့်လန်မြို့တွင်း နေ့စဥ်နှင့်အမျှ နေအိမ် ဖောက်ထွင်းကာ နေအိမ်အတွင်းရှိ ပစ္စည်းများ၊ ဆိုင်ကယ်များ၊ ရွှေများကို ခိုးယူမှုရှိလာကြောင်း ၎င်း အမျိုးသားက ပြောသည်။
‘’သူခိုးတွေဝင်လာတာ ကြာပြီး၊ အရမ်းသောင်းကျန်လာတယ်။ အခုက အရမ်းဆိုးတယ်။ သူများအိမ်တွေဖောက်ပြီး ရွှေတွေ ခိုးယူတယ် ။ ဆိုင်ကယ်တွေခိုးတယ် ။ ပျောက်ဆုံးမှုတွေ အရမ်းများလာတယ် ။ ပြည်သူတွေ သတိထားဖို့ လိုအပ်တယ် ‘’ဟု အသက် ၄၀ အရွယ်ရှိ အမျိုးသားက ဆိုပြန်သည်။
စစ်တပ်အာဏာသိမ်းပြီးတဲ့နောက်ပိုင်း သျှမ်းပြည်တွင်း ဓားပြတိုက်၊ ခိုးယူလုယက်မှုတွေ များပြားလာခဲ့သည့် အတွက်ကြောင့် ပြည်သူများအတွက် လုံခြုံမှု လုံးဝမရှိတော့ကြောင်း ဒေသခံများ ပြောပြချက်အရသိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments