သျှမ်းပြည် သီပေါမြို့နယ် နောင်ကော်ကျေးရွာအနီး စစ်ကောင်စီတပ်နှင့် ကိုးကန့်တပ်ဖွဲ့ MNDAA) တို့ ၃ ရက်တိုက်ပွဲအတွင်း နှစ်ဘက် သေဆုံးမှုများကြောင်း သတင်းရရှိသည်။

ပြီးခဲ့သည့် (ဇူလိုင်လ ၂၈ ရက်) မှစတင်ပြီး ယနေ့ (ဇူလိုင်လ ၃၁ ရက်) အထိ ၃ ရက်အတွင်း သီပေါမြို့နယ် နောင်ကော်ကျေးရွာတွင် အခြေစိုက်ထားသည့် စစ်ကောင်စီ ခြေမြန်တပ်ရင်း ခမရ-(၁၄၇) နှင့် ကိုးကန့်တပ်ဖွဲ့ MNDAA တို့ တိုက်ပွဲပြင်းထန်လျက်ရှိရာ နှစ်ဘက်တပ်သား ထိခိုက်သေဆုံးမှု များကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“မနေ့က ညအထိ ပစ်နေတုန်း။ စစ်ကောင်စီ တပ်ရင်းကတော့ မကျသေးဘူး။ ကိုးကန့်တွေ အရမ်းသေတယ်။ စစ်တပ်ဘက်က စစ်သားတွေရဲ့ လက်နက်ကြီးတွေက MNDAA နေတဲ့ နေရာကို တည့်ကြီးကျတော့ အများကြီး သေတယ်”ဟု စစ်ရေးသတင်းရင်းမြစ်တစ်ဦးက ပြောသည်။

လက်ရှိတွင် ကိုးကန့်တပ်ဖွဲ့ MNDAA သည် နမ့်လန်မြို့ အနီးတဝိုက်ထိ နေရာယူထားပြီး သီပေါမြို့နယ် နားမခေါ်‌ကျေးရွာ၊ ကောင်းမူကျေးရွာ၊ ဟိုနားကျေးရွာတို့တွင် စစ်အင်အားများ ဖြည့်ကာ နေရာယူထားကြောင်း ၎င်းက ဆက်ပြောသည်။

ယခုတိုက်ပွဲဖြစ်ပွားနေသည့် နောင်ကော်ကျေးရွာသည် သီပေါမြို့နှင့် ၁၄ မိုင်ခန့်သာ ကွာဝေးပြီး ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA ထိန်းချုပ်သည့် နယ်မြေဖြစ်ကြောင်း သိရသည်။

အလားတူ ဇူလိုင်လ ၂၉ ရက်တွင်လည်း စစ်ကောင်စီတပ်သည် ကားကြီးများဖြင့် စစ်အင်အား (၁၀၀၀) ခန့်ကို မိုင်းကိုင်မြို့မှ တန့်ယန်းမြို့သို့ အင်အားဖြည့်တင်းရန် ချီတက်လာခဲ့ကြောင်း စစ်ရေးသတင်းရင်းမြစ်က ပြောသည်။

ယမန်နေ့ (ဇူလိုင်လ ၃၀) ရက်တွင် တန့်ယန်းမြို့နှင့် လားရှိုးမြို့နယ် နမ့်ပေါင်ဘက်သို့ ဦးတည်ပြီး စစ်အင်အား ဖြည့်တင်းလာသည့် စစ်ကောင်စီယာဉ်တန်းကို MNDAA က မန်ပန်နှင့် ဟိုနားကျေးရွာအနီး ကြားဖြတ်တိုက်ခိုက်ခဲ့ရာ စစ်ကောင်စီတပ်သား အများအပြား သေဆုံးခဲ့ကြောင်း ဒေသခံများထံမှ သိရသည်။

လက်ရှိ သီပေါမြို့နယ်တွင် ကိုးကန့်တပ်ဖွဲ့ MNDAA ၊ သျှမ်းတပ် SSPP/SSA ၊ တအာင်း(ပလောင်) အမျိုးသားလွတ်မြောက်ရေး တပ်မတော် TNLA တို့ သွားလာလှုပ်ရှားနေသည်။